ⴳ ⴽⵓ ⵜⴰⵙⵙⵓⵜⵍⵜ, ⴰⵔ ⵉⵙⴽⴰⵔ ⵉⵙⵏⵉ ⵏ ⵡⵓⵔⵖ ⴰⵙⵙⵎⵖⵔ ⵉ ⵉⵙⵎⴰⵡⵏ ⵍⵍⵉ ⵉⵡⵙⵏⵉⵏ ⴳ ⵜⵡⴰⴷⴰ ⵏⵏⵙⵏ ⵜⴰⵏⴰⵥⵓⵕⵜ ⴷ ⵜⵖⵏⵙⴰ ⵏⵏⵙⵏ, ⴼⴰⴷ ⴰⴷ ⵙⵙⵉⴳⴳⵣⵏ ⴰⵙⵏⴼⵍⵓⵍ ⴰⵎⴰⵣⵉⵖ, ⵎⵔⴰⵔⴰⵏ ⵅⴼ ⵜⵎⴰⴳⵉⵜ ⵜⴰⵎⴰⵣⵉⵖⵜ ⴷ ⵜⴷⵍⵙⴰ, ⵙⵍⴰⵡⴰ ⵏⵏ ⴰⴽⴽⵯ ⴳ ⵉⵣⵎⴰⵣ ⵏ ⵜⵔⴳⵉⵏ ⵍⵍⵉ ⵉⵎⵎⵔⴰ ⴰⴷ ⵜⵎⵔⴰⵔⴰⵜ ⵅⴼ ⵜⵓⵜⵍⴰⵢⵜ ⴷ ⵜⴷⵍⵙⴰ ⵜⴰⵎⴰⵣⵉⵖⵜⵏ ⴷ ⵜⵉⵣⵉ ⵍⵍⵉ ⵜⵙⵖⴰⵡⵙⴰ ⵙ ⵜⵖⴷⵎⵜ ⴷ ⵢⵉⵙⵉⵏ.
ⴰⵙⵙⵎⵖⵔ ⵏ ⵎⵓⵃⵎⵎⴰⴷ ⵚⴰⵍⵓⵜ, ⵍⵍⵉ ⵉⵜⵜⵓⵙⵙⴰⵏⵏ ⵙ “ⴰⴳⵯⵔⵔⴰⵎ ⴰⵔⵛⴰⵛ, ⵢⵓⵛⴽⴰ ⴷ ⴳ ⵜⴰⵍⵖⴰ ⵏ ⵓⵙⵓⵜⵜⴳ ⵏ ⵢⴰⵜ ⵜⵡⴰⴷⴰ ⵉⴳⴰⵏ ⵡⴰⵥ ⵍⵍⵉ ⵉⴽⴽⴰⵏ ⵓⴳⴳⴰⵔ ⵏ ⵙⵎⵎⵓⵎⵔⴰⵡ ⵏ ⵓⵙⴳⴳⵯⴰⵙ, ⴳ ⵜⵉⵣⵉ ⴰⴷ ⴰⴽⴽⵯ ⵉⴼⴽⴰ ⵜⵓⴷⵔⵜ ⵏⵏⵙ ⵉ ⵜⵥⵓⵕⵉ ⵜⴰⵎⴰⵣⵉⵖⵜ ⴷ ⵓⵙⵏⴰⵔⴰ ⵏ ⵜⴷⵍⵙⴰ ⴷ ⵜⵎⴽⵜⵉⵜ ⵜⴰⴳⵔⴰⵡⴰⵏⵜ.
ⵙⴳ ⵍⵍⵉⵖ ⵉⵙⴽⵔ ⴷ ⵍⵍⵉⵖ ⵉⴳⴰ ⴰⵏⵙⵙⵉⵅⴼ ⵏ ⵜⵔⴰⴱⴱⵓⵜ ⵏ ⴰⵔⵛⴰⵛ ⴳ ⵓⵙⴳⴳⵯⴰⵙ ⵏ 1979, ⵏⵜⵜⴰⵏ ⴷ ⵉⵎⴷⴷⵓⴽⴽⵯⴰⵍ ⵏⵏⵙ, ⵢⵉⵡⵙ ⴰⴳⵯⵔⵔⴰⵎ ⴳ ⵓⵙⴽⴽⵓ ⵏ ⵢⴰⵜ ⴳ ⵜⵉⵔⵎⵉⵜⵉⵏ ⵏ ⵓⵎⴰⵔⴳ ⴱⴰⵀⵔⴰ ⵉⵜⵜⵓⵙⵙⴰⵏⵏ, ⵙ ⵓⵙⴳⵓⴷⵉ ⵉⵣⵔⵉⵏ 180 ⵏ ⵜⵓⵔⴰⵔⵜ ⴷ 35 ⵏ ⵜⴰⵙⵙⴼⵉⴼⵜ, ⵎⴽ ⴰⵏⵏ ⴰⴷ ⵙ ⵉⵍⵎⵎⴰ ⵉⴳⴰ ⴳ ⵜⴰⵎⴰ ⵏ ⵉⵎⴷⴷⵓⴽⴽⵯⴰⵍ ⵏⵏⵙ ⵢⴰⵏ ⴳ ⵉⵎⵏⵣⵓⵖⵏ ⵏ ⵜⵓⵔⴰⵔⵜ ⵜⴰⵎⴰⵣⵉⵖⵜ, ⵉⴳ ⵙⴳ ⵡⵉⵍⵍⵉ ⴰⵙ ⵏⵏ ⵉⵔⵏⴰⵏ ⴰⵎⵢⴰⴷⴰⵙ ⴰⵙⵡⴰⵏⴳⴰⵎ; ⴰⵢⵍⵍⵉ ⵉⵙⴽⵔⵏ ⴳ ⵜⵔⴰⴱⴱⵓⵜ ⵏⵏⵙ “ⴰⵔⵛⴰⵛ” : “ⵉⴼⵍⵙⵓⴼⵏ ⵏ ⵜⵓⵔⴰⵔⵜ ⵜⴰⵎⴰⵣⵉⵖⵜ”.
ⵓⵔ ⵟⵥⵍⵉ ⵜⵉⴽⴽⵉ ⵏ ⵎⵓⵃⵎⵎⴰⴷ ⵚⴰⵍⵓⵜ ⵖⴰⵙ ⵢⵉⴳⵔ ⵏ ⵡⵓⵔⴰⵔ, ⴰⵔⴳⴰⵣ; ⵓⵔ ⵏⵏ ⵉⴱⵉⴷⴷ ⴰⵔ ⵉⴳⵔ ⵏ ⵙⵙⵉⵏⵉⵎⴰ ⴷ ⵓⵙⵍⵉⵥⵕ, ⵜⵉⵣⵉ ⵍⵍⵉ ⵉⵙⴽⴰ ⵢⴰⵜ ⵜⵉⵔⵎⵉⵜ ⴱⴰⵀⵔⴰ ⵉⵜⵜⵓⵙⵙⴰⵏⵏ, ⵉⴼⵍⵏ ⴰⴷⵔⵉⵣ ⵏⵏⵙ ⴳ ⵜⵎⴽⵜⵉⵜ ⵏ ⵉⵎⴰⵣⵉⵖⵏ, ⵙ ⵜⵡⵡⵓⵔⵉ ⵏⵏⵙ ⵜⴰⵎⴽⵕⴰⴹⵜ: “ⴱⵓⵜⴼⵓⵏⴰⵙⵜ ⴷ ⴽⴽⵓⵎⵔⴰⵡ ⵏ ⵢⵉⵎⵉⴽⵔ”, ⵍⵍⵉ ⵢⵓⵔⵔⵉⵏ ⵜⴳⴰ ⴰⵙⴰⵖⵓⵍ ⵏ ⵉⵎⴰⵏⵏⴰⵢⵏ ⵏ ⵙⵙⵉⵏⵉⵎⴰ ⵜⴰⵎⴰⵣⵉⵖⵜ, ⵉⴳ ⵢⴰⵜ ⵜⵏⵜⵜⴰⵎⵜ ⵍⵍⵉ ⵉⵣⵎⵎⵉⵎⵏ ⵢⴰⵜ ⵜⵙⴳⴰ ⴳ ⵜⵎⴽⵜⵉⵜ ⵏⵏⵖ ⵜⴰⴳⵔⴰⵡⴰⵏⵜ ⴷ ⵜⴰⵢⵙⵉ ⵏⵏⵖ ⵜⴰⴷⵍⵙⴰⵏⵜ.
ⴰⴳⵯⵔⵔⴰⵎ, ⵉⴼⵍ ⵜⵉⵙⴰⵙⵍⵉⵏ ⵏⵏⵙ ⴰⵡⴷ ⴳ ⵢⵉⴳⵔ ⵏ ⵓⵙⵙⵓⴼⴼⵖ ⴷ ⵓⵙⵓⵍⵍⴼ ⵏ ⵙⵙⵉⵏⵉⵎⴰ, ⵜⵉⵣⵉ ⵍⵍⵉ ⵉⴷⵔⴰ ⴳ ⵜⵡⵓⵔⵉⵡⵉⵏ ⵣⵓⵏ ⴷ: “ⴷⴷⵡⵉⴱⴰ”, ⴷ “ⵃⴷⵉⴷⴷⴰⵏ”. ⵎⴽ ⵍⵍⵉ ⵢⵉⵡⵙ ⴳ ⵢⵉⴳⵔ ⵏ ⴷⴷⵓⴱⵍⴰⵊ, ⵎⴽ ⴰⵏⵏ ⴰⴷ ⵙ ⴱⴷⴷⴰ ⵉⵍⵍⴰ ⴳ ⵓⴱⴰⵔⴰⵣ, ⵉⴳ ⵜⵉⴼⴰⵡⵜ ⵉ ⵉⵏⵓⵥⴰⵕ ⵓⵍⴰ ⴰⴳⴷⵓⴷ.
ⴰⵙⵙⵎⵖⵔ ⵏ ⵎⵓⵃⵎⵎⴰⴷ ⵚⴰⵍⵓⵜ (ⴰⴳⵯⵔⵔⴰⵎ), ⵉⴳⴰ ⴰⵙⵙⵎⵖⵔ ⵉ ⵢⴰⵜ ⵜⵡⴰⴷⴰ ⵜⴰⵏⴰⵥⵓⵕⵜ ⴷ ⵜⵏⴰⴼⴳⴰⵏⵜ ⵉⴽⵜⴰⵔⵏ ⵙ ⵜⵉⴽⴽⵉ, ⵉⴳ ⴰⵙⵙⵎⵖⵔ ⵉ ⵢⴰⵏ ⵓⵔⴳⴰⵣ ⵍⵍⵉ ⵉⵙⴽⵔⵏ ⴳ ⵜⵥⵓⵕⵉ ⵢⴰⵏ ⵢⵉⵎⵉⵙⵙ ⵍⵍⵉ ⵙ ⵉⴼⵔⴳ ⵜⵉⵎⴽⵜⵉⵜ, ⵢⴰⵔⵉ ⵜⴰⵎⴰⴳⵉⵜ, ⵉⵙⵙⵉⵡⴹ ⵜⴰⴷⵍⵙⴰ ⵜⴰⵎⴰⵣⵉⵖⵜ ⵉ ⵜⵣⴰⴼⵉⵡⵉⵏ ⴷ ⵉⴷⴷⴰⵏ.
ⵜⴰⵏⵎⵎⵉⵔⵜ ⴰ ⴰⴳⵯⵔⵔⴰⵎ ⵅⴼ ⵜⴰⵢⵙⵉ ⵜⴰⵏⴰⵥⵓⵕⵜ ⴷ ⵜⴷⵍⵙⴰⵏⵜ ⴰⴷ ⵉⴱⵖⵔⵏ, ⵜⴰⵏⵎⵎⵉⵔⵜ ⴼ ⵓⴳⴳⴰⵔ ⵏ ⵓⵣⴳⵏ ⵏ ⵜⴰⵙⵓⵜ ⵏ ⵜⵉⴽⴽⵉ ⵉ ⵜⵥⵓⵕⵉ ⴷ ⵜⴷⵍⵙⴰ ⵜⴰⵎⴰⵣⵉⵖⵜ.
