كيف الطير يهاجر ويغادر لوكر
يمكن ارهن عمرو ف سفر
يمكن هامة خلاتو ينفر
تحرثات السما
و اتزرَّب الما
وبين تبسيمة وتنهيدة
فزاعة ومصيدة
البارح ستاه” مورا ”
رشمة لعبيد
جرح ما يبرا
هبطو لغار يحفر بمنقارو ليل وانهار
ويكَول غدا نبني عش ثاني
ونعيش ف دواري هاني
وملي اطلع راسو تصلع وجناحو ثقالو
والفراخ حايرين اين فركَ يرتاحو
اليوم واخَّا العسّا والبارود والموج العالي
واخَّا روضة الطير المنسي وسط البحر
بلا شاهد بلا والي
صغير وكبير
باغى يقوي جناحو ويطير
وشحال من الحلمة هزها الما وبه تكفنات
لمواج جفلات
جمرة تطفات
الما تعرَّى وبان لغدر
البحر على حد الشوف والروضة اكبر
السكة ماضية والكَعدة ارشات
صابة على سحابة كذابة عولات
الحلمة خاصها لقوام
حرث محبوك على الدوام
وحروف مسرجة وقلم علاَّم
خاص الشوك من العش يتسل
و كَطران بلادي ايولِّي عسل.
- محمد بوشلخة
