ⵕⵕⴱⴰⵟ :ⵜⴰⵙⵓⵜⵍⵜ ⵏ ⵓⵙⵎⵓⵜⵜⴳ ⵉ ⵢⵉⴳⵎⴰⵎⵏ ⴳ ⵜⵎⴰⵡⵙⴰⵙⵜ ⵏ ⵜⴽⵔⵣⴰ ⴷⴷⵓ ⵏ ⵜⵎⴰⵜⴰⵔⵜ – ⴰⵙⴷⵓⵙ ⵏ ⵓⵙⵎⵔⵙ ⵏ ⵜⵎⴰⵣⵉⵖⵜ ⴳ ⵜⵎⵙⵙⵓⴳⵓⵔⵉⵏ ⵜⵉⵎⵖⵔⵉⴱⵉⵢⵢⵉⵏ 

ⵉⵙⵏⵎⴰⵍⴰ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⴰⵙⵙ ⵏ ⵓⵙⵉⵏⴰⵙ ⴳ ⵕⵕⴱⴰⵟ ⵢⴰⵜ ⵜⵙⵓⵜⵍⵜ ⵏ ⵓⵙⵎⵓⵜⵜⴳ ⵉ ⵉⴳⵎⴰⵎⵏ ⵏ ⵜⵎⴰⵡⵙⴰⵙⵜ ⵏ ⵜⴽⵔⵣⴰ ⴷ ⵜⴳⵯⵎⵔⵜ ⵏ ⵢⵉⵍⵍ ⴷ ⵡⴰⵎⴰⵏ ⴷ ⵜⴰⴳⴰⵏⵉⵏ ⴷⴷⵓ ⵏ ⵜⵎⴰⵜⴰⵔⵜ ⵏ ⵓⵙⴷⵓⵙ ⵏ ⵓⵙⵎⵔⵙ ⵏ ⵜⵎⴰⵣⵉⵖⵜ ⴳ ⵜⵎⵙⵙⵓⴳⵓⵔⵉⵏ ⵜⵉⵎⵖⵔⵉⴱⵉⵢⵢⵉⵏ .

ⵜⴰⵙⵙⵓⵜⵍ ⴰⴷ ⵜⴳⴰ ⵜⵉⵙⵙ ⵙⵏⴰⵜ ⵏⵏⴰ ⴳ ⵉⵡⵉⵏ ⵎⴰⴷ ⵉⵜⵜⴳⴳⴰⵏ 85 ⵏ ⵓⴳⵎⴰⵎ ⴳ ⵜⵎⴰⵡⵙⴰⵙⵜ ⵙⴳ 12 ⵏ ⵜⵙⴳⴰ ⵏ ⵜⴳⵍⴷⵉⵜ , ⴳ ⵓⵙⴰⵜⵉ ⵏ ⵜⵉⵍⴰⵍ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴳ ⵉⴳⵔ ⵏ ⵓⵎⵢⴰⵡⴰⴹ ⴰⵎⵔⵙⴰⵍ .

ⴳ ⵓⵎⵔⴰⵔⴰ ⵏ ⵡⴰⵡⴰⵍ ⵏⵏⵙ ⴷ ⵉⵎⴰⵙⵙⵏ ⵏ ⵓⵙⵏⵖⵎⵙ, ⵉⵏⵏⴰ ⵓⵎⴰⵔⴰ ⴰⵎⴰⵜⴰⵢ ⵏ ⵜⵎⴰⵡⵙⴰⵙⵜ ⵏ ⵜⴽⵔⵣⴰ ⴷ ⵜⴳⵯⵎⵔⵜ ⵏ ⵢⵉⵍⵍ ⴷ ⵡⴰⵎⴰⵏ ⴷ ⵜⴰⴳⴰⵏⵉⵏ ⵎⴰⵙⵙ ⵕⴹⵡⴰⵏ ⵄⵕⵕⴰⵛ, ⵎⴰⵙⴷ ⴰⵎⵓⵙⵙⵓ ⴰⴷ ⵉⴷⴷⴰⴷ ⵙⴳ ⵜⵎⵢⴰⵇⵇⴰⵏⵜ ⴳⵔ ⵜⵎⴰⵡⵙⴰⵙⵜ ⴷ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵏⵏⴰ ⵎⵓ ⵉⴳⴰ ⵓⵡⵜⵜⴰⵙ ⵏⵏⵙ ⴰⵙⴷⵓⵙ ⵏ ⵓⵣⵣⵓⴳⵣ ⵏ ⵓⵙⵎⵔⵙ ⴷ ⵜⵓⵏⵚⵉⴱⵜ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵜⵎⵙⵙⵓⴳⵓⵔⵉⵏ ⵜⵉⵏⴰⵎⵓⵏⵉⵏ ⴷ ⵓⵙⵙⵡⵀⵏ ⵏ ⵜⵏⴰⴼⵓⵜⵉⵏ ⵏ ⵉⵎⵙⵎⵔⵙⵏ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ .

ⵉⵏⵏⴰ ⵎⴰⵙⵙ ⵄⵕⵕⴰⵛ ⵎⴰⵙⴷ ⴰⵡⵜⵜⴰⵙ ⵏ ⵜⵎⵢⴰⵇⵇⴰⵏⵜ ⴰⴷ ⵉⴳⴰ ⵜ ⵓⵙⵎⵓⵜⵜⴳ ⵏ ⵉⵎⵙⵡⵡⵓⵔⵉⵏ ⴳ ⵉⴳⵔ ⵏ ⵓⵎⵢⴰⵡⴰⴹ ⴷ ⵓⵙⵓⵖⵍ, ⴰⴼⴰⴷ ⴰⴷ ⵉⴷⵓⵙ ⵓⵎⵢⴰⵡⴰⴷ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ , ⵉⵏⵏⴰ ⵎⴰⵙⴷ ⵜⴰⵙⵓⵜⵍⵜ ⴰⴷ ⵏ ⵓⵙⵎⵓⵜⵜⴳ ⵔⴰⴷ ⵜⵙⵙⴷⵓⵙ ⴰⵎⵢⴰⵡⴰⴷ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵙ ⵓⵙⴽⴽⵉⵔ ⵏ ⵓⵙⵙⵓⵜⵔ ⵏ ⵉⵎⴽⵔⴰⵣⵏ ⴷ ⵉⵎⵣⴷⴰⵖ ⵏ ⵓⴳⴰⵎⴰ ⵙ ⵓⵎⴰⵜⴰ .ⴳ ⵜⵙⴳⴰ ⵏⵏⵙ , ⵉⵏⵏⴰ ⵓⵏⴼⵍⵓⵙ ⴰⵎⴰⵜⴰⵢ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵎⴰⵙⵙ ⵍⵃⵓⵙⴰⵢⵏ ⵍⵎⵓⵊⴰⵀⵉⴷ, ⴳ ⵓⵎⵔⴰⵔⴰ ⵏ ⵡⴰⵡⴰⵍ ⵏⵏⵙ ⴷ ⵓⵙⵏⵖⵎⵙ , ⵎⴰⵙⴷⴷ ⵜⴰⵙⵙⵓⵜⵍⵜ ⴰⴷ ⵏ ⵓⵙⵎⵓⵜⵜⴳ ⵏⵏⴰ ⵉⴳⴰⵏ ⵜⵉⵙⵙ ⵙⵏⴰⵜ ⵔⴰⴷ ⵜⴰⵡⵙ ⵉ ⵉⵎⵙⵡⵡⵓⵔⵉⵏ ⵏⵏⴰ ⵙⴰⵡⴰⵍⵏⵉⵏ ⵜⵓⵜⵍⴰⵢⵜ ⵢⴰⴷⵏ ⴱⵍⴰ ⵜⴰⵎⴰⵣⵉⵖⵜ .

ⵉⵏⵏⴰ ⵎⴰⵙⴷⴷ ⴰⵎⵓⵙⵙⵓ ⴰⴷ ⵉⴷⴷⴰⴰⴷ ⴳ ⵓⵙⴰⵜⵉ ⵏ ⵜⵣⵎⵔⵜ ⵏ ⵜⵏⴱⴰⴹⵜ ⴰⴼⴰⴷ ⴰⴷ ⵜⵙⵙⵏⵚⴱ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵜⵎⵔⵙⴰⵍ ⵜⵉⵏⴰⵎⵓⵏⵉⵏ , ⵉⵣⴰⵢⴷ ⵉⵏⵏⴰ ⵎⴰⵙⴷⴷ ⴰⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜⵉⵙⴽⵔ ⴽⵉⴳⴰⵏ ⵏ ⵜⵎⵢⴰⵇⵇⴰⵏⵉⵏ ⵏⵏⴰ ⵉⵡⵜⵙⵏ ⴰⵙⴷⵓⵙ ⴷ ⵓⵙⴱⵓⵖⵍⵓ ⵏ ⵓⵙⵎⵓⵜⵜⴳ ⴳ ⵉⴳⵔ ⵏ ⵓⵙⵓⵖⵍ ⴷ ⵓⵎⵢⴰⵡⴰⴷ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ , ⴷ ⵓⴹⴼⵓⵔ ⵏ ⵜⵎⵔⵙⴰⵍ ⴳ ⵉⴳⵔ ⵏ ⵜⵉⴽⴽⵉ ⵏ ⵜⵎⵍⴷⵉⵡⵉⵏ ⵏ ⵜⵡⵡⵓⵔⵉ ⵉ ⵉⵏⴰⴼⵓⵖⵏ ⵏ ⵜⵙⴷⴰⵡⵉⵜⵉⵏ ⵜⵉⵎⵖⵔⵉⴱⵉⵢⵢⵉⵏ ⴳ ⵉⴳⵔ ⴰⴷ .

ⴰⵀⵉⵍ ⵏ ⵜⵙⵙⵓⵜⵍⵜ ⴰⴷ ⴳⵉⵙ ⵉⴼⵙⴰⵔⵏ ⵏ ⵉⵙⵍⵎⴰⴷⵏ ⴳ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜⵉⵣⴷⵉⵏ ⴷ ⵓⵏⴱⴱⵕ ⵏ ⵡⴰⵎⴰⵏ ⵏ ⵓⵙⵙⵓ ⵏ ⵓⵥⵓⵜⵏ ⴷ ⵓⵏⵎⴰⵍⴰ ⴰⴽⵔⵣⴰⵏ ⴳ ⵓⵥⵏⵉⴳ ⴰⵎⵖⵔⵉⴱⵉ, ⴷ ⵜⵎⴰⵣⵉⵖⵜ ⴳ ⵡⴰⵢⴷⴰ ⵓⵟⵟⵓⵏⴰⵏ , ⴷ ⵓⵙⵙⵍⵎⴷ ⵏ ⵜⵉⵜⵉⵇⵏⵉⵢⵢⵉⵏ ⵏ ⵓⵙⵓⵖⵍ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵜⵙⴽⵍⴰ ⵜⴰⵎⴰⵣⵉⵖⵜ ⴰⵡⴷ ⵏⵜⵜⴰⵜ ⵙⴳ ⵜⵎⵉⵡⴰⵏⵜ ⴰⵔ ⵜⵉⵔⵔⴰ .