ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵙⵖⴰⵏ ⵏ ⵜⵏⴼⵔⵓⵜ : ⵜⵉⴳⵉⵔⴰ ⵏ ⵓⵙⵎⵓⵜⵜⴳ ⵏ ⵉⵙⵎⴰⵜⵜⴰⴳⵏ/ⵜⵙⵎⴰⵜⵜⴰⴳⵉⵏ ⴳ ⵉⴷⵔⴰⵙⵏ ⵏ ⵉⵎⵙⵜⴳⴳⴰⵔⵏ/ⵜⵎⵙⵜⴳⴳⴰⵔⵉⵏ ⵏ ⵓⵣⵣⴳⵉⵔ ⵏ ⵓⵙⵍⴳⵏ ⵅⴼ ⵜⵎⵣⵡⴰⴳⵜ ⴷ ⵉⵣⵔⴼⴰⵏ ⵏ ⵜⵎⵣⵡⴰⴳⵉⵏ/ⵉⵎⵣⵡⴰⴳⵏ

ⴳ ⵡⵓⵙⵙⴰⵏ ⵇⴰⵃ ⵏ ⵉⵎⴰⵍⴰⵙⵙ, ⵙⴳⵎⴹⵏⵜ ⵙⵏⴰⵜ ⵜⵎⵔⵙⴰⵍ, ⵜⵉⵏ ⵉⵣⵔⴼⴰⵏ ⴷ ⵜⵏⴼⵔⵓⵜ, ⵅⴼ ⵓⵙⵎⵀⵍ ⵏ ⵢⴰⵜ ⵜⵎⵙⴽⵔⵜ ⵜⴰⵎⴰⵢⵏⵓⵜ ⵉⵖⵓⴷⴰⵏ ⴳ ⵓⵎⵢⴰⵖ ⵏ ⵍⵎⵖⵔⵉⴱ ⴷ ⵜⵎⵔⵙⴰⵍ ⵏⵏⵙ ⴰⴽⴷ ⵉⵙⵖⵍⴰⴼ ⵉⵣⵔⴼⴰⵏⵏ ⵉⵏⵎⵜⵜⴰⵏ.

ⵎⴽⴰⴷ, ⴳ ⵓⵙⴰⵜⵉ ⵏ ⵓⵙⵎⵀⵍ ⵏ ⵓⵙⵖⵍⴼ ⵏ ⵜⵙⵇⵇⵉⵎⵜ ⵜⴰⵏⵎⵜⵜⴰⵏⵜ ⵉⵥⵍⵉⵏ ⵙ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵇⴰⵃ ⵉⵎⵙⵡⵓⵔⵉⵢⵏ ⵉⵎⵣⵡⴰⴳⵏ ⴷ ⵓⴼⵔⵉⴷⵏ ⵏ ⵜⵡⵊⵉⵡⵉⵏ ⵏⵏⵙⵏ, ⵉⵙⵡⵓⵔⵉ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵎⵀⵍⴰ ⵜⴰⵎⴰⵜⴰⵢⵜ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ, ⵙⴳ 24 ⴰⵔ 28 ⴱⵕⴰⵢⵕ 2025, ⵅⴼ ⵓⵙⵎⵓⵜⵜⴳ ⵏ ⵉⵙⵎⴰⵜⵜⴰⴳⵏ/ⵜⵙⵎⴰⵜⵜⴰⴳⵉⵏ ⴳ ⵉⴷⵔⴰⵙⵏ ⵏ ⵉⵎⵙⵜⴳⴳⴰⵔⵏ ⵙ ⵓⵣⵣⴳⵉⵔ ⵏ ⵓⵙⵍⴳⵏ ⵅⴼ ⵓⵙⵏⵜⵍ “ⵉⵣⵔⴼⴰⵏ ⵏ ⵓⴳⴳⵉⴷⵏ ⴳ ⵡⴰⴷⴷⴰⴷⵏ ⵏ ⵜⵎⵣⵡⴰⴳⵜ: ⵜⵉⵎⵔⵉⵙⵉⵏ ⵜⵉⴳⵔⴰⵖⵍⴰⵏⵉⵏ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵓⵙⴰⵜⵉ ⴰⵏⴰⵎⵓⵔ ⵏ ⵓⴼⵔⴰⴳ”.

ⴳ ⵜⴳⵉⵔⴰ ⵏ ⵓⵙⵎⵓⵜⵜⴳ, ⴰⵙⵙ ⵏ ⵓⵙⵉⵎⵡⴰⵙ 28 ⴱⵕⴰⵢⵕ, ⴳ ⵓⵙⵉⵏⴰⴳ ⵏ ⵕⵕⴱⴰⵟ ⴷⵔⵉⵙ ⴱⵏⵣⴽⵔⵉ ⵉ ⵉⵣⵔⴼⴰⵏ ⵏ ⵓⴼⴳⴰⵏ, ⵜⵙⴷⴷⵉⴷ ⵎⴰⵙⵙⴰ ⴰⵎⵉⵏⴰ ⴱⵓⵄⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵅⴼ ⵡⴰⵜⵉⴳ ⵏ ⵜⵙⵏⵜⴰⵢⵜ ⴰⴷ, ⵎⴰⵛⵉ ⵖⴰⵙ ⵉ ⵓⵙⵎⵀⵍ ⵏ ⵓⵙⵖⵍⴼ ⴰⵣⵔⴼⴰⵏ ⴰⵏⵎⵜⵜⴰⵏ, ⵎⴰⵛⴰ ⵙ ⵓⴼⵍⵙ ⵏ ⵙⵏⴰⵜ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ, ⵢⴰⵜ ⵜⴰⵣⵔⴼⴰⵏⵜ ⴷ ⵜⴰⵢⵢⴰⴹ ⵜⴰⵏⴼⵔⵓⵏⵜ, ⵙ ⵓⵙⵉⵣⵡⵔ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵜⵎⵣⵡⴰⴳⵉⵏ ⴷ ⵉⵎⵣⵡⴰⴳⵏ, ⴷ ⵓⵙⵖⵓⵏ ⵉⵛⵛⴰⵔⵏ ⵉ ⵓⵙⴷⵓⵙ ⵏ ⵉⵎⴰⵙⵙⵏ ⵏ ⵓⴼⵔⴰⴳ ⵏ ⵜⵎⵣⵡⴰⴳⵉⵏ/ⵉⵎⵣⵡⴰⴳⵏ ⴷ ⵓⴹⵎⴰⵏ ⵏ ⵉⵣⵔⴼⴰⵏ ⵏⵏⵙⵏ ⴷ ⵜⵓⴳⴳⴰⵥⵔ ⵏ ⵡⴰⴷⴷⵓⵔ ⵏⵏⵙⵏ.

ⵉⵙⵙⵉⵜⴳ ⵓⵙⵇⵇⵉⵎ, ⴳ ⵜⴳⵓⵔⵉ ⵏ ⵜⵏⵙⵙⵉⵅⴼⵜ ⵏⵏⵙ, ⵜⵉⵔⴰⵜ ⴷ ⵓⵙⵖⵓⵏ ⵉⵜⵜⵓⵙⵎⴰⵍⵏ ⴷ ⵉⵜⵜⵓⵙⴼⴼⵏⵥⴰⵢⵏ ⵏ ⵜⵎⵀⵍⴰ ⵜⴰⵎⴰⵜⴰⵢⵜ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⴳ ⵓⵙⴷⵓⵙ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⴰⴽⴽⵯ ⵜⵙⵖⴰⵏ ⵏ ⵜⵏⴼⵔⵓⵜ… ⴰⵙⵎⵓⵜⵜⴳ ⴰⴷ, ⵜⵏⵏⴰ ⵎⴰⵙⵙⴰ ⴱⵓⵄⵢⵢⴰⵛ, ⴷ ⵓⵎⴷⵢⴰ ⵢⴰⴹⵏ ⵏ ⵜⵎⴷⵔⴰⵡⵜ ⵉⴷⵓⵙⵏ ⵉⵙⵎⵓⵏⵏ ⵜⵉⵎⵔⵙⴰⵍ ⵙ ⵙⵏⴰⵜ… ⴷⴰⵜ ⴰⴷ ⴷ ⵜⵡⵔⵔⵉ ⵜⵏⵏⴰ ⵎⴰⵙ ⵉⵍⵍⴰ ⵓⵙⵎⵀⵍ, ⴳ ⵜⵎⴷⵔⴰⵡⵜ ⴰⴷ, ⵏ ⵢⴰⵏ ⵓⵎⴰⴳⵔⴰⴷ ⴰⴷⵙⵜⴰⵔ ⴰⵙⴼⴼⵏⵥⴰⵢ ⵉⵇⵇⴰⵔⵏ ⵙ ⵓⵎⵢⴰⵡⴰⵙ ⵏ ⵜⵎⵔⵙⴰⵍ.

ⵜⴰⴳⴳⴰⵍⵜ ⵏ ⵍⵎⵖⵔⵉⴱ ⴰⵙⵙⴰ, ⵜⵔⵏⴰ, ⵜⵍⵍⴰ ⴳ ⵎⴰⵙ ⴷⴰ ⵏⵙⵡⵓⵔⵉ ⴳ ⵜⵎⵔⵙⴰⵍ ⵏⵏⵖ, ⵏⵥⴹⴰⵕ ⴰⴷ ⵏⵎⵣⴰⵔⴰⵢ ⵉⵜⵙⵏⵜ ⵜⵉⴽⴽⴰⵍ ⴳ ⵜⴰⵏⵏⴰⵢⵉⵏ, ⵎⴰⵛⴰ ⴷⴰ ⵏⵜⵜⵎⴹⴰⴽⴰⵕ, ⴷⴰ ⵏⵜⵜⵎⵢⴰⵖ ⴷ ⴷⴰ ⵜⵜⵎⵢⴰⵡⴰⵙⵏⵜ, ⴽⵓ ⵢⴰⵜ ⴳ ⵓⵙⴰⵜⵉ ⵏ ⵜⵡⵓⵔⵉⵡⵉⵏ ⵏⵏⵙ, ⴰⴼⴰⴷ ⴰⴷ ⵏⴰⵡⴹ ⵉⵡⵜⵜⴰⵙⵏ ⴷ ⵉⵙⵉⵣⵡⵉⵔⵏ ⵉⵅⴰⵜⴰⵔⵏ, ⴳ ⵓⵎⵣⵡⴰⵔⵓ ⵏⵏⵙⵏ ⴰⵙⴷⵓⵙ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⴽⵔⴰ ⵙⵔⵙⵏ.

ⵙⴳ ⵜⵙⴳⴰ ⵏⵏⵙ, ⵢⵓⵍⵙ ⵎⴰⵙⵙ ⴰⵃⵎⴰⴷ ⴰⵢⵜ ⵟⵟⴰⵍⴱ, ⵍⵡⴰⵍⵉ ⵏ ⵜⵏⴼⵔⵓⵜ ⴳ ⵜⵎⵀⵍⴰ ⵜⴰⵎⴰⵜⴰⵢⵜ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ, ⵉⵙⴷⴷⵉⴷ ⵅⴼ ⵡⴰⴷⴷⵓⵔ ⵏ ⵜⵎⴷⵔⴰⵡⵜ ⴰⴽⴷ ⵜⵎⵔⵙⵍⵜ ⵜⴰⵏⴰⵎⵓⵔⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴰⴼⴰⴷ ⴰⴷ ⵉⵜⵜⵓⵙⴷⵓⵙ ⵓⴼⵔⴰⴳ ⴰⴷ ⴳ ⴰⴽⴽⵯ ⵜⵉⵙⵖⴰⵏ ⵏ ⵜⵏⴼⵔⵓⵜ ⴷ ⵓⵙⵖⵓⴷⵓ ⵏ ⵜⵉⵍⴰⵍⵜ ⵏ ⵓⵙⵇⵇⵉⵎ ⴷ ⵜⵎⵓⵣⴰⵢⵉⵏ ⵏⵏⵙ ⴷ ⵓⵎⵢⴰⵡⴰⵙ ⴷⵉⴷⵙ.

ⴰⵙⴷⵓⵙ ⵏ ⵜⵣⵎⵎⴰⵔ ⵏ ⵉⵎⵙⵖⴰⵏⵏ ⵏ ⵜⵏⴼⵔⵓⵜ, ⵉⵏⵏⴰ ⵓⴳⵏⵙⴰⵙ ⵏ ⵜⵎⵀⵍⴰ ⵜⴰⵎⴰⵜⴰⵢⵜ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ, ⵓⵔ ⵉⴳⵉ ⵖⴰⵙ ⴰⵙⵎⵎⴰⵍ ⴷ ⵓⵙⴼⵔⴽ ⵙ ⵉⵣⵔⴼⴰⵏ, ⵎⴰⵛ ⵢⵓⵎⴰ ⴰⵡⴷ ⴰⵙⵣⵎⵔ ⵏⵏⵙⵏ ⵙ ⵜⵎⵓⵣⴰⵢⵉⵏ ⴷ ⵜⵓⵙⵙⵏⵉⵡⵉⵏ ⵜⵓⵙⵏⵉⵙⵉⵏ ⵉⵙⴷⵓⵙⵏ ⵜⴰⵎⵢⴰⴷⴰⵙⵜ ⵜⴰⵣⵔⴼⴰⵏⵜ ⴳ ⵜⵓⵥⵥⵓⵎⵜ ⵏ ⵜⵙⵖⵏⵜ ⵏ ⵜⵏⴼⵔⵓⵏⵜ.

“ⵜⵙⵎⴷⵢⴰ ⵜⵎⴷⵔⴰⵡⵜ ⵉⵙⵙⴼⴽⴰⵏ ⵏⴳⵔ ⵜⵎⵀⵍⴰ ⵜⴰⵎⴰⵜⴰⵢⵜ ⴷ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴰⵡⵜⵜⴰⵙ ⴰⴷ”, ⵉⵙⴷⴷⵉⴷ ⵎⴰⵙⵙ ⴰⵢⵜ ⵟⵟⴰⵍⴱ, ⴷⴰⵜ ⴰⴷ ⵉⵔⵏⵓ ⵎⴰⵙ ⴰⵣⵔⴰⴽ ⴷ ⵓⵎⵓⵙⵙⵓ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵢⴰⵏ ⵓⴼⵔⴷⵉⵙ ⴰⴷⵙⵍⴰⵏ ⴳ ⵓⵙⵡⵓⴷⴷⵓ ⵏ ⴰⴽⴽⵯ ⵜⵎⵀⴰⵍ ⵏ ⵜⵏⴼⵔⵓⵜ, ⵎⴰⵢⴰ ⵏⵏ ⴰ ⵅⴼ ⵉⵅⵚⵚⴰ ⴰⴷ ⵜⵜⵓⵙⵉⴷⴼⵏⵜ ⵙ ⵜⵡⵉⵍⴰ ⵜⵓⵙⵎⵉⴷⵜ ⴷ ⵜⵍⴳⴷⵉⵙⵜ ⴳ ⴰⴽⴽⵯ ⵜⵎⵙⴽⵔⵉⵏ ⵜⵉⵣⵣⵓⵍⴰⵏⵉⵏ ⵜⵉⴽⵓⵢⴰⵙⵙⵉⵏ.

ⴳ ⵓⵎⵢⴰⵖ ⴷ ⵓⵎⴹⴰⴽⴰⵕ, ⵉⵙⴷⴷⵉⴷ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵎⵀⵍⴰ ⵜⴰⵎⴰⵜⴰⵢⵜ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⵅⴼ ⵉⵡⵉⵣ ⵏⵏⵙⵏ ⵅⴼ ⵓⵣⴷⴰⵢ ⵏ ⵓⵣⵣⴳⵉⵔ ⵏ ⵜⵎⵢⴰⵇⵇⴰⵏⵜ ⵏ ⵜⵎⴷⵔⴰⵡⵜ ⴷ ⵓⵎⵢⴰⵡⴰⵙ ⴷ ⵓⵙⴷⵓⵙ ⵏⵏⵙ ⴷ ⵓⵙⵡⵓⵔⵉ ⵉⵛⵛⴰⵔⵏ ⴰⴼⴰⴷ ⴰⴷ ⵜⴱⵓⵖⵍⵓ ⵜⵡⵓⵔⵉ ⵏ ⵓⵏⴰⴳⵔⴰⵡ ⵏ ⵜⵏⴼⵔⵓⵏⵜ ⵙ ⵎⴰⴷ ⵉⵎⵙⴰⵙⴰⵏ ⴷ ⵉⵎⵏⵣⴰⵢⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ.

ⵙⴳ ⵜⵙⴳⵉⵡⵉⵏ ⵏⵏⵙⵏ, ⵙⵙⵉⵜⴳⵏ(ⵜ) ⵉⵎⴷⵔⴰⵡⵏ/ⵜⵉⵎⴷⵔⴰⵡⵉⵏ ⴳ ⵜⵙⵓⵜⵍⵜ ⴰⴷ ⵏ ⵓⵙⵎⵓⵜⵜⴳ ⴰⵙⴰⴷⵎⵔ ⵏ ⵓⵖⴰⵡⴰⵙ ⵉ ⵉⵏⵣⴳⵓⵎⵏ ⵏⵏⵙⵏ ⴷ ⵜⵡⵓⵔⵉ ⵏⵏⵙⵏ ⵖ ⵓⴱⴰⵔⴰⵣ, ⴷ ⵓⵍⴰ ⴰⵖⵓⴷⵓ ⵏ ⵓⵎⵢⴰⵖ ⴳ ⵉⵎⴰⵍⴰⵙⵙ ⵇⴰⵃ ⵏⴳⵔ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⴼⵔⵓⵜ. ⵜⵙⴱⵔⵔⴽ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵎⴳⴳⴰⵔⵓ ⵏ ⵓⵙⵎⵓⵜⵜⴳ ⴰⵙⵖⵓⵏ ⵏ ⵉⵎⴷⵔⴰⵡⵏ/ⵜⵉⵎⴷⵔⴰⵡⵉⵏ ⵙ ⵓⵙⵎⵓⵜⵜⴳ ⴷ ⵜⵉⵔⴰⵜ ⵏⵏⵙⵏ ⴳ/ⴷ ⵓⵙⵖⵉⵡⵙ ⵏⵏⵙⵏ ⵏ ⵓⴱⵟⵟⵓ ⵏ ⵓⵎⵄⵉⵏⵏ ⵏⵏⵙⵏ ⴰⴽⴷ ⵉⵎⴷⴷⵓⴽⴰⵍ ⵏⵏⵙⵏ ⴳ ⵜⵡⵓⵔⵉ. ⵎⴽⴷⴰ ⵉⵙⴱⵔⵔⴽ ⵓⵙⵇⵇⵉⵎ ⴷ ⵜⵎⵀⵍⴰ ⵙ ⵜⵙⵓⵎⴰⵔ ⵏⵏⵙⵏ, ⵏⵏⵉ ⵔⴰⴷ ⵜⵎⴹⴰⴽⴰⵕ ⵜⵙⵇⵇⵉⵎⵜ ⵉⵛⵛⴰⵔⵏ ⴰⵙⵎⵀⵍ ⵏⵏⵙⵏⵜ ⴳ ⵜⵙⵓⵜⵍⵉⵏ ⵜⵉⵏⴹⴼⴰⵕⵉⵏ.