“ⴱⵉⵢⵍⵎⴰⵡⵏ: ⴰⴽⴰⵕⵏⴰⴼⴰⵍ ⴰⴳⵔⴰⵖⵍⴰⵏ ⵏ ⵓⴳⴰⴷⵉⵔ”.. ⵓⵙⵙⴰⵏ ⵏ 21-22-23 ⵢⵓⵍⵢⵓⵣ 2023

 ⵙ ⵜⵎⵢⴰⴷⴰⵙⵜ ⵏ ⵓⵙⵇⵇⵉⵎ ⴰⴳⵔⴰⵡⴰⵏ ⵏ ⵜⴳⵔⴰⵡⵜ ⵏ ⵓⴳⴰⴷⵉⵔ, ⴷ ⵓⵙⵎⵀⵍ ⵏ ⵓⵖⴰⵡⴰⵙ ⵏ ⵜⵡⵓⵔⵉ ⵏ ⵜⴳⵔⴰⵡⵜ 2022-2027, ⴷ ⵙ ⵜⵏⴰⵍⵉⵜ ⵏ ⵜⵎⴰⵡⴰⵙⵜ ⵏ ⵜⵄⵄⵓⵔⵎⴰ ⴷ ⵜⴷⵍⵙⴰ ⴷ ⵓⵎⵢⴰⵡⴰⴹ ⴷ ⵓⵙⵇⵇⵉⵎ ⵏ ⵜⵎⵏⴰⴹⵜ ⵏ ⵙⵓⵙ ⵎⴰⵙⵙⴰ, ⴷ ⵓⵙⵏⵎⴰⵍⴰ ⵏ ⵡⴰⵎⵎⴰⵙ ⵙⵓⵙ ⵎⴰⵙⵙⴰ ⵉ ⵜⴳⵎⵉ ⵜⴰⴷⵍⵙⴰⵏⵜ, ⴷⴰ ⵜⴻⵜⵜⵍⴰⵖⵉ ⵜⵎⵙⵙⵓⴳⵓⵔⵜ ⵏ “ⴱⵉⵢⵍⵎⴰⵡⵏ: ⴰⴽⴰⵕⵏⴰⴼⴰⵍ ⴰⴳⵔⴰⵖⵍⴰⵏ ⵏ ⵓⴳⴰⴷⵉⵔ” ⴰⵙⵏⵎⴰⵍⴰ ⵏ ⵜⵙⵓⵜⵍⵜ ⵜⴰⵎⵣⵡⴰⵔⵓⵜ ⵏ ⵓⵏⵎⵓⴳⴳⴰⵔ ⴰⴷ ⴰⴼⵓⴳⵍⴰⵏ ⴰⴳⵔⴰⵖⵍⴰⵏ ⴳ ⵉⵙⴰⵢⵔⴰⵔⵏ ⵉⵎⵢⴰⵏⴰⵡⵏ ⵏ ⵜⵖⵔⵎⵜ ⵏ ⵓⴳⴰⴷⵉⵔ, ⴷ ⵓⵙⴼⵓⴳⵍⵓ ⵙ ⵜⵎⵙⴽⵉⵔⵜ ⴰⴷ ⵜⴰⴷⵍⵙⴰⵏⵜ ⵉⵣⴷⵉⵏ ⴷ ⵜⴼⴰⵙⴽⴰ, ⵢⵓⵜⵏ ⵙ ⵉⵥⵓⵕⴰⵏ ⴳ ⵜⵎⵏⴰⴹⵜ ⵏ ⵙⵓⵙ ⵎⴰⵙⵙⴰ ⴷ ⵍⵎⵖⵔⵉⴱ ⵙ ⵓⵎⴰⵜⴰ, ⵓⵙⵙⴰⵏ 21/22/23 ⵢⵓⵍⵢⵓⵣ 2023.

ⴳ ⵜⵙⵓⵜⵍⵜ ⴰⴷ ⵜⴰⵎⵣⵡⴰⵔⵓⵜ, ⵔⴰⴷ ⴷⵔⵓⵏⵜ ⵜⵔⵓⴱⴱⴰ ⵏ ⵜⴰⵢⵙⵉ ⵜⴰⴳⴷⵓⴷⴰⵏⵜ ⵜⴰⵎⵖⵔⵉⴱⵉⵜ ⴷ ⵜⵔⵓⴱⴱⴰ ⵏ ⵉⵡⵔⵉⴽⵏ ⵏ ⴱⵉⵢⵍⵎⴰⵡⵏ ⵙ ⵜⵙⵓⵏⵉⵡⵉⵏ ⵏⵏⵙⵏ ⴷ ⵜⵎⵍⵙⴰ ⵏⵏⵙ ⵜⵉⵙⴱⵏⵓⴱⴽⵉⵏ, ⵉⵙⵎⴷⵢⴰⵜⵏ ⵏ ⵜⵎⵙⵎⵓⵏⵉⵏ ⵏ ⵓⴳⴰⴷⵉⵔ ⴰⵎⵇⵇⵔⴰⵏ, ⴰⵡⴷ ⵉⵙⵙⵓⵏⵛⴽⵏ ⵉⵎⵙⵏⴼⵍⵓⵍⵏ, ⴷⴰ ⵉⵎⵎⴰⵍⵏ ⵜⴰⵍⵜⵜⵓⵖⵜ ⵜⵓⵎⵏⵉⴳⵜ ⵏ ⵎⴰⵕⵕⴰ ⴳ ⵜⵎⵥⵕⴰ ⵥⵉⵍⵏⵉⵏ, ⵏⵏⴰ ⵉⴳⴰⵏ ⴰⵙⵏⵜⵍ ⵏ ⵓⵎⵃⵉⵣⵡⴰⵔ ⵏ ⵜⵔⵓⴱⴱⴰ ⵜⵉⴽⴰⵕⵏⴰⴼⴰⵍⵉⵏ ⵅⴼ ⵜⵙⵎⵖⵓⵔⵉⵏ ⵏ ⵉⵙⴼⵙⵔⵏ ⵉⵎⵓⴼⴰⵢⵏ.

ⵜⵓⴳⵯⵎ ⴷ ⵜⵙⵓⵜⵍⵜ ⵜⴰⵎⵣⵡⴰⵔⵓⵜ ⵏ ⵜⴼⵓⴳⵍⴰ ⴰⴷ ⵜⴰⵎⴳⵔⴰⵡⵜ ⴰⵙⵙⵏⵜⵉ ⵏⵏⵙ ⴳ ⵉⴱⴷⴷⵉ ⵏ ⵉⵎⴰⵣⵣⴰⵍⵏ ⵏ ⵓⵙⴽⴽⵉⵏ ⴰⴷⵖⵔⴰⵏ ⴳ ⵜⵖⵔⵎⵜ ⴷ ⵜⵎⵏⴰⴹⵜ ⵅⴼ ⵓⴼⵔⴰⴳ ⵏ ⵡⴰⵢⴷⴰ ⴰⴷⵍⵙⴰⵏ ⴰⵎⴰⵣⵉⵖ ⵏ ⵜⵎⴰⵣⵉⵔⵜ ⵏⵏⵖ ⴷ ⵓⵙⴷⵓⵙ ⵏⵏⵙ, ⵉⴷⴷⵖ ⵉⴳⴰ ⵜⴰⵎⴰⴳⵉⵜ ⵜⴰⵏⵊⵎⵓⵜ ⵏ ⵎⴰⵕⵕⴰ ⵉⵎⵖⵔⴰⴱⵉⵢⵏ, ⴷⴰ ⵢⵓⴼⴰⵏ ⵜⵉⵔⵙ ⴷ ⵢⵓⵙⴰⵏ ⴳ ⵢⵉⴳⵔ ⵏ ⵙⵓⵙ ⴷ ⵓⴳⴰⴷⵉⵔ, ⵜⵉⵖⵔⵎⵜ ⵏ ⵓⵙⵉⵍⴻⵍ ⴷ ⵜⵎⴰⵥⵓⵏⵜ ⵏ ⵜⴷⵍⵙⴰ ⵜⴰⵎⴰⵣⵉⵖⵜ.

ⴷⴰ ⵜⵙⵙⵓⵖⵓⵍ ⵜⵎⵙⵙⵓⴳⵓⵔⵜ ⵏ “ⴱⵉⵢⵍⵎⴰⵡⵏ: ⴰⴽⴰⵕⵏⴰⴼⴰⵍ ⴰⴳⵔⴰⵖⵍⴰⵏ ⵏ ⵓⴳⴰⴷⵉⵔ”  ⴰⵎⵏⵉⴷ ⵏ ⵓⵙⵇⵇⵉⵎ ⵏ ⵜⴳⵔⴰⵡⵜ ⵏ ⵓⴳⴰⴷⵉⵔ ⴷ ⵉⵎⴰⴷⵔⴰⵡⵏ ⵏⵏⵙ ⴷ ⵓⵡⵜⵜⴰⵙ ⵏⵏⵙⵏ ⴰⴼⴰⴷ ⴰⴷ ⵉⴳ ⵓⵏⵎⵓⵇⵇⴰⵔ ⴰⴷ ⴰⵙⴳⵯⵙⴰⵏ ⵜⴰⵎⵍⴷⴰ ⵏ ⵓⵙⵔⵇⴱ ⵏ ⵓⵔⵣⵣⵓ ⴰⵎⴰⵙⵙⴰⵏ ⴳ ⵓⵙⵏⵜⵍ ⵏ ⵜⵉⵍⴰⵍ ⵜⵉⴽⴰⵕⵏⴰⴼⴰⵍⵉⵏ ⴷ ⵜⴼⵓⴳⵍⴰⵏⵉⵏ, ⵙ ⵓⵙⵏⵎⴰⵍⴰ ⵏ ⵢⴰⵜ ⵜⵉⵏⴰⵡⵜ ⵜⴰⴳⵔⴰⵖⵍⴰⵏⵜ. ⴷ ⵔⴰⴷ ⵜⵙⵡⵓⵔⵉ ⵜⵉⵏⴰⵡⵜ ⴰⴷ ⵅⴼ ⴰⵢⵍⵍⵉ ⵉⵙⵎⵓⵏⵏ ⵏⴳⵔ ⵜⵎⵙⴽⵉⵔⵜ ⵏ ⴱⵉⵢⵍⵎⴰⵡⵏ ⴳ ⵍⵎⵖⵔⵉⴱ ⴷ ⵜⵉⵔⵎⵉⵜⵉⵏ ⵢⴰⴹⵏ ⴷ ⵜⵎⵙⴽⵉⵔⵉⵏ ⵜⵉⵎⵉⵡⵉⵢⵉⵏ ⴳ ⵉⵡⴰⵏⴽⵏ ⵏ ⵢⵉⵍⵍ ⴰⵎⵍⵍⴰⵍ ⴰⵏⴰⵎⵎⴰⵙ ⴷ ⵉⴼⵔⵉⵇⵢⴰ, ⵙ ⵜⴰⵡⵙⴰ ⵏ ⵉⵎⵔⵣⵓⵜⵏ ⵉⵎⵖⵔⵉⴱⵉⵢⵏ ⴷ ⵉⵎⵥⵍⴰⵢⵏ ⵉⴳⵔⴰⵖⵍⴰⵏⵏ ⴳ ⵉⴽⴰⵕⵏⴰⴼⴰⵍⵏ ⵉⵎⴰⴹⵍⴰⵏⵏ.

ⵎⴽⵍⵍⵉ ⵔⴰⴷ ⵢⵉⵍⵉ ⵓⵙⴷⵓⵙ ⵏ ⵓⵎⵏⵉⴷ ⴰⴷ ⵙ ⵓⵙⵏⵎⴰⵍⴰ ⵏ ⵜⵙⴰⵡⵔⵉⵏ ⵏ ⵜⵎⴳⵓⵔⵉ ⵏ ⵜⵙⵓⵏⵉⵡⵉⵏ ⴷ ⵓⵙⵎⴰⵔ ⵏ ⵉⵍⵎⴰⵡⵏ ⵏ ⵡⴰⵖⴰⴹⵏ ⴷ ⵉⵣⴰⵎⵎⴰⵔⵏ, ⴰⴼⴰⴷ ⴰⴷ ⵏⵙⵙⴳⵎⵉ ⵉⵎⵥⵢⴰⵏⵏ ⵅⴼ ⵡⴰⵔⴰⵢ ⵏ ⵡⴰⵢⴷⴰ ⴰⴷ ⴰⵔⴽⵎⴰⵎ ⴷ ⵓⵙⵔⵇⴱ ⵏ ⵜⴰⵣⵣⵓⵍⵉⵏ ⵉⵣⴷⵉⵏ ⴷ ⵓⴽⴰⵕⵏⴰⴼⴰⵍ, ⴰⵡⴷ ⴰⵙⵎⵏⵉⴷ ⵏ ⵜⵓⵊⵊⵓⵜⵉⵏ ⵏ ⵜⵎⴽⵜⵉⵜ ⵏ ⵜⵎⵙⴽⵉⵔⵜ ⴰⴷ ⵢⵓⵜⵏ ⵙ ⵓⵥⵓ ⴷ ⵉⵥⵓⵕⴰⵏ ⴳ ⵓⵎⵣⵔⵓⵢ ⵙ ⵓⵙⵏⵎⴰⵍⴰ ⵏ ⵓⵙⴼⵙⵔ ⵏ ⵉⵙⵙⵓⵏⵛⴽⵏ ⴷ ⵜⵡⵍⴰⴼⵉⵏ ⵏ ⵓⵏⵜⴰⵎ ⵏ ⵉⵙⴼⵓⴳⵍⵓⵜⵏ ⵏ ⴱⵉⵢⵍⵎⴰⵡⵏ.

 ⵎⴽⵍⵍⵉ ⵜⵙⵡⵓⵔⵉ ⵜⵎⵙⵙⵓⴳⵓⵔⵜ ⵏ ⴱⵉⵢⵍⵎⴰⵡⵏ: ⴰⴽⴰⵕⵏⴰⴼⴰⵍ ⴰⴳⵔⴰⵖⵍⴰⵏ ⵏ ⵓⴳⴰⴷⵉⵔ ⵅⴼ ⵓⵙⴱⵏⵏⴷ ⵏ ⵡⴰⵜⵉⴳ ⵏ ⵜⴷⵔⵓⵜ ⵜⴰⴼⵔⵉⵇⵉⵜ ⵏ ⵍⵎⵖⵔⵉⴱ ⵙ ⵜⴷⵔⴰⵡⵜ ⵏ ⵉⴼⵔⵉⵇⵉⵢⵏ ⵏ ⵉⴼⴼⵓⵙ ⵏ ⵜⵏⵣⵔⵓⴼⵜ ⴳ ⵜⵉⵍⴰⵍ ⵏ ⵓⴽⴰⵕⵏⴰⴼⴰⵍ ⴰⵎ ⵜⵉⵎⵙⴽⵉⵔⵜ ⵜⴰⴷⵍⵙⴰⵏⵜ ⵜⴰⴳⴷⵓⴷⴰⵏⵜ ⵉⵍⴽⵎⵏ ⵜⵉⵎⵉⵣⴰⵔ ⵏ ⵉⵥⵥⵍⵎⴹ ⴷ ⵜⴰⴳⵓⵜ ⵏ ⵜⵏⵣⵔⵓⴼⵜ, ⴷ ⵓⵙⴷⵓⵙ ⵏ ⵜⵎⵢⵉⴷⵉⵔⵜ ⵉⵍⵍⴰⵏ ⵏⴳⵔ ⵜⴷⵍⵙⵉⵡⵉⵏ ⴳ ⵓⵙⴰⵜⵉ ⵏ ⵓⵙⵓⵔⴼ ⴷ ⵜⵓⴷⵔⵜ ⵜⴰⵏⵊⵎⵓⵜ, ⵉⵕⵥⵎⵏ ⵅⴼ ⵜⴷⵔⴰⵡⵜ ⵏ ⵉⵎⴰⵍⵍⴰⵢⵏ ⵉⴱⵕⵕⴰⵏⵉⵢⵏ ⴳ ⵓⵎⵓⵙⵙⵓ ⴰⴷ ⴰⴼⵓⴳⵍⴰⵏ.

ⵜⴰⵎⵙⵙⵓⴳⵓⵔⵜ ⵏ “ⴱⵉⵢⵍⵎⴰⵡⵏ: ⴰⴽⴰⵕⵏⴰⴼⴰⵍ ⴰⴳⵔⴰⵖⵍⴰⵏ ⵏ ⵓⴳⴰⴷⵉⵔ”, ⵙ ⵓⵍⵖⵓ ⵏⵏⵙ ⵅⴼ ⵜⵍⴰⵍⵉⵜ ⵏ ⵓⵏⵎⵓⵇⵇⴰⵔ ⴰⴷ ⴰⴷⵍⵙⴰⵏ ⴷ ⵓⵥⵓⵕⴰⵏ ⴰⵙⴳⵯⵙⴰⵏ, ⵜⵙⵡⵓⵔⵉ ⵅⴼ ⵓⵙⵔⵙ ⵏ ⵜⴼⵔⴰⵙ ⵜⵉⵎⴳⴳⵓⵔⴰ ⵅⴼ ⵓⵥⵟⵟⴰ ⵏⵏⵙ, ⴹⴰⵕⵜ ⵏ ⵓⵙⵜⴰⵢ ⵏ ⵓⴷⵓⴽⵜⵓⵔ ⵃⵎⴰⴷ ⵚⴰⴱⵉⵔ ⴰⵏⵎⵀⴰⵍ ⵏⵏⵙ. ⵢⵉⵍⵉ ⵓⵙⵎⴰⵔ ⵏ ⵜⵉⵍⴰⵍ ⵏⵏⵙ ⴰⴽⴽⵯ ⵙ ⵉⴱⴷⴷⵉ ⵏ ⵉⵏⵎⵀⴰⵍⵏ ⵉⵎⵣⵣⴳⴰⵔⵏ ⴷ ⵉⵎⴰⵙⴰⵢⵏ ⵢⴰⴹⵏ, ⴷ ⴳ ⵎⴰⴷ ⵢⵓⵙⴰⵏ, ⴳ ⵜⵉⵏⴰⵡⵜ ⵜⴰⵏⵖⵎⴰⵙⵜ, ⵔⴰⴷ ⵢⵉⵍⵉ ⵓⵙⵎⵏⵉⴷ ⵏ ⵓⵥⵟⵟⴰ ⵏ ⵜⵎⵙⵙⵓⴳⵓⵔⵜ ⴷ ⵜⵏⴼⵓⵍⵜ ⵜⴰⵎⴰⵙⵙⴰⵏⵜ ⴷ ⵓⵖⴰⵡⴰⵙ ⵏ “ⴱⵉⵢⵍⵎⴰⵡⵏ: ⴰⴽⴰⵕⵏⴰⴼⴰⵍ ⴰⴳⵔⴰⵖⵍⴰⵏ ⵏ ⵓⴳⴰⴷⵉⵔ”