ⴰⵙⵏⴼⴰⵔ ⵏ ⵢⴰⵏ ⵓⵎⵍⴰⵏ ⵅⴼ ⵡⴰⴷⴷⴰⴷ.. ⵉ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⵏ ⵉⵣⵔⴼⴰⵏ ⵏ ⵜⵎⴰⵣⵉⵖⵜ

ⵎⴰ ⵢⴰⴷ ⵥⵕⴰⵏⵜ ⵜⴽⵓⵏⴼⵉⴹⵉⵕⴰⵍⵉⵏ ⴷ ⵉⴳⵔⴰⵡⵏ ⴷ ⵜⵎⵙⵎⵓⵏⵉ ⵜⵉⵎⴰⵣⵉⵖⵉⵏ ⴰⴷⴷⴰⴷ ⵏ ⵜⵎⴰⵣⵉⵖⵜ ⵍⵍⵉ ⵉⴳⴰⵏ ⵜⵓⵜⵍⴰⵢⵜ ⵜⴰⵎⴰⴷⴷⵓⴷⵜ ⴳ ⵜⵎⵓⵔⵜ ⵏⵏⵖ, ⴷ ⵎⴰ ⵢⴰⴷ ⵉⵣⵔⵉ ⵓⵣⴳⵏ ⵏ ⵓⵣⴷⴰⵡ ⵏ ⵜⵏⴱⴰⴹⵜ, ⵥⵕⵏ ⵉⴷⴷⵉⵔⵣⵏ ⴷ ⵓⵥⴹⴰⵎ ⵉⵍⵍⴰⵏ ⵅⴼ ⵜⵎⴰⵣⵉⵖⵜ ⴳ ⵜⵖⵔⵎⴰ ⵏⵏⵙ ⴷ ⵉⴷⵍⵙ ⴷ ⵜⵓⵜⵍⴰⵢⵜ ⴷ ⵡⴰⴽⴰⵍ ⵏⵏⵙ, ⵙⵙⵓⴼⵓⵖⵏ ⴷ ⵓⵎⵍⴰⵏ ⴰⴷ ⵉ ⵉⵏⴰⵎⵓⵔⵏ ⴷ ⵉⴳⵔⴰⵖⵍⴰⵏⵏ:

1-ⴰⵔ ⵏⵙⵎⵓⵎⵎⵓⵢ ⵣⴳ ⴰⵢⵍⵍⵉ ⴷ ⵜⵉⵡⵉ ⵜⵎⵙⴷⵓⵙⵜ ⵏ ⵓⵙⵍⵎⴷ ⵍⵍⵉ ⵉⵙⴽⵔⵏ ⴳ ⵓⵙⵍⵎⴷ ⵏ ⵜⵓⵜⵍⵢⵜ ⵜⴰⵎⴰⵣⵉⵖⵜ ⴰⵔⵓⵛⵛⵉⵍ ; ⵎⴽ ⵍⵍⵉ ⴷ ⵢⵓⵛⴽⴰⵏ ⴳ ⵜⵎⵙⵙⴽⵜⵉⵜ ⵏ ⵓⵎⴰⵡⵙⴰⵙ 5/7/2024 ⵎⵇⵇⴰⵔ ⵉⵙⵙⵏ ⵎⴰⵙⵙ ⴰⵎⴰⵡⵙⴰⵙ ⵉⵙ ⴷ ⵉⵖ ⵜⴳⴰ ⵜⵓⵜⵍⴰⵢⵜ ⵜⴰⵔⵓⵛⵛⵉⵍⵜ ⵀⴰⵜ ⵉⵙ ⵜⵜⵓⵡⵏⵖⴰ; ⵏⴽⴽⵏⵉ ⴷⴰ ⵏⵜⵜⵣⴰⵡⴰⵔ ⵜⴰⵖⵜⴰⵙⵜ ⴰⴷ ⵍⵍⵉ ⵏⵜⵜⴰⵏⵏⴰⵢ ⵜⴳⴰ ⴰⴷⴷⵉⵔⵣ ⵜⴳ ⵜⵉⵕⵥⵉ ⵏ ⵢⴰⵏ ⴳ ⵉⴼⵕⴹⵉⵙⵏ ⵏ ⵜⵎⵏⴹⴰⵡⵜ.

ⴰⵔ ⵏⵙⵙⵓⵜⵓⵔ ⴰⴷ ⵉⴳ ⵓⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵓⵛⵛⵉⵍ ⴳ ⵜⵎⵔⵙⵍⵉⵏ ⵏ ⵡⴰⵡⴰⵏⴽ ⵇⴰⵃ ⵏⵏⵙⵏⵜ ⵙⵢⴰⴼⵓⵏ ⴳⵉⵙ ⵉ ⵉⵎⵉⵛⴽⴰⵏ ⵏⵏⵖ ⴳ ⴱⵕⵕⴰ.

2-ⴰⵔ ⵏⵙⵎⵓⵎⵎⵓⵢ ⵣⴳ ⵜⵓⴽⴽⵙⴰ ⵏ ⵉⴽⴰⵍⵉⵡⵏ ⵏ ⵉⵎⵣⴷⴰⵖⵏ ⵉⵎⵣⵡⵓⵔⴰ ⴱⵍⴰ ⵜⴰⵎⵎⵙⵍⴰⵢⵜ ⵏⵏⵙⵏ ⵎⴽ ⵍⵍⵉ ⵜⵜⵉⵏⵉⵏ ⵉⵣⵔⴼⴰⵏ ⵏ ⵜⵎⵜⵜⵉⵏ ⵎⵓⵏⵏⵉⵏ ⵍⵍⵉ ⵉⵣⵣⵔⵉ ⵍⵎⵖⵔⵉⴱ, ⴰⵔ ⵏⵙⵙⵓⵜⵓⵔ ⴰⴷ ⵜⵙⴱⴷⴷⵎ ⵜⵓⴽⴽⵙⴰ ⵏ ⵉⴽⴰⵍⵉⵡⵏ ⵏ ⵉⵎⵣⴷⴰⵖⵏ ⵙ ⵉⵙⵍⴳⵏⵏ ⵏ ⵓⵙⴷⵓⵔⵔⵉ.

3-ⴰⵔ ⵏⵙⵎⵓⵎⵎⵓⵢ ⵣⴳ ⴰⴷ ⵜⴳ ⵜⵓⵜⵍⵢⵜ ⵜⴰⵎⴰⵣⵉⵖⵜ ⵢⴰⵜ ⴳ ⵜⵓⵜⵍⴰⵢⵉⵏ ⵜⵉⵎⵣⵣⴰ, ⵎⴽ ⵍⵍⵉ ⴷ ⵢⵓⵛⴽⴰⵏ ⴳ ⵜⵓⵙⵎⵉⵔⵜ ⵏ ⵓⵎⵃⵉⵣⵡⵔ ⵏ ⵓⴽⵛⵛⵓⵎ ⵙ ⵓⵙⴰⴽⴰ ⵏ ⵓⵙⵓⵖⵍ ⴳ ⵜⵉⵏⵎⵍ ⵏ ⵓⴳⵍⵍⵉⴷ ⴼⴰⵀⴷ.

4-ⴰⵔ ⵏⵙⵙⵓⵜⵓⵔ ⴰⴷ ⵢⵉⵍⵉ ⵢⴰⵏ ⵓⵙⵍⴳⵏ ⵏ ⵓⴼⵔⴰⴳ ⵉ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵍⵍⵉ ⵉⴳⴰⵏ ⵜⵓⵜⵍⴰⵢⵜ ⵜⴰⵎⴷⴷⵓⴷⵜ ⵏ ⵡⴰⵡⴰⵏⴽ, ⵉⵇⵇⴰⴷ ⴰⴷ ⵜⴻⵜⵜⵓⵙⵎⵔⴰⵙ ⴳ ⵉⴷⵖⴰⵔⵏ ⴰⴽⴽⵯ ⵏ ⵡⴰⵡⴰⵏⴽ. ⴳ ⵓⵙⵉⴷⴷ ⵏ ⵓⵙⵍⴳⵏ ⵏ ⵓⵙⵏⵎⴰⵍⴰ 26-16.

5-ⴰⵔ ⵏⵥⵕⵕⴰ ⵎⴰ ⵙ ⴷ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⴰⴷ ⵉⴳⴰⵏ ⴰⵎⴰⵙⴰⵢ ⵅⴼ ⵉⴷⴷⵉⵔⵣⵏ ⴰⴷ ⵙⵇⵇⴰⵇⵇⵏⵉⵏ ⵍⵍⵉ ⵉⴽⴽⴰⵜⵏ ⴳ ⵡⵓⵍ ⵏ ⵜⵎⵏⴹⴰⵡⵜ ⵙⵙⵓⴷⵓⵏ ⵅⴼ ⵓⵙⵎⵎⵥⵍⵉ ⴰⵙⵏⵉⵍⵙ ⴳⵔ ⵜⵄⵕⴰⴱⵜ ⴷ ⵜⵎⴰⵣⵉⵖⵜ ⴳ ⵡⴰⴽⵓⴷ ⵍⵍⵉ ⴷ ⵉⵇⵇⴰⵏ ⴰⴷ ⵜⵉⵍⵉ ⵢⴰⵜ ⵜⵙⵔⵜⵉⵜ ⵏ ⵓⵙⵎⵎⵥⵍⵉ ⵉⴳⴰⵏ ⵓⵎⵏⵉⴳ ⵉ ⵜⵎⴰⵣⵉⵖⵜ ⵃⵎⴰ ⴰⴷ ⵜⵏⵊⵎ ⵉ ⵓⵏⵖⵓⴱⵓ ⴷ ⴰⴷ ⵜⴻⵜⵜⵓⵡⵏⵙⵙⵉⵏⴼ.

6-ⴰⵔ ⵏⵙⵙⵉⵜⵉⴳ ⴰⴽⴽⴰⵢ ⵏ ⵓⵎⵓⵙⵙⵓ ⴰⵎⴰⵣⵉⵖ ⵅⴼ ⴰⴷ ⵢⵉⵍⵉ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵜⵎⴰⵣⵉⵖⵜ ⴷ ⵜⵉⴳⴰⵡⵜ ⵜⴰⵎⴰⵣⵉⵖⵜ ⵍⵍⵉⴳ ⵉⵍⵍⴰ ⵓⵎⵙⴰⵙⴰ ⵅⴼ ⵜⵓⵡⵓⵔⵉⵡⵉⵏ ⵏ ⵉⵎⵇⵇⵏⵏ ⵏ ⵜⵎⵙⵎⵓⵏⵉⵏ ⵜⵉⵎⴰⵣⵉⵖⵉⵏ, ⵃⵎⴰ ⴰⴷ ⵢⵉⵍⵉ ⵓⵙⵎⵓⵜⵜⴳ ⵏ ⵓⴱⵔⴰⴳⵔⴰⵡ ⴰⵏⴰⵎⵓⵔ ⴰⵎⴰⵣⵉⵖ ⴰⵎⵣⵡⴰⵔⵓ ⵍⵍⵉ ⵔⴰⴷ ⵉⴳ ⵢⴰⵏ ⵓⵣⴰⴳⵯⵣ ⵏ ⵜⵖⵏⵙⴰ ⵜⴰⵎⴰⵣⵉⵖⵜ.