ⵜⴰⵏⵎⵎⴰⵍⵜ ⵉ ⵜⴰⵏⵏⴰⵢⵜ ⵜⴰⴳⴷⵓⴷⴰⵏⵜ ⵜⴰⵏⴰⵎⵓⵔⵜ ⴷ ⵜⵎⴰⴹⵍⴰⵏⵜ ⵙ ⵜⵎⵍⴷⴰ ⵏ ⵓⴽⵜⴰⵢ ⵍⵢⵓⴱⵉⵍ ⵏ ⵏⵏⵇⵔⵜ ⵉ ⵜⵓⵜⵍⴰⵢⵜ ⵜⴰⵢⵎⵎⴰⵜ

”ⴰⵎⵣⴰⵔⴰⵢ ⴰⵙⵏⵉⵍⵙ ⴷ ⵓⵎⵢⴰⵏⴰⵡ ⴰⴷⵍⵙⴰⵏ ⴳⴰⵏ ⵜⵉⵙⵓⵔⴰ ⵏ ⵓⵎⵛⴰⵛⴽⴰ ⴰⵏⴰⴼⴳⴰⵏ ⴷ ⵡⴰⵍⵍⴰⵍ ⵏ ⵜⴳⵎⵉ ⵜⴰⵙⵓⵍⴰⵏⵜ ”

ⵣⴳ 25 ⵏ ⵓⵙⴳⴳⵯⴰⵙ, ⵜⴼⴳⴳⴷ  ⵜⵎⴰⴷⴷⴰⵙⵜ ⵏ ⵍⵢⵓⵏⵉⵙⴽⵓ ⵉ ⵡⴰⵜⵉⴳ ⵏ ⵜⵓⵜⵍⴰⵢⵜ ⵜⴰⵢⵎⵎⴰⵜ ⴷ ⵙ ⵓⵙⴷⵉⴷⴷⵉ ⵉⵜⵜⵔⵏⵓⵏ ⴷ ⵉⵎⵉⵣⴰⵏ ⵉⵜⵜⵉⵍⵉⵏ ⵉⵖ ⵜⵜ ⵓⵔ ⴼⵔⴳⵏ, ⴰⵛⴽⵓ ⵎⵎⵓⵜⵏⵜ ⵜⵓⴳⵜ ⵏⵏⵙⵏⵜ, ⴷ ⵉⵖ ⵜⵎⵎⵓⵜ ⵜⵓⵜⵍⴰⵢⵜ ⴰⵔ ⴷⵉⵙ ⵜⵎⵎⵜⴰⵜⵏⵜ ⵜⵎⵢⵓⵔⵉⵏ ⴷ ⵜⵎⴽⵜⵉⵜ  ⴷ ⵉⵙⵔⵜⴰⵏ ⵏ ⵓⵙⵡⵉⵏⴳⵎ ⴷ ⵓⵡⵏⵏⵉ ⴷ ⵓⵙⵏⴼⵍⵓⵍ, ⴰⵢⵍⵍⵉ ⵉⴳⴰⵏ ⵉⵙⴰⴳⵎⵏ ⵉⴷⵙⵍⴰⵏⵏ ⵉ ⵓⵙⴼⵍⵙ ⵏ ⵉⵎⴰⵍ ⵏ ⵓⴼⴳⴰⵏ, ⴰⵛⴽⵓ ⵜⴳⴰ ⴰⵎⵎⴰⴽ ⴰⴷⵙⵍⴰⵏ ⵉ ⵡⴰⵙⵙⴰⵢ ⵏ ⵜⵓⵙⵙⵏⴰ ⴷ ⵓⴼⵔⴰⴳ ⵅⴼ ⵜⴷⵍⵙⵉⵡⵉⵏ ⴷ ⵡⴰⵢⴷⴰ ⴰⵏⴼⴳⴰⵏ ⴰⵎⴰⵜⵜⵉⵡ ⴷ ⵓⵔⴽⵎⴰⵎ.

ⴷ ⵖ ⵓⵙⴳⴰ ⴰⴷ,ⴰⵔ ⵜⵜⵉⵏⵉ ⵜⵎⴰⴷⴷⴰⵙⵜ ⵏ ⵍⵓⵏⵉⵙⴽⵓ ⵎⴰ ⵙ ⴷ ⵜⵓⴳⵜ ⵏ ⵜⵓⵜⵍⴰⵢⵉⵏ ⵜⵉⵎⵉⵡⴰⵏⵏ ⴷ ⵜⵎⵉⵔⴰⵢⵉⵏ ⴰⵙⵙⴰ ⴳⴰⵏⵜ 8324 ⵏ ⵜⵓⵜⵍⴰⵢⵜ, ⵍⵍⴰⵏⵜ ⴳⵉⵙ 7000 ⵏ ⵜⵓⵜⵍⴰⵢⵜ ⵉⵜⵜⴰⵡⵙⵙⵎⵔⴰⵙⵏ. ⵎⴰⵛ ⵜⵓⵜⵍⴰⵢⵉⵏ ⵉⵙⵜⴰⵡⵀⵎⵎⴰⵏ ⴳ ⵓⵏⴳⵔⴰⵡ ⵏ ⵓⵙⵍⵎⴷ ⴷ ⵜⵓⴷⵔⵜ ⵜⴰⵎⴰⵜⴰⵢⵜ ⵓⵔ ⵉⵣⵔⵉ ⵓⵟⵟⵓⵏ ⵏⵏⵙⵏⵜ 1000 ⵏ ⵜⵓⵜⵍⴰⵢⵜ, ⴷ ⵜⵉⵏⵏⴰ ⵉⵜⵜⴰⵡⵙⵙⵎⵔⴰⵙⵏ ⵖ ⵉⴳⵔ ⴰⵎⴰⵟⵟⵓⵏ ⵓⵔ ⵣⵔⵉⵏⵜ 100 ⵏ ⵜⵓⵜⵍⴰⵢⵜ.

ⴷ ⵙ ⵜⵎⵍⴷⴰ ⴰⴷ, ⴰⵥⵟⵟⴰ ⴰⵎⴰⵣⵉⵖ ⵉ ⵜⵎⵓⵔⵉ – ⴰⵥⵟⵟⴰ ⴰⵎⴰⵣⵉⵖ- ⴰⵔ :

ⵜⵙⵎⴰⵢⵏⵓ ⴰⵍⵜⴰⵖ ⵏⵏⵙ ⴳ ⵜⵖⵓⵔⵉ ⵏ ⵜⵎⵜⵜⴰ ⵉⵎⵓⵏⵏ ⴰⴷ ”ⵜⴼⵔⴳ ⵅⴼ ⴽⵓ ⵜⵓⵜⵍⴰⵢⵉⵏ ⵍⵍⵉ ⵙⵙⵎⵔⴰⵙⵏ ⵉⴳⴷⵓⴷⵏ ⵏ ⵓⵎⴰⴹⴰⵍ ⴷ ⴰⴷ ⵜⵏⵜ ⵃⴹⵓⵏ” ⵉ ⵓⵙⴷⵓⵙ ⵏ ⵓⵎⵢⴰⵏⴰⵡ ⴰⵙⵏⵉⵍⵙ ⴷ ⵓⵎⵢⴰⵏⴰⵡ ⴰⴷⵍⵙⴰⵏ ⴷ ⵓⴹⴰⴽⴰⵍ ⵏ ⵓⵣⵔⴼ ⴳ ⵓⵙⵍⵎⴷ ⵙ ⵜⵓⵜⵍⴰⵢⵜ ⵜⴰⵢⵎⵎⴰⵜ ⵉ ⵓⵚⴽⵓ ⵏ ⵉⵎⵓⵏⵏ ⴱⴰⵀⵔⴰ ⵉⵎⵙⴰⵙⴰⵏ.

ⵜⵙⴷⴷⵉⴷ ⴳ ⵓⵎⵏⵉⴷ ⴰⴷ ⵅⴼ ⵓⵙⵖⵓⵏ ⵏⵏⵙ ⵙ ⵡⴰⵔⵔⴰ ⴰⵎⴰⴹⵍⴰⵏ ⵉ ⵜⵓⵜⵍⴰⵢⵉⵏ ⵏ ⵉⴳⴷⵓⴷⵏ ⵉⵕⵚⵍⵉⵢⵏ 2022-2032, ⴷ ⴰⴷ ⵔⴰⵔⵏ ⵜⴰⵖⴹⴼⵜ ⵙ ⵡⴰⴷⴷⴰⴷ ⵉⵀⵔⵛⵏ ⵏ ⵜⵓⴳⵜ ⵏ ⵜⵓⵜⵍⴰⵢⵉⵏ ⵏ ⵉⴳⴷⵓⴷⵏ ⵉⵕⵚⵍⵉⵢⵏ, ⵍⵍⵉⵖ ⵜⵍⵍⴰ ⵜⵎⴰⵣⵉⵖⵜ, ⴰⵛⴽⵓ ⴰⵔ ⵜⵜⵉⵏⵉⵏⵜ ⵜⵎⵉⵜⴰⵔ ⵖⵉ ⴷ ⵙ ⵉⵖ ⵉⵍⴽⵎ 2100, ⵎⴰ ⵙ 50% ⵏ ⵜⵓⵜⵍⴰⵢⵉⵏ ⵜⵉⵎⵉⵡⴰⵏⵏ ⴰⵙⵙⴰ ⵔⴰⴷ ⵎⵎⵜⵏⵜ ⵏⵉ ⵖ ⵍⵍⴰⵏⵜ ⵖ ⵉⵎⵉⵥⵉ.

ⵜⵙⵙⵓⵍⵉⵢ ⵙ ⵉⵙⵙⵉⵡⵙⵏ ⵏ ⵜⵎⵖⵏⴰⵙⵉⵏ ⴷ ⵉⵎⵖⵏⴰⵙⵏ ⵏⵏⵙ ⴷ ⵅⴼ ⵜⵓⴳⴳⴰⵙ ⵏⵏⵙⵏ ⴳ ⵜⵎⵜⵜⴰ ⴰⴷ ⵏⵄⵉⵕⵏ ⵅⴼ ⵓⵎⵢⴰⵏⴰⵡ ⴰⵙⵏⵉⵍⵙ ⴷ ⵓⵎⵢⴰⵏⴰⵡ ⴰⴷⵍⵙⴰⵏ, ⵣⵉ ⵓⴳⴳⴰⵔ ⵏ ⵓⴳⵏⴰⵕ ⵉⵙⴳⴳⵯⴰⵙⵏ, ⵙ ⵓⵍⵜⴰⵖ ⵏⵏⵙ ⵉⵥⵉⵍⵏ ⵅⴼ ⵓⵙⴱⵓⵖⵍⵓ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⴰⵛⴽⵓ ⵜⴳⴰ ⵜⵓⵜⵍⴰⵢⵜ ⵜⴰⵢⵎⵎⴰⵜ ⵏ ⵉⵎⵖⵔⵉⴱⵉⵢⵏ, ⴷ ⵙ ⵓⵎⵢⴰⵙⵙⴰ ⵏⵏⵙ ⵙ ⵓⵎⵙⴰⵖⵓⵍ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉⵜⵜⴰⵡⵙⵙⴰⵏⵏ ⴳ ⵓⵎⴰⴹⴰⵍ.

ⴷ ⵖ ⵓⴱⵔⵉⴷ ⵏ ⵉⵏⵎⵎⴰⵍⵏ ⵉⵀⵔⵛⵏ ⵉⵥⵍⵉⵏ ⵙ ⵜⵎⴰⵣⵉⵖⵜ ⴳ ⵍⵎⵖⵔⵉⴱ, ⵢⵓⴽⵉ ⵓⵙⵖⵍ ⵏ ⵉⵎⵙⵉⵡⵍⵏ ⵏⵏⵙ ⵙ 24,8% ⴷ ⵓⵔ ⴰⵔ ⵜⵜ ⵉⵜⵜⴰⵔⴰ ⵖⴰⵙ 1,5% ⵍⵍⵉ ⴷ ⵢⵓⵛⴽⴰ ⵏⵏ ⴷⴰⵔ ⵜⵙⵎⵉⵔⵉⵜ ⵢⴰⵜⵜⵓⵢⵏ ⵏ ⵓⵖⴰⵡⴰⵙ, ⴷ ⵓⵔ ⵉⵣⵔⵉ ⵓⵟⵟⵓⵏ ⵏ ⵉⵏⵍⵎⴰⴷⵏ ⵍⵍⵉ ⵜⵜ ⵉⵜⵜⵍⵎⴰⴷⵏ 15 % , ⵀⴰ ⵏⵏ ⴰⵥⵟⵟⴰ ⴰⵎⴰⵣⵉⵖ ⵉ ⵜⵎⵓⵔⵉ – ⴰⵥⵟⵟⴰ ⴰⵎⴰⵣⵉⵖ – ⴰⵔ :

ⵜⵎⵎⴰⵍⴰ ⴰⵃⴼⵓⴼⵓ ⵏ ⵜⵙⵔⵜⴰⵢ ⵜⵓⵙⵏⵉⵍⵙⵉⵏ ⵜⵉⵎⴰⴷⴷⵓⴷⵉⵏ ⴳ ⵓⴳⵔⴰⴼ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵓⵙⴱⵓⵖⵍⵓ ⵏⵏⵙ, ⴷ ⴰⵔ ⵜⵙⵙⴽⵜⴰⵢ ⵙ ⵉⵙⵓⵜⵔⵏ ⵏⵏⵙ ⵉⵥⵍⵉⵏ ⵙ ⵓⵙⵓⵎⵓ ⵏ ⵜⵓⵜⵍⴰⵢⵜ ⴷ ⵜⵎⴰⴳⵉⵜ ⴷ ⵜⴷⵍⵙⴰ ⵏ ⵜⵎⴰⵣⵉⵖⵜ, ⴷ ⵎⴰ ⵙ ⵉⵅⵚⵚⴰ ⴰⴷ ⴼⵍⵍⴰⵙ ⴽⴽⵉⵙⵏ ⴽⵓ ⵓⵏⵓⵖⵏ ⵏ ⵓⵙⵏⵓⴽⵎⵓ ⵎⵏⴳⴰⵍ ⵉⵙⵉⵡⵍⵏ ⵏ ⵜⵎⴰⵣⵉⵖⵜ ⵉⵏⴰⵥⵓⵕⵏ ⴷ ⵓⵖⵔⵉⵎⵏ.

ⵜⵇⵇⴰⵔ ⵉ ⵜⵏⴱⴰⴹⵜ ⵜⴰⵎⵖⵔⵉⴱⵉⵢⵜ ⵃⵎⴰ ⴰⴷ ⵜⵙⵙⵓⴼⵓ ⵜⵉⵎⵔⵉⵙⵉⵏ ⵜⵉⴷⵓⵙⵜⵓⵔⵉⵏ ⵏⵏⵙ ⴰⴽⴷ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵎⴰ ⵉⵥⵍⵉⵏ ⵙ ⵓⵙⵎⵀⵍ ⵏ ⵓⴷⵔⵉⵣ ⴰⵎⴰⴷⴷⵓⴷ ⵏⵏⵙ ⴳ ⴽⵓ ⵓⴷⵎⴰⵡⵏ ⵏ ⵜⵓⴷⵔⵜ ⵜⴰⵎⴰⵜⴰⵢⵜ, ⴷ ⴰⴷ ⵜⴷⵡⵙ ⴰⵙⵏⵜⵉ ⴰⴷⵙⵜⴰⵔ ⴰⴷ, ⵙ ⴰⵢⵍⵍⵉ ⵔⴰⴷ ⵉⵃⴷⴰⵊⵊ ⵣⵉ ⵎⴰ ⵉⴳⴰⵏ ⴰⵎⴰⵜⵜⵉⵡ ⴷ ⵓⵏⴼⴳⴰⵏ ⴷ ⵜⵎⵥⵕⵉⵜ ⵜⴰⵏⴰⵎⵓⵔⵜ ⵉⵚⵃⴰⵏ ⵉⵔⴰⵏ ⴰⴷ ⵜⴱⴱⵉ ⴼ ⵓⵙⵏⵓⵃⵢⵓ ⴷ ⵓⵙⵉⵜⵜⵉ, ⴷ ⵉⵔⴰⵏ ⴰⴷ ⵜⵔⵣⵣⵓ ⵜⴰⵙⵏⴳⴰⴷⴷⴰⵢⵜ ⵏⴳⵔ ⵙⵏⴰⵜ ⵜⵓⵜⵍⴰⵢⵉⵏ ⵜⵉⵎⴰⴷⴷⵓⴷⵉⵏ.

ⵣⴳ ⵓⵙⵉⵔⴰ ⴰⵎⵣⵣⴳⴰⵔ – ⵍⵎⵖⵔⵉⴱ – 20 ⴱⵕⴰⵢⵕ 2025.