ⴼⵉⵏⵉⴽⵙ ⵏ ⵜⵎⴰⵣⵉⵖⵜ (1) ..FINIKS N TMAZIGHT (1)

ⵎⴰⴷ ⴳⴰⵏ ⵜⵉⵙⴰⵍⵉⵡⵉⵏ ⵉɣⵉⵏ ⴰⴷ ⴰⵡⵙⵏ ⴰⵙⴷⴷⵔ ⴷ ⵓⵣⵓⵣⵣⵔ ⵏ ⵜⵎⴰⵣⵉɣⵜ ⵙ ⵜⴰⵣⵣⵍⴰ ⴷ ⵓⵙⵡⵓⵔⵉ ⵏⵏⵙ ⴷⴰⵔ ⴰⵎⴰⵜⴰ ⵏ ⵎⴷⴷⵏ ⵉⵎⵔⵔⵓⴽⵉⵏ?

ⵜⴰⵎⴰⵣⵉɣⵜ ⵜⴻⵜⵜⵡⴰⵙⵙⵏ ⵙ ⵜⵉⵥⵉⵍⵜ ⵜⴰⴳⵔⴹⴰⵏⵜ. Mⴰⵛⴰ ⵙⵓⵍ ⵉⵅⵚⵚⴰ ⴰⴷ ⵏⵔⴰⵔ ⵜⴰɣⴹⴼⵜ ⵉ ⵓⵥⴰⵡⴰⵏ ⴳ ⵓⵙⵜⵓⵜⵍⵉ ⵏ ⵉⵡⴰⵍⵉⵡⵏ ⵏⵏⵅ. ⵉⵅⵚⵚⴰ ⴰⴷ ⵏⵙⴼⵔⵓ ⴰⵡⴰⵍ ⵏⵏⵅ ⵉ ⵡⵉⵢⵢⴰⴹ, ⴰⴷ ⵏⴳⴳ ⵜⴰⵎⵙⵙⵓⵎⴰⵏⵜ ⵃⵎⴰ ⴰⴷ ⵏⵔⵎⵙ ⴰⵡⴰⵍ ⵏⵏⵙⵏ. ⵉⵚⵃⴰ ⵓⵢⴰ ⴰⵡⴷ ⴳ ⵉⵎⵓⵔⴰⴳ ⴷ ⵜⵍɣⴰⵜⵉⵏ, ⴷ ⵓⵎⵙⴰⵡⴰⵍ ⵏ ⴽⵓⵢⴰⵙⵙ. ⵓⵔⴰ ⵉⵜⵜⵢⴰⵡⴰⴹ ⵡⴰⵡⴰⵍ ⵏ ⵉⵎⴷⵢⴰⵣⵏ ⵏɣⴷ ⵜⵉⴳⵓⵔⵉⵡⵉⵏ ⵏ ⵜⵍɣⴰⵜⵉⵏ ⵉⵍɣⵉⵏ ⵓⵍⴰ ⵉⵎⵜⵜⵉⵏ ⴰⵎⵎⴰⵙ ⵏ ⵓⵥⴰⵡⴰⵏ ⴷ ⵉɣⵓⵢⵢⴰⵏ.

ⵉⵥⵉⵍ ⵓⵍⵎⵎⵓⴷ ⵏ ⵜⵊⵔⵔⵓⵎⵜ ⴷ ⵓⵙⴼⵜⵉ, ⵎⴰⵛⴰ ⵢⵓⴳⵔ ⴰⵙⵏ ⵎⴰⵔⵔⴰ ⵓⵍⵎⵎⵓⴷ ⵏ ⵓⵎⵢⴰⵡⴰⴹ. ⴰⵎⴰⵜⴰ ⵏ ⵎⴷⴷⵏ ⵍⴰ ⵔⵣⵣⵓⵏ ⵅⴼ ⵜⵓⵙⵙⵏⴰ ⵏ ⵓⵎⵢⴰⵡⴰⴹ ⵙ ⵜⵓⵜⵍⴰⵢⵜ ⵜⴰⵎⴰⵣⵉɣⵜ. ⵓⵔ ⴱⴰⵀⵔⴰ ⵙⵉⴳⴳⵉⵍⵏ ⵅⴼ ⵉⵍⵓɣⵎⴰ ⵏ ⵜⵊⵔⵔⵓⵎⵜ.

ⵉⵇⵇⴰⵏ ⴰⵅ ⴰⴷ ⵏⵙⵙⴰⵡⵍ ⵅⴼ ⵜⵎⴰⵣⵉɣⵜ ⵙ ⵜⵎⴰⵣⵉɣⵜ, ⴰ ⵏⵙⵙⵏⵎⴰⵍⴰ ⵉⵎⵃⵉⵣⵡⴰⵔⵏ ⴳ ⵜⵥⵓⵔⵉ ⴷ ⵜⵉⵥⵉⵍⵜ ⵏ ⵓⵎⵢⴰⵡⴰⴹ ⵉⵜⵜⵓⵥⵍⵉⵏ ⵙ ⵉⵥⴹⵡⴰⵏ ⵉⵏⴰⵎⵓⵏⵏ ⵏ ⵓⵏⵢⴰⵍⴽⴰⵎ ⴷ ⵜⵓⴷⵔⵜ ⵜⴰⴽⵓⵢⴰⵙⵜ.

ⵉⵇⵇⴰⵏ ⴰⵅ ⴰⴷ ⵏⵙⵡⵓⵔⵉ ⵙ ⵉⵙⴽⴽⵉⵍⵏ ⵉⵜⵜⵡⴰⵙⵏⵏ ⴷⴰⵔ ⴰⵎⴰⵜⴰ ⵏ ⵎⴷⴷⵏ ⵏ ⵛⴰⵏ ⵓⴳⵔⴰⵡ, ⵜⴰⵎⴰ ⵏ ⵜⴼⵉⵏⴰɣ. ⵜⵓⵜⵍⴰⵢⵜ ⵜⴰⵎⴰⵣⵉɣⵜ ⵜⵙɣⴰⵡⵙⴰ ⵉ ⵇⴰⵃ ⵉɣⴱⵓⵍⴰ ⵏⵏⴰ ⴰⵙ ⴰⴽⴽⴰⵏ ⵜⵓⴷⵔⵜ.

ⵉⵅⵙⴰ ⴰⵅ ⴰⴱⴷⴰ ⴰⴷ ⵏⵣⵡⵓⵔ ⵙ ⵜⵎⴰⵣⵉɣⵜ ⴳ ⵓⵎⵙⴰⵡⴰⵍ ⵏⵏⵅ ⴰⵎⵎⴰⵙ ⵏ ⵉⴷɣⴰⵔⵏ ⵉⴳⴷⵓⴷⴰⵏⵉⵏ ⴷ ⵓⵙⵏɣⵎⵙ.

ⵉⵇⵇⴰⵏ ⴰⵅ ⴰ ⵏⴽⴽⵙ ⵉⴼⵔⴰⴳⵏ ⵉⵜⵜⵓⵚⴽⴰⵏ ⵏⴳⵔ ⵉⵏⴰⵡⵏ ⵏ ⵜⵎⴰⵣⵉɣⵜ. ⵢⵓⴼ ⴰⵅ ⴰⴷ ⵏⵎⵙⴰⵡⵍ ⵙ ⵜⵎⴰⵣⵉɣⵜ ⵏⴳⵔ ⵉⵎⴰⵣⵉɣⵏ ⵉⵙⵙⴰⵡⵍⵏ ⵙ ⵜⵔⵉⴼⵛⵜ ⵏɣⴷ ⵜⵛⵍⵃⵉⵜ ⵏɣⴷ ⵜⵎⴰⵣⵉɣⵜ ⵏ ⴰⵟⵍⴰⵙ. ⴰⴷɣⴰⵔ ⵏ ⵓⵙⵡⵓⵔⵉ ⵏ ⵉⴼⵙⵙⴰⵢⵏ ⵉⵏⴳⴳⵓⵔⴰ, ⵍⵍⵉ ⴳⴰⵏ ⴰⵎⵙⴰⵡⴰⵍ ⵙ ⵜⵓⵜⵍⴰⵢⵜ ⵢⴰⴹⵏⵉⵏ.

ⵎⴰⴷ ⴰⵅ ⵉⵅⵚⵚⴰ ⵃⵎⴰ ⴰⴷ ⵏⵙⵜⵓⵜⵍⵉ ⵙ ⵜⵎⴰⵣⵉɣⵜ ⴳ ⵉⵣⵎⴰⵣ ⵏ ⵓⵣɛⴰⴼ ⵉⵎⵇⵇⵓⵔⵏ ⵏⵖⴷ ⵉⵣⵎⴰⵣ ⵏ ⴰⵎⵉⵔⵉ ⴰⴽⵙⵡⴰⵜ. ⵓⵍⴰ ⴰⴷ ⵙⵔⵙ ⵏⵙɣⵓⵢⵢⵓ ⴰⴼⴰⴷ ⴰⴷ ⴰⵅ ⵉⵙⵙⴼⵍⴷ ⵓⵊⴻⵏⵏⴰ. ⵓⵍⴰ ⴰⴷ ⵏⵙⵡⵉⵏⴳⵎ ⵙ ⵜⵎⴰⵣⵉɣⵜ ⵓⵍⴰ ⴰⴷ ⵏⴳⵎⴳⵎ ⴰⴽⴷ ⴱⵓ-ⵉⵜⵔⴰⵏ ⵙ ⵜⵎⴰⵣⵉɣⵜ?

ⴰⴷ ⵓⵔ ⴰⴽ ⵉⵙⵙⵓⵙⵎ ⵡⴰⴷⴷⴰⴷ ⵉⵙ ⵜⵓⴼⵉⵜ ⵛⴰⵏ ⵜⴰⵜⵜⵓⵜ ⵏɣⴷ ⵓⴽⵓⵙ ⵏ ⵜⵎⴰⵣⵉɣⵜ ⴳ ⵡⴰⵡⵏⴰⴹ ⵓⵍⴰ ⴳ ⵇⴰⵃ ⵜⵉⵡⵍⴰⴼⵉⵏ ⵏ ⵜⵓⴷⵔⵜ ⵏ ⵜⵎⴰⵣⵉⵔⵜ! Yⵓⴷⵙ ⴰⵅ ⴰⴷ ⵏⵙⵙⵏⴼⵍ ⵜⴰⵎⴰⵣⵉɣⵜ, ⴰ ⵜⵜ ⵏⵣⵍⵍɛ ⵙ ⵊⴰⵊ ⵓⵍⴰ ⴱⴻⵕⵕⴰ.

Mad gan tisaliwin iɣin ad awsen asedder d uzuzzer n tmaziɣt s tazzla d uswuri nnes dar amata n medden imerrukin?

Tamaziɣt tettwassen s tiẓilt tagerḍant. Maca sul ixṣṣa ad nrar taɣḍeft i uẓawan g ustutli n iwaliwen nnex. Ixṣṣa ad nesfru awal nnex i wiyyaḍ, ad negg tamssumant ḥma ad nermes awal nnesn. Iṣḥa uya awd g imurag d telɣatin, d umsawal n kuyass. Ura ittyawaḍ wawal n imedyazen nɣd tiguriwin n telɣatin ilɣin ula imettin ammas n uẓawan d iɣuyyan.

Iẓil ulemmud n tjerrumt d usefti, maca yuger asn marra ulemmud n umyawaḍ. Amata n medden la rezzun xef tussena n umyawaḍ s tutlayt tamaziɣt. Ur bahra siggilen xef iluɣma n tjerrumt.

Iqqan ax ad nessawel xef tmaziɣt s tmaziɣt, ad nessnmala imḥizwarn g tẓuri d tiẓilt n umyawaḍ ittuẓlin s iẓḍwan inamunen n unyalkam d tudert takuyast.

Iqqan ax ad neswuri s isekkilen ittwasnen dar amata n medden n can ugraw, tama n Tfinaɣ. Tutlayt tamaziɣt tesɣawsa i qaḥ iɣbula nna as akkan tudert.

Ixsa ax abda ad nezwur s tmaziɣt g amsawal nnex ammas n idɣaren igdudanin d usneɣmes.

Iqqan ax a nekkes ifragen ittuṣkan ngr inawen n tmaziɣt. Yuf ax ad nemsawel s tmaziɣt ngr imaziɣen issawelen s trifct nɣd tcelḥit nɣd tmaziɣt n Aṭlas. Adɣar n uswuri n ifssayen ineggura, lli gan aswuri s tutlayt yaḍnin.

Mad ax ixṣṣa ḥma ad nestutli s tmaziɣt g izmaz n uzɛaf imqquren nɣd izmaz n amiri akswat. Ula ad srs nesɣuyyu afad ad ax issfled ujenna. Ula ad neswingem s tmaziɣt ula ad ngemgem akd bu-itran s tmaziɣt?

Ad ur ak issusem waddad is tufit can tattut nɣd ukus n tmaziɣt g wawnaḍ ula g qaḥ tiwlafin n tudert n tmazirt! Yudes ax ad nessenfel tamaziɣt, a tt nezlleɛ s jaj ula beṛṛa.

1- oiseau phoenix ; طائر الفينيق

Ecrit par : Zouhayr Souirti