ⴰⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵖ ⵙⴽⵜⵉ ⵡⵉⵙⵙ 30 ⵏ ⵓⵍⵖⵓ ⵏ ⴱⵉⵊⵉⵏ,

ⴳ ⵢⴰⵏ ⵓⵏⵄⴰⵕ ⴰⵏⴰⵎⵓⵔ ⴷ ⵓⴳⵔⴰⵖⵍⴰⵏ ⵙ ⵓⵣⵎⵣⵣⵓ ⵏ ⵓⵙⴽⵜⵉ ⵡⵉⵙⵙ 30 ⵏ ⵓⵍⵖⵓ ⵏ ⴱⵉⵊⵉⵏ, ⵉⵙⵙⵉⴷⴷ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵅⴼ ⵓⵎⵄⵉⵏⵏ ⴷ ⵜⵏⵥⴰⵕ, ⵉⵙⵎⴰⵢⵏⵓ ⴰⵙⴷⴷⵉⴷ ⵅⴼ ⵉⵙⵖⵍⴰⴼⵏ ⴰⴼⴰⴷ ⴰⴷ ⵜⵉⵍⵉ ⵜⵎⵢⴰⴳⴰⵏⵜ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵜⵎⵖⴰⵔⵉⵏ, ⴳ ⵍⵎⵖⵔⵉⴱ ⴷ ⵓⵎⴰⴹⴰⵍ

ⵉⵙⵎⵏⵉⴷ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴰⵙⵙ ⵏ ⵓⵢⵏⴰⵙ 24 ⴱⵕⴰⵢⵕ ⵉⵣⵔⵉⵏ, ⵢⴰⵜ ⵜⴳⵓⵔⵉ ⵜⴰⵎⵉⵡⴰⵏⵜ ⴳ ⵢⴰⵏ ⵓⵎⴹⴰⴽⴰⵕ ⴰⵏⵎⵜⵜⴰ ⵉⴼⵙⵔⵏ ⵜⵉⵏⵥⴰⵕ ⴷ ⵜⵙⴽⵔⴰⵡⵉⵏ ⵙ ⵓⵣⵎⵣⵣⵓ ⵏ ⵓⵙⴽⵜⵉ ⵡⵉⵙⵙ 30 ⵏ ⵓⵍⵖⵓ ⴷ ⵓⵖⴰⵡⴰⵙ ⵏ ⵜⵡⵓⵔⵉ ⵏ ⴱⵉⵊⵉⵏ, ⵉⵡⴰⵜⵜⵙⵏ ⴰⴷ ⵢⴰⵡⵙ ⵉ ⵜⵎⵖⴰⵔⵉⵏ ⴷ ⵜⵔⴱⴰⵜⵉⵏ ⴳ ⵓⵎⴰⴹⴰⵍ ⴳ ⵓⵙⵉⴳⴳⵍ ⵏⵏⵙⵏⵜ ⵉ ⵉⵙⴽⵉⵍ ⴷ ⵓⵙⵎⵀⵍ ⵏ ⵉⵣⵔⴼⴰⵏ ⵏ ⵜⵎⵖⴰⵔⵜ.

ⵙ ⵓⵣⵎⵣⵣⵓ ⴰⴷ, ⵉⵙⵙⵉⵜⴳ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵜⴰⵣⵣⵉⴳⵣⵜ ⵉⵜⵜⵓⵍⴽⴰⵎⵏ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵜⵎⵖⴰⵔⵉⵏ ⴳ ⵍⵎⵖⵔⵉⴱ, ⵙ ⵍⴰⵡⴰⵏ ⴰⴽⴽⵯ ⴳ ⵓⵙⵡⵉⵔ ⴰⴷⵙⵜⴰⵔ ⴷ ⵓⵏⵣⵔⴰⴼ, ⴷ ⵓⵍⴰ ⴳ ⵓⵙⵡⵉⵔ ⵏ ⵓⵙⵡⵓⵔⵉ ⵏⵏⵙⵏⵜ ⴳ ⵜⵙⵖⴰⵏ ⵏ ⵜⵎⵙⵜⴳⴳⴰⵔⵜ. ⵢⴰⵍⵍⵖ ⴰⵡⴷ ⵓⵙⵇⵇⵉⵎ ⵜⴰⵎⵢⴰⴷⴰⵙⵜ ⵜⴰⵎⵖⵍⵓⵢⵜ (bottom-up) ⴷ ⵜⵏⵊⵎⵓⵜ, ⵉⴱⴷⴷⵏ ⵅⴼ ⵉⵎⵛⵉⵡⴰⵕ ⵉⵎⵉⵔⵉⵡⵏ, ⵏⵏⴰ ⵉⴹⴼⵕ ⵍⵎⵖⵔⵉⴱ ⴳ ⵓⵙⴰⵜⵉ ⵏ ⵓⵙⵏⴰⵎ ⵏ ⵓⵙⵍⴳⵏ ⵏ ⵜⵡⵊⴰ.

ⵜⵣⵎⵔ ⵜⵎⵢⴰⴷⴰⵙⵜ ⴰⴷ, ⵉⵏⵏⴰ ⵓⵙⵇⵇⵉⵎ ⴳ ⵜⴳⵓⵔⵉ ⵏⵏⴰ ⵉⵙⵎⵏⵉⴷ ⵎⴰⵙⵙ ⵎⵓⵚⵟⴰⴼⴰ ⵏⴰⵊⵎⵉ, ⴰⵏⵎⵀⴰⵍ ⵏ ⵜⵎⵀⵍⴰ ⵏ ⵜⵏⴽⵔⴰ ⵙ ⵉⵣⵔⴼⴰⵏ ⵏ ⵓⴼⴳⴰⵏ, ⴰⴷ ⵜⵙⴷⵓⵙ ⴰⴼⵔⴰⴳ ⴰⵣⵔⴼⴰⵏ ⵉ ⵉⵣⵔⴼⴰⵏ ⵉⵣⴷⵉⵏ ⴷ ⵜⵡⵊⴰ ⴷ ⴰⴷ ⵜⵏⴼⵔⵓ ⵜⴰⵎⵢⴰⴷⴰⵙⵜ ⵉⴳⴰⵏ ⵜⴰⵎⵙⵓⵎⵓⵜ ⵓⴳⴳⴰⵔ ⵉ ⵜⵖⴰⵡⵙⵉⵡⵉⵏ ⵏ ⵜⵎⵖⴰⵔⵜ.

ⵎⵇⵇⴰⵔ ⴷ ⵎⴰⵢⴰ, ⵉⴱⴷⴷ ⵓⵙⵇⵇⵉⵎ ⴰⵡⴷ ⵅⴼ ⵜⵏⵥⴰⵕ ⵉⵣⴷⵉⵏ, ⵏⵏⴰ ⵉⵙⵙⵏⵜⴰⵎ ⴳ ⵜⴰⵏⴰⴹⵉⵏ ⵏⵏⵙ ⵜⵉⵙⴳⵯⵙⴰⵏⵉⵏ ⴷ ⵜⵙⴳⵓⵎⴰⵏⵉⵏ, ⵙⵍⴰⵡⴰⵏ ⴰⴽⴽⵯ ⴰⵙⵢⵉⵡⵍ ⵏ ⵜⵓⵎⵥⵉⵢⵉⵏ ⴷ ⵓⵣⴷⴰⵢ ⵏ ⵜⴽⵕⴹⵉ ⵉⴱⴷⴷⵏ ⵅⴼ ⵡⴰⵏⴰⵡ ⴰⵏⴰⵎⵓⵏ. ⵓⵔ ⵉⵜⵜⵓ ⵓⵙⵇⵇⵉⵎ ⴰⵡⴷ ⴰⴷ ⵉⵙⴷⴷⵉⴷ ⵅⴼ ⵉⵎⵓⴽⵔⵉⵙⵏ ⴷ ⵓⴽⵔⵉⵙ ⵏ ⵓⵙⵙⵉⵡⴹ ⵅⴼ ⵜⴽⵕⴹⵉ ⴷ ⵡⴰⴳⴳⴰ ⵏ ⵜⵉⵍⴰⵡⵜ ⵏⵏⵙ, ⵏⵏⴰ ⵉⵙⴱⵉⴹⵉⵕⵏ ⵉ ⵜⵓⵏⵊⵉⵎⵉⵏ ⴰⴷ ⵙⵎⵏⵉⴷⵏⵜ ⵜⵉⵏⵔⵣⵉⵏ ⵏⵏⵙⵏⵜ. ⵉⴽⴽⴰ ⵜⵜ ⵉⵏⵏ ⵓⵙⵇⵇⵉⵎ ⵉⵥⵍⵉ ⴰⵙⵏⵜⵍ ⵏ ⵓⵎⵣⵉⵣⵣⵍ ⴰⵙⴳⴳⵯⵙⴰⵏ, ⴰⵏⴰⵎⵓⵔ ⴷ ⵓⵏⵎⵏⴰⴹ, ⵉ ⵓⵙⵏⵜⵍ ⵏ ⵓⵙⵙⵉⵡⴹ, ⵉⵙⵎⵏⵉⴷ ⵅⵉⴼⵙ ⵢⴰⵜ ⵜⴰⵏⴰⴹⵜ ⵜⴰⵙⴳⵓⵎⴰⵏⵜ (ⵉⵍⵍⴰ ⴳ ⵓⵙⵉⵜ ⵏⵏⵙ) ⵉⵙⵙⵓⵜⵍ ⵉ ⵓⵎⵓⴽⵔⵉⵙ ⴰⴷ ⴷ ⵜⵏⵥⵕⵜ ⴰⴷ ⵙⴳ ⴰⴽⴽⵯ ⵜⵙⴳⴳⵯⵉⵏ ⵏⵏⵙ.

ⵖⵎⴽ ⴰⴷ, ⵢⴰⵍⵙ ⵓⵙⵇⵇⵉⵎ ⵉⵙⴷⴷⵉⴷ ⵅⴼ ⵓⵙⵓⵖⵏ ⵏ ⵓⵙⴷⵓⵙ ⵏ ⵓⵙⵉⴷⴼ ⵏ ⵜⵎⵢⴰⴷⴰⵙⵜ ⵏ ⵡⴰⵏⴰⵡ ⴳ ⴰⴽⴽⵯ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ, ⴷ ⵓⵙⴷⵓⵙ ⵏ ⵉⵎⴰⵙⵙⵏ ⵏ ⵓⴼⵔⴰⴳ ⵏ ⵜⵎⵖⴰⵔⵉⵏ, ⴷ ⵓⵙⴳⵓⴷⵉ ⵏ ⵉⵎⵣⵉⵣⵣⵍⵏ ⵏ ⵓⵙⴼⵔⴽ ⴰⴼⴰⴷ ⴰⴷ ⵜⵜⵓⵙⴱⴷⴷⵉⵏⵜ ⵜⵡⵍⴰⴼⵉⵏ ⵜⵉⵙⵏⴰⵡⴰⵢⵉⵏ ⵉⵥⵍⵉⵏ ⵙ ⵜⵎⵖⴰⵔⵉⵏ, ⴷ ⵜⵏⴼⵔⵓⵜ ⵏ ⵜⴷⵔⴰⵡⵜ ⵜⵓⵖⴷⵉⵎⵜ ⵏ ⵜⵎⵖⴰⵔⵜ ⴳ ⵜⵎⵀⴰⵍ ⵏ ⵜⵎⴳⵓⵔⵉ ⵏ ⵜⵖⵜⴰⵙⵜ.