ⴰⵙⵙ ⴰⵎⴰⴹⵍⴰⵏ ⵏ ⵡⴰⴷⴷⴰⴳ ⵏ ⵡⴰⵔⴳⴰⵏ,ⴰⵙⴷⵓⵙ ⵏ ⵜⵣⵎⵎⴰⵔ ⵏ ⵍⵎⵖⵔⵉⴱ ⴳ ⵓⴼⵔⴰⴳ ⵏ ⵡⴰⴳⵔⴰ ⴰⴷ ⵏ ⵉⵎⵖⴰⵢⵏ

ⴰⴳⴰⴷⵉⵔ : ⵉⵙⴼⵓⴳⵍⴰ ⵡⴰⵎⵓⵏ ⴰⴳⵔⴰⵖⵍⴰⵏ ⴳ 10 ⵎⴰⵢ ⴽⵓⵏ ⴰⵙⴳⴳⴰⵙ ⵙ ⵡⴰⵙⵙ ⴰⵎⴰⴹⵍⴰⵏ ⵏ ⵡⴰⴷⴷⴰⴳ ⵏ ⵡⴰⵔⴳⴰⵏ, ⵏⵏⴰ ⵜⵙⵙⴷⵓⵙ ⵜⵎⵙⵎⵓⵏⵜ ⵜⴰⵎⴰⵜⴰⵢⵜ ⵏ ⵜⵎⵜⵜⴰ ⵉⵎⵓⵏⵏ ⴰⴼⴰⴷ ⴰⴷ ⵢⵉⵍⵉ ⵓⵙⴼⵓⴳⵍⵓ ⵙ ⵡⴰⴷⴷⴰⴳ ⴰⴷ ⵏⵏⴰ ⵉⵍⵍⴰⵏ ⴳ ⵜⵎⴰⵣⵉⵔⵜ ⵏⵏⵖ , ⵙ ⵓⵙⵖⵥⵏ ⵏ ⵜⵣⵎⵎⴰⵔ ⵏ ⵜⴳⵍⴷⵉⵜ ⵏⵏⵖ ⴰⴼⴰⴷ ⴰⴷ ⵜⴼⵔⴳ ⴰⴳⵔⴰ ⵢⴰⴷ ⵏ ⵉⵎⵖⴰⵢⵏ .

ⵜⵙⴽⵔ ⵜⵎⵜⵜⴰ ⵉⵎⵓⵏⵏ ⴰⵙⵙ ⴰⴷ ⴰⵎⴰⴹⵍⴰⵏ ⴷⴼⴼⵉⵔ ⵏ ⵓⵙⵙⵓⵜⵔ ⵏⵏⴰ ⵉⴼⴽⴰ ⵍⵎⵖⵔⵉⴱ ⵉ ⵜⵎⵙⵎⵓⵏⵜ ⵜⴰⵎⴰⵜⴰⵢⵜ ⵏ ⵜⵎⵜⵜⴰ ⵉⵎⵓⵏⵏ ,ⵉⵜⵜⵓⵙⴳⵎⴹ ⵅⴼ ⵓⵡⵏⵏⵉ ⴰⴷ ⵙ ⵓⵎⵙⴰⵙⴰ ⵏ ⵜⵎⵓⵔⴰ ⵏⵏⴰ ⴳⴰⵏⵉⵏ ⵉⴳⵎⴰⵎⵏ ⴳ ⵏⵢⵓⵕⴽ ⴰⵙⵙ ⵏ 03 ⵎⴰⵕⵚ 2021 ⵉⵜⵜⵓⵙⵏⵉⵍ ⵍⵎⵖⵔⵉⴱ ⵙⴳ ⴷⴰⵔ ⵡⴰⵎⵓⵏ ⴰⵎⴰⴹⵍⴰⵏ ⵏ ⵓⴼⵔⴰⴳ ⵏ ⵜⴰⵢⵙⵉ ⴰⴷ ⵜⴰⴳⴰⵎⴰⵏⵜ ⴷ ⵓⵙⴱⵓⵖⵍⵓ ⵏ ⵉⴳⵔ ⴰⴷ .

ⵉⵙⴼⵓⴳⵍⴰ ⵍⵎⵖⵔⵉⴱ ⴰⵙⵙ ⴰⴷ ⴷ ⵜⵎⵜⵜⴰ ⵉⵎⵓⵏⵏ ⵙ ⵡⴰⵙⵙ ⴰⵎⴰⴹⵍⴰⵏ ⵏ ⵡⴰⴷⴷⴰⴳ ⵏ ⵡⴰⵔⴳⴰⵏ ⴰⵙⵙ ⵏ 10 ⵎⴰⵢ ⴰⴷ ⴳ ⵡⴰⵏⵙⴰ ⵏ ⵜⵎⵜⵜⴰ ⵉⵎⵓⵏⵏ ⴳ ⵏⵢⵓⵕⴽ ⴷⴷⵓ ⵏ ⵜⵎⴰⵜⴰⵔⵜ ⵜⴰⵏⴼⵍⵉⵜ ⵜⴰⵏⴰⵎⵓⵏⵜ ⴷⵎⵙⴰⵏⵜ ⴷ ⵜⴰⵙⵓⵍⵜ ⵏ ⵉⴳⵔ ⴰⴷ ⵏ ⵡⴰⵔⴳⴰⵏ .

ⵉⵡⵜⵜⴰⵙⵏ ⵏ ⵓⵙⴼⵓⴳⵍⵓ ⵙ ⵡⴰⵙⵙ ⴰⴷ , ⵏⵏⴰ ⵙ ⵉⵏⵏⴰ ⵓⵙⵉⵡⴹ ⵏ ⵜⵎⴰⵡⵙⴰⵙⵜ ⵏ ⵜⴼⵍⵍⴰⵃⵜ ⴷ ⵜⴳⵯⵎⵔⵜ ⵏ ⵢⵉⵍ ⴷ ⵜⵏⴼⵍⵉⵜ ⵜⴰⴳⴰⵎⴰⵏⵜ ⴷ ⵡⴰⵎⴰⵏ ⴷ ⵜⴰⴳⴰⵏⵉⵏ , ⵙ ⵜⵉⵍⴰⵍ ⵏⵏⴰ ⵉⵍⵍⴰⵏ ⴷⴰⵔ ⵉⴳⵔ ⴰⴷ ⵏ ⵡⴰⵔⴳⴰⵏ ⴰⴼⴰⴷ ⴰⴷ ⵉⵙⵙⵙⵎⵢⵓⵔ ⵉⵎⵣⴷⴰⵖ ⵏ ⵓⵙⵓⵏⵏ, ⴷ ⵜⵡⵉⵙⵉ ⵏⵏⵙ ⴳ ⵓⵙⴷⴷⵉⴷ ⵏ ⵉⵡⵜⵜⴰⵙⵏ ⵏ ⵜⵏⴼⵍⵉⵜ ⵜⴰⵙⵓⵍⴰⵏⵜ ⴷⴼⴼⵉⵔ ⵍⵍⵉⵖ ⴰⵔ ⵉⵜⵜⴰⵡⵙ ⴳ ⵜⵏⴼⵔⵓⵜ ⵏ ⵓⵙⴰⴷⵓⵔ ( ⴰⵡⵜⵜⴰⵙ ⵡⵉⵙⵙ 2 ) , ⴷ ⵜⵣⵎⵔⵜ ⵏⵏⵙ ⴷ ⵓⵎⵙⴰⵙⴰ ⴷ ⵉⵙⵏⴼⴰⵍ ⵏ ⵓⵏⵣⵡⵉ, ( ⴰⵡⵜⵜⴰⵙ ⵡⵉⵙⵙ 13) ⴷ ⵜⵣⵎⵎⴰⵔ ⵏ ⵓⵙⴽⴽⵉⵔ ⵏ ⵡⴰⵢⴷⴰ ⵏ ⵜⵓⴷⵔⵜ ⴷⴼⵉⵔ ⵍⵍⵉⵖ ⴷⵔⵓⵙⵏ ⵉⵙⵓⴳⴰⵎ ⵏ ⵡⴰⵎⴰⵏ ( ⴰⵡⵜⴰⵙ ⵡⵉⵙⵙ 06 ) .

ⵔⴰⴷ ⵉⵙⵙⵏⵜⵉ ⵓⵙⴼⵓⴳⵍⵓ ⵙ ⵡⴰⵙⵙ ⴰⵎⴰⴹⵍⴰⵏ ⵏ ⵡⴰⵔⴳⴰⵏ ⴰⵙⴳⴳⴰⵙ ⴰⴷ ⴳ ⵡⴰⵏⵙⴰ ⵏ ⵜⵎⵜⵜⴰ ⵉⵎⵓⵏⵏ ⴳ ⵏⵏⵢⵓⵕⴽ, ⵔⴰⴷ ⵉⵜⵜⵓⵙⴽⴰⵔ ⵓⵙⵏⵎⴰⵍⴰ ⵏⵏⴰ ⵉⵍⵍⴰⵏ ⴳ ⵓⵙⵡⵉⵔ ⴷⴷⵓ ⵏ ⵜⵏⵙⵙⵉⵅⴼⵜ ⵏ ⵓⵎⴰⵡⵙⴰⵙ ⵏ ⵜⴼⵍⵍⴰⵃⵜ ⴷ ⵜⴳⵯⵎⵔⵜ ⵏ ⵢⵉⵍⵍ ⴷ ⵜⵏⴼⵍⵉⵜ ⵜⴰⴳⴰⵎⴰⵏⵜ ⴷ ⵡⴰⵎⴰⵏ ⴷ ⵜⴰⴳⴰⵏⵉⵏ ⵎⴰⵙⵙ ⵎⵓⵃⵎⵎⴰⴷ ⵚⴰⴷⵉⵇⵉ ⴷ ⵓⵎⴰⵣⴰⵏ ⴰⵙⵓⵍⴰⵏ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷⴰⵔ ⵜⵎⵜⵜⴰ ⵉⵎⵓⵏⵏ ⵎⴰⵙⵙ ⵄⵓⵎⴰⵕ ⵀⵉⵍⴰⵍ .

ⵔⴰⴷ ⴳⵉⵙ ⴰⵡⵙⵏ ⴽⵉⴳⴰⵏ ⵏ ⵉⴳⵎⴰⵎⵏ ⵏ ⵜⵎⵓⵔⴰⴷ ⵉⵎⵙⵜⴳⴳⴰⵔⵏ ⵏ ⵜⵎⵜⵜⴰ ⵉⵎⵓⵏⵏ , ⵙⵍⴰⵡⴰⵏ ⴰⴽⴽⵯ ⵜⴰⵎⴰⵡⴰⵙⵜ ⵏ ⵓⵏⴼⵍⵓⵙ ⴰⵎⴰⵜⴰⵢ ⵏ ⵜⵎⵜⵜⴰ ⵉⵎⵓⵏⵏ ⴷ ⵓⵏⵙⵙⵉⵅⴼ ⵏ ⵜⵎⵙⵎⵓⵏⵜ ⵜⴰⵎⴰⵜⴰⵢⵜ ⵏ ⵜⵎⵜⵜⴰ ⵉⵎⵓⵏⵏ ⴷ ⵉⵏⵎⵀⴰⵍⵏ ⵏⵏⴰ ⵉⵍⵍⴰⵏ ⴳ ⵜⵎⵜⵜⴰ ⵉⵎⵓⵏⵏ, ⵙⵍⴰⵡⴰⵏ ⴰⴽⴽⵯ ⵜⴰⵎⴰⴳⵔⴰⵡⵜ ⵏ ⵜⵎⵜⵜⴰ ⵉⵎⵓⵏⵏ ⵏ ⵓⵙⴳⵎⵉ, ⴷ ⵜⵎⴰⵙⵙⴰⵏⵉⵏ ⴷ ⵜⴷⵍⵙⴰ,ⴷ ⵜⵎⴰⴳⵔⴰⵡⵜ ⵏ ⵜⴷⵓⵙⵉ ⵜⴰⵎⴰⴹⵍⴰⵏⵜ , ⴷ ⵜⵎⴰⴳⵔⴰⵡⵜ ⵏ ⵓⵙⴰⴷⵓⵔ ⴷ ⵓⵥⵓ ⵏ ⵜⵎⵜⵜⴰ ⵉⵎⵓⵏⵏ, ⴷ ⵓⵏⵎⴰⵍⵍⵓ ⵏ ⵜⵎⵜⵜⴰ ⵉⵎⵓⵏⵏ ⵏ ⵜⵎⵖⴰⵔⵜ , ⴷ ⵓⴼⵏⵉⵇ ⴰⵣⴳⵣⴰⵡ ⵏ ⵓⵏⵣⵡⵉ .

ⵙ ⵜⵎⵍⴷⴰ ⵏ ⵓⵎⵓⵙⵙⵓ ⴰⴷ, ⵔⴰⴷ ⵉⵜⵜⵓⵙⴽⴰⵔ ⵢⴰⵏ ⵓⴼⵙⴰⵔ ⴰⵥⵓⵕⴰⵏ ⴷ ⵡⵉⵏ ⵜⵓⵍⴰⴼⵉⵏ ⵅⴼ ⵡⴰⵔⴳⴰⵏ ⴳ ⵙⵉⵏ ⵉⵎⴰⵍⴰⵙⵙⵏ ⴳ ⵡⴰⵏⵙⴰ ⵏ ⵜⵎⵜⵜⴰ ⵉⵎⵓⵏⵏ , ⵎⴽⵍⵉ ⵔⴰⴷ ⵉⵜⵜⵓⵙⴽⴰⵔ ⵓⵙⵏⵉⴱⴳ ⵏ ⵉⵎⴷⵔⴰⵡⵏ ⴷ ⵡⵉⵏⵏⴰ ⵢⵉⵡⵙⵏ ⴰⴼⴰⴷ ⴰⴷ ⵎⴹⵉⵏ ⵉⴼⴰⵔⵙⵏ ⵏ ⵡⴰⵔⴳⴰⵏ ⴷ ⵓⵙⵏⵓⵏⴼ ⵏ ⵉⴼⴰⵔⵙⵏ ⵏⵏⵙ ⴰⴽⴽⵯ ⵙⴳ ⴷⴰⵔ ⵜⵎⵢⴰⵡⴰⵙⵉⵏ ⵜⵉⴷⵖⵔⴰⵏⵉⵏ ⵜⵉⵎⵖⵔⵉⴱⵉⵢⵢⵉⵏ .

ⴳ ⵓⵙⵡⵉⵔ ⴰⵏⴰⵎⵓⵔ,ⵔⴰⴷ ⵜⵜⵓⵙⴽⴰⵔⵏ ⴽⵉⴳⴰⵏ ⵏ ⵉⵎⵓⵙⵙⵓⵜⵏ ⴰⴼⴰⴷ ⴰⴷ ⵙⴼⵓⴳⵍⵓ ⵙ ⵡⴰⵙⵙ ⴰⴷ ⴰⵎⴰⴹⵍⴰⵏ, ⵔⴰⴷ ⵜⵜⵓⵙⴽⴰⵔ ⵢⴰⵜ ⵜⵉⵏⴰⵡⵜ ⵜⴰⵎⴰⵙⵙⴰⵏⵜ ⴳ ⵉⵙⵉⵔⴰⵜⵏ ⵏ ⵜⵡⵏⵏⴰⴹⵜⴳ ⵜⵎⵔⵙⴰⵍ ⵏ ⵓⵙⵙⵍⵎⴷ ⴷ ⵜⵡⵡⵓⵔⵉⵡⵉⵏ ⵏ ⵓⵥⵣⵓ ⵏ ⵡⴰⴷⴷⴰⴳ ⴰⴷ ⵙ ⵜⴷⵔⴰⵡⵜ ⴷ ⵉⵏⵎⴰⵍⵍⵓⵜⵏ ⵏ ⵡⴰⵎⵓⵏ ⴰⵎⴰⴷⴰⵏ .

ⴰⴼⴰⴷ ⴰⴷ ⵜⴷⵓⵙ ⵜⵡⴰⵍⴰ ⴰⴷ ⵔⴰⴷ ⵜⴻⵜⵜⵓⵙⴽⴰⵔ ⵜⵙⵙⵓⵜⵍⵜ ⵜⵉⵙⵙ ⵙⵏⴰⵜ ⵏ ⵓⴼⵙⴰⵔ ⴰⵎⴰⴹⵍⴰⵏ ⵏ ⵡⴰⵔⴳⴰⵏ ⴳ ⵓⴳⴰⴷⵉⵔ ⵙⴳ 17 ⴰⵔ 21 ⵎⴰⵢ ⴰⴷ, ⵍⵍⵉⵖ ⵔⴰⴷ ⵉⵙⵓⵙⵙⵏ ⵙ ⵜⵡⵡⵓⵔⵉⵡⵉⵏ ⴰⴽⴽⵯ ⵏ ⵉⴳⵔ ⴰⴷ ⵏ ⵡⴰⵔⴳⴰⵏ , ⴷ ⵜⵡⵡⵓⵔⵉⵡⵉⵏ ⵏ ⵜⵎⴰⵡⵙⴰⵙⵜ ⵏ ⵜⴽⵔⵣⴰ ⴷ ⵜⴳⵯⵎⵔⵜ ⵏ ⵢⵉⵍⵍ ⴷ ⵡⴰⵎⴰⵏ ⴷ ⵜⴰⴳⴰⵏⵉⵏ ⴷ ⴽⵉⴳⴰⵏ ⵏ ⵜⵎⵔⵙⴰⵍ ⵏⵏⵙ , ⴳ ⵉⴳⵔ ⵏ ⵓⵙⴷⴷⵉⴷ ⵏ ⵜⵏⴼⵍⵉⵜ ⵜⴰⵙⵓⵍⴰⵏⵜ ⵏ ⵉⴳⵔ ⵏ ⵡⴰⵔⴳⴰⵏ .