قصيدة جديدة لمحمد بوشلخة: الحرف العاصي..

الحرف العاصي
مال الحرف عاصي من المعنى جافل
لمداد جاري وديان
أُو ريشتي عوَّافة
كَالو الورقة محرزَ يا غافل
كَالو حروفك سايبة خاصها تسياس
خاصها لجام
خاصها تعلم قواعد اتزمام
كّيدو لكلام الفُهاما
الطريز خاصو رخصة من اسيادي العلاما
ايلا دخلتي الرحبة طلب التسليم لأهل لمكان
نكّد الوترة والعين ميزان
ربَّاو منّو الريش وداب كّالو حديث لعكّايز
رضعو منو ايام الحزة واليوم ولاّ مكّايز
كانت منزلة الهيف وداب لعكر صابا وصيف
كّالو لقلم سرّو يرسم
يوشم
يرشم
ايلا سمع بَعْ
يكّول سبع
ويلا دارت موكا فر
يكّول نسر
ويلا دفكّت الشكوى يلوم الزهر
لقلم ما يلزمو يغضب
ايلا شعلات العافية الفالطا ف لحطب
ما يتلفت لدم ما يرفد هم
ما يشوف الردم
كالو الورقة هشيشة والوقت ما يرحم
لمن تشكي أسيدي
اللسان ف رحبة اللغا حامي
ولقلم وقت الشدة كَادي
كَالو فاضي
كَالو فاهلو ماضي
كّالو عادي…..

• محمد بوشلخة