ⴰⴳⴰⴷⵉⵔ ⴰⵔ ⵜⵙⴼⵓⴳⵍⵓ ⵙ “ⴱⵉⵢⵍⵎⴰⵡⵏ; ⴰⵍⵎⵓⴳⴳⴰⵔ ⴰⴳⵔⴰⵖⵍⴰⵏ ⵏ ⵓⴳⴰⴷⵉⵔ” ⴳ ⵜⵙⵙⵓⵜⵍⵜ ⵏⵏⵙ ⵜⵉⵙⵙ ⴽⵕⴰⴹⵜ

ⴰⴳⴰⴷⵉⵔ ⴰⵔ ⵜⵙⴼⵓⴳⵍⵓ ⵙ “ⴱⵉⵢⵍⵎⴰⵡⵏ; ⴰⵍⵎⵓⴳⴳⴰⵔ ⴰⴳⵔⴰⵖⵍⴰⵏ ⵏ ⵓⴳⴰⴷⵉⵔ” ⴳ ⵜⵙⵙⵓⵜⵍⵜ ⵏⵏⵙ ⵜⵉⵙⵙ ⴽⵕⴰⴹⵜ, ⴷⴷⴰⵡ ⵜⵎⴰⵜⴰⵔⵜ : “ⴱⵉⵢⵍⵎⴰⵡⵏ; ⵜⵓⵎⵔⵜ ⵙ ⵜⵏⴰⵖⵉⵡⵉⵏ ⵜⵉⵎⴰⵣⵉⵖⵉⵏ”

ⴰⵔ ⵜⵜⵃⵢⵢⴰⵍ ⵜⵖⵔⵎⵜ ⵏ ⵓⴳⴰⴷⵉⵔ ⴰⴷ ⵜⵙⵏⵎⴰⵍⴰ ⵉⵎⵓⵙⵙⵓⵜⵏ ⵏ “ⴱⵉⵢⵍⵎⴰⵡⵏ; ⴰⵍⵎⵓⴳⴳⴰⵔ ⴰⴳⵔⴰⵖⵍⴰⵏ ⵏ ⵓⴳⴰⴷⵉⵔ”, ⵎⴰ ⴰⵏⵏ ⴳ ⵓⵙⴰⴽⵓⴷ ⵉⵍⵍⴰⵏ ⴳⵔ 15 ⴰⵔ 21 ⵢⵓⵏⵢⵓ 2026, ⴷⴷⴰⵡ ⵜⵎⴰⵜⴰⵔⵜ : “ⴱⵉⵢⵍⵎⴰⵡⵏ; ⵜⵓⵎⵔⵜ ⵙ ⵜⵏⴰⵖⵉⵡⵉⵏ ⵜⵉⵎⴰⵣⵉⵖⵉⵏ”.

ⴷ ⵔⴰⴷ ⵜⵉⵙⵙⴰⵏ ⵜⵙⵙⵓⵜⵍⵜ ⴰⴷ ⴰⵙⴼⵓⴳⵍⵓ ⵙ “ⵜⴳⵣⵉⵔⵉ ⵜⵉⴽⴰⵏⴰⵔⵉⵢⵉⵏ” ⴷ ⵔⴰⴷ ⵜⴳ ⵉⵏⴱⴳⵉ ⵏ ⵡⴰⴷⴷⵓⵔ, ⵎⴰ ⴰⵏⵏ ⵙ ⵡⴰⵙⵙⴰⵔ ⵏ ⵢⵏ ⵓⴽⴰⴱⴰⵔ ⵏⵏⴰ ⴳ ⵍⵍⴰⵏ ⵉⵎⵥⵍⴰⵢⵏ ⴷ ⵉⵎⵔⵣⵓⵜⵏ ⵉⴽⴰⴷⵉⵎⵉⵢⵏ, ⴷ ⵜⵔⵓⴱⴱⴰ ⵏ ⵜⴰⵢⵙⵉ, ⴰⵢⵍⵍⵉ ⵉⵎⵎⴰⵍⵏ ⵉⵣⴷⴷⵓⵢⵏ ⵉⵖⴰⵔⵉⵎⵏ ⴷ ⵉⴷⵍⵙⴰⵏⵏ ⵉⵎⴰⵣⵉⵖⵏ ⵍⵍⵉ ⵉⵙⵎⵓⵏⵏ ⴳⵔ ⵙⵏⴰⵜ ⵜⵎⵏⴰⴹⵉⵏ ⴰⴷ.

ⵜⴰⵙⵙⵓⵜⵍⵜ ⴰⴷ ⵔⴰⴷ ⵜⵜ ⵉⵙⵏⵎⴰⵍⴰ ⵓⵙⵇⵇⵉⵎ ⴰⵖⵉⵡⴰⵏ ⵏ ⵓⴳⴰⴷⵉⵔ, ⴳ ⵜⴰⵍⵖⴰ ⵏ ⵓⵣⵉⴳⴳⵣ ⵏ ⵓⵖⴰⵡⴰⵙ  ⴷ ⵥⵟⵟⴰ ⵏ ⵜⵡⵡⵓⵔⵉ ⵏ ⵜⵖⵉⵡⴰⵏⵜ 2022- 2027, ⵎⴰ ⴰⵏⵏ ⵙ ⵜⴷⵔⴰⵡⵜ ⴷ ⵜⵎⴰⵡⴰⵙⵜ ⵏ ⵓⵎⴰⵜⵜⵉ ⴰⵎⵓⵟⵟⵓⵏ ⴷ ⵓⵙⵖⵓⴷⵓ ⵏ ⵜⵎⵀⵍⴰ ⴷ ⵜⵎⴰⵡⴰⵙⵜ ⵏ ⵜⵄⵓⵔⵔⵎⴰ ⴷ ⵜⴷⵍⵙⴰ ⴷ ⵓⵏⵢⴰⵍⴽⴰⵎ, ⴷ ⵓⵙⵇⵇⵉⵎ ⵏ ⵜⵎⵏⴰⴹⵜ ⵙⵓⵙ ⵎⴰⵙⵙⴰ, ⴷ ⵓⵙⵇⵇⵉⵎ ⴰⵏⵎⵏⴰⴹ ⵏ ⵜⵎⴰⵍⵍⴰⵢⵜ, ⵎⴰ ⴰⵏⵏ ⵙ ⵓⵙⵡⵓⴷⴷⵓ ⵏ ⵡⴰⵎⵎⴰⵙ ⵏ ⵙⵓⵙ ⵎⴰⵙⵙⴰ ⵏ ⵜⵏⴼⵍⵉⵜ ⵜⴰⴷⵍⵙⴰⵏⵜ.

ⵉⵡⴰⵜⵙ ⵏⵏ ⵓⵎⵓⵙⵙⵓ ⴰⴷ ⴰⴷⵍⵙⴰⵏ ⴷ ⵡⵉⵏ ⵜⵥⵓⵕⵉ ⴰⴷ ⵜⵏⵢⴰⵍⴽⴰⵎ ⴷ ⵓⵎⵓⵔⵙ ⴰⵖⵔⴼⴰⵏ ⵍⵍⵉ ⵉⵣⵔⵉⵏ ⴳ ⵙⵏⴰⵜ ⵜⵓⵏⵖⴰⵍⵉⵏ ⵣⵔⵉⵏⵉⵏ, ⴷ ⵡⴰⵏⵏⴰⵍ ⵏ ⵓⴷⵖⴰⵔ ⵏ ⵓⴳⴰⴷⵉⵔ ⵜⵉⵣⵉ ⴷⴰ ⵜⴳⴰ ⵜⴰⵎⴰⵥⵓⵏⵜ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⴷ ⴰⴷ  ⵜⵖⴰⵎⴰⵜ ⵜⴳ ⴰⵏⵎⵓⵇⵇⴰⵔ ⴰⵙⴳⵯⵙⴰⵏ, ⵍⵍⵉ ⵔⴰⴷ ⵉⵙⴼⵓⴳⵍⵓ ⵙ ⵙ ⵜⴰⵍⵖⵉⵡⵉⵏ ⵏ ⵜⵥⵓⵕⵉ ⴷ ⵜⵓⵎⵔⵜ ⴳ ⵜⴰⵍⵖⴰ ⵏ ⵡⵓⴽⴽⵓⵙ ⴰⴷⵍⵙⴰⵏ ⴰⵎⵖⵔⵉⴱⵉⵢ ⴳ ⵓⵍⵎⵓⴳⴳⴰⵔ ⵏ ⴱⵉⵢⵍⵎⴰⵡⵏ.

ⴰⵖⴰⵡⴰⵙ ⵏ ⵜⵙⵙⵓⵜⵍⵜ ⴰⴷ ⵉⴽⵜⴰⵔ ⵙ ⵜⴽⵟⵟⵓⵎⵉⵏ ⴳⴰⵏⵉⵏ ⵜⵉⵎⵏⵏⴰⵡⵉⵏ ⵍⵍⵉ ⵉⵙⵎⵓⵏⵏ ⴳⵔ ⵓⵔⵣⵣⵓ ⴰⵎⴰⵙⵙⴰⵏ ⴷ ⴷ ⵓⵙⵏⴼⵍⵓⵍ ⴰⵏⵥⵓⵕ, ⵍⵍⵉ ⴳ ⵔⴰⴷ ⵉⵍⵉⵏⵜ ⵜⵎⵣⵉⵣⵣⵍⵉⵏ ⵏ ⵜⵓⵍⵍⵉⵙⵉⵏ ⵉⵜⵜⵓⵙⵍⵍⴰⴼⵏ, ⴷ ⵜⵙⴰⵡⵡⵓⵔⵉⵏ ⵏ ⵜⵎⴳⵓⵔⵉ ⵏ ⵜⵙⵓⵏⵉⵡⵉⵏ ⴷ ⵓⵙⵙⵍⵎⴷ ⵏ ⵓⵙⴽⴽⵉⵍ ⵏ ⵜⵉⴼⵉⵏⴰⵖ, ⴷ ⴰⵡⴷ ⵉⵙⴼⵙⵔⵜⵏ ⵏ ⵜⴰⵢⵙⵉ, ⵎⴽ ⵍⵍⵉ ⵔⴰⴷ ⵉⵍⵉⵏⵜ ⴳ ⵜⵓⴳⵜⵜ ⵏ ⵉⴷⵖⴰⵔⵏ ⵏ ⵜⵖⵔⵎⵜ; ⵜⵓⴳⵜⵜ ⵏ ⵜⵙⴰⵡⵡⵓⵔⵉⵏ ⴳ ⵜⴰⴷⴷⴰⵔⵉⵏ ⵏ ⵜⵎⴷⴷⵓⵔⵉⵏ, ⵜⵉⵍⵉ ⴰⵡⴷ ⵜⵉⵏⵏⴰⵡⵜ ⵜⴰⴳⵔⴰⵖⵍⴰⵏⵜ ⴳ ⵙⵙⵉⵏⵉⵎⴰ ⵚⴰⵃⴰⵕ ⴼ ” ⵜⵎⵍⴰⵍⵜ ⵏ ⵉⵙⴰⵍⵍⴰⵢⵏ ⴳ ⵓⵙⴱⵓⵖⵍⵓ ⴷ ⵓⵙⵓⵜⵜⴳ ⵏ ⴱⵉⵢⵍⵎⴰⵡⵏ ⵜⵉⵣⵉ ⵍⵍⵉ ⵉⴳⴰ ⵜⴰⵢⵙⵉ ⵜⴰⵔⴽⵎⴰⵎⵜ”, ⵜⵙⵎⴷⵜ ⴰⵙ ⴰⵡⴷ ⵜⵓⵔⵜⵉⵜ ⵏ ⵉⴱⵏ ⵣⴰⵢⴷⵓⵏ ⵍⵍⵉ ⵔⴰⴷ ⵢⵓⵔⵔⵉ ⴰⴷ ⵜⴳ ⵢⴰⵏ ⵡⵓⵙⵓ ⵍⵍⵉ ⴳ ⵔⴰⴷ ⵢⵉⵍⵉ ⴱⵉⵢⵍⵎⴰⵡⵏ, ⴷ ⵔⴰⴷ ⴳⵉⵙ ⵉⵜⵜⵓⵙⴽⴰⵔ “ⵓⵙⵓⵏ ⵏ ⴱⵉⵢⵍⵎⴰⵡⵏ”, ⴷ ⵓⵙⴰⵢⵙ ⵏ ⴰⵍ ⴰⵎⴰⵍ ⵔⴰⴷ ⴳⵉⵙ ⵉⵍⵉⵏ ⵙⵉⵏ ⵢⵉⵡⵉⵣⵏ ⵍⵍⵉ ⴳ ⵔⴰⴷ ⴷⵔⵓⵏ ⵉⵏⴰⵥⵓⵕⵏ ⵉⵎⴰⵣⵉⵖⵏ.

ⵔⴰⴷ ⵢⴰⵡⴹ ⵓⵍⵎⵓⴳⴳⴰⵔ ⴰⴱⵓⵖⵍⵓ ⵏⵏⵙ ⵜⵉⵣⵉ ⵏⵏⴰ ⵉⵎⵎⴰⵜⵜⵉ ⵓⵙⵓⴽ ⵏ ⵎⵓⵃⵎⵎⴰⴷ ⵡⵉⵙⵙ ⵙⵎⵎⵓⵙ ⵉⴳ ⵢⴰⵏ ⵓⵎⵣⴳⵓⵏ ⵍⵍⵉ ⴳ ⵔⴰⴷ ⵜⵉⵍⵉ “ⵜⵡⴰⴷⴰ ⵏ ⵜⵓⵎⵔⵜ ⴷ ⵜⵥⵓⵕⵉ”, ⵍⵍⵉ ⴳ ⵔⴰⴷ ⵉⵍⵉⵏⵜ ⵜⴷⵔⴰⵡⵉⵏ ⵏ ⵜⵔⵓⴱⴱⴰ ⵏ ⵜⴰⵢⵙⵉ ⴷ ⵉⵙⵏⴼⵍⵓⵍⵏ ⵏ ⵉⵄⵔⵔⵉⵎⵏ ⵍⵍⵉ ⴷ ⵉⴷⴷⴰⵏ ⵙⴳ ⵎⵏⵏⴰⵡⵜ ⵜⵎⵏⴰⴹⵉⵏ ⵙ ⵜⵎⵍⵙⴰ ⵏⵏⵙⵏ ⴷ ⵜⵙⵓⵏⵉⵡⵉⵏ ⵏⵏⵙⵏ ⴳ ⵢⴰⵏ ⵓⵎⵓⵖⵍⵉ ⴰⵙⴼⵓⴳⵍⴰⵏ ⵍⵍⵉ ⵉⵙⵎⵓⵏⵏ ⴳⵔ ⵜⴰⵢⵙⵉ ⴷ ⵓⵙⵎⴰⵢⵏⵓ, ⵎⴽ ⵍⵍⵉ ⵔⴰⴷ ⴳⵉⵙ ⵜⵉⵍⵉ ⵜⴷⵔⴰⵡⵜ ⵜⴰⴳⵔⴰⵖⵍⴰⵏⵜ, ⵍⵍⵉ ⵔⴰⴷ ⵉⵙⵎⴷ ⵉ ⵓⵍⵎⵓⴳⴳⴰⵏ ⵢⴰⵜ ⵜⵡⵍⴰⴼⵜ ⵜⴰⴳⵔⴰⵖⵍⴰⵏⵜ ⴳ ⵜⵙⵙⵓⵜⵍⵜ ⴰⴷ ⵏ 2026.

ⵜⴰⵎⵙⴰⵔⵜ ⴰⴷ ⵜⴳⴰ ⵢⴰⵏ ⵓⵙⵔⵙ ⴰⴷⵍⵙⴰⵏ ⴱⴰⵀⵔⴰ ⵉⴳⴰⵏ ⴰⴽⵙⵡⴰⵜ, ⴰⵔ ⵉⵊⵊⴰ ⵜⵉⵖⵔⵎⵜ ⵏ ⵓⴳⴰⴷⵉⵔ ⴰⴷ ⵜⴳ ⵜⴰⵎⴰⵥⵓⵏⵜ ⵏ ⵜⵓⵙⵙⵏⴰ ⴷ ⵜⵎⴰⵍⵍⴰⵢⵜ, ⵜⵙⵙⴷⵓⵙ ⵉⵅⴼ ⵏⵏⵙ ⴷ ⵓⴷⵖⴰⵔ ⵏⵏⵙ ⵍⵍⵉ ⵉⴳⴰⵏ ⵢⴰⵏ ⵓⵙⴰⵢⵔⵓⵔ ⵍⵍⵉ ⴳ ⴷ ⵜⵜⵎⵎⴰⴳⴳⴰⵔⵏⵜ ⵜⵖⵔⵎⵉⵡⵉⵏ ⴷ ⵉⴳ ⵓⴳⴰⴷⵉⵔ ⴰⴷⵖⴰⵔ ⵏ ⵜⵎⵏⵏⴰⵡⵜ ⵜⴰⴷⵍⵙⴰⵏⵜ ⵙ ⴰⵢⵍⵍⵉ ⵉⵎⵙⴰⵙⴰ ⴷ ⵉⵙⵔⵓⵙⵏ ⵏ ⵜⵏⴼⵍⵉⵜ ⵏ ⵜⵖⵔⵎⵜ ⴷ ⵜⵎⵏⴰⴹⵜ.

ⵜⴰⵎⵀⵍⴰ ⵏ ⵓⵍⵎⵓⴳⴳⴰⵔ