- ⴰⴳⴰⴷⵉⵔ – ⵙⴳ 1 ⴰⵔ 5 ⴽⵟⵓⴱⵕ 2026//
ⴷⴼⴼⵉⵔ ⵎⴰⴷ ⵏⵎⵍⴰ ⵉⵙⵓⵔⴰ ⵍⵍⵉ ⴷⵔⴰⵏⵉⵏ ⴳ ⵜⵎⵣⵉⵣⵣⵍⵜ ⵏ ⵜⵙⵎⵖⵓⵔⵜ ⵜⴰⵏⴰⵎⵓⵔⵜ ⵜⵓⵙⵙⵏⴰ ⵜⴰⵎⴰⵣⵓⵖⵜ ⴰⵏⴰⵡ ⵏ ⵓⵙⴰⵔⵓ ⴷ ⵜⴰⵢⵎⵓⵏⵜ ⵏ ⵜⵏⴼⵔⴰⵢⵜ ⵍⵍⵉ ⵜⵏ ⵉⵡⴰⵍⴰⵏ, ⵀⴰ ⴷ ⴰⵏⵎⵉⴳⴳⴰⵔ ⵏ ⵉⵙⵏⵉ ⵏ ⵡⵓⵔⵖ ⵉⵙⵎⴷ ⵏⵉⵜ ⵙⵓⵍ ⴰⵔ ⵉⵎⵎⴰⵍ ⵜⴰⵢⵎⵓⵏⵉⵏ ⵏ ⵜⵏⴼⵔⴰⵢⵜ ⵍⵍⵉ ⵔⴰⴷ ⵉⵡⴰⵍⴰ ⵜⵉⵡⵓⵔⵉⵡⵉⵏ ⵏ ⵜⵎⵣⵉⵣⵣⵍⵜ ⵜⴰⵎⴰⵣⵉⵖⵜ ⴷ ⵜⵎⵣⵉⵣⵣⵍⵜ ⵜⴰⴳⵔⴰⵖⵍⴰⵏⵜ, ⴽⵓ ⵢⴰⵜ ⴳⵉⵙⵏⵜ ⴳⵉⵙ 10 ⵉⵙⵓⵔⴰ.
ⵜⴰⵙⵙⵓⵜⵍⵜ ⴰⴷ ⵜⵜⵓⵙⵏⵎⴰⵍⴰ ⵙ ⵡⴰⵙⵙⴰⵔ ⴷ ⵜⵙⴳⴰ ⵏ ⵙⵓⵙ ⵎⴰⵙⵙⴰ ⴷ ⵓⵙⵇⵇⵉⵎ ⴰⵖⵉⵡⴰⵏ ⵏ ⵓⴳⴰⴷⵉⵔ ⴷ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ (IRCAM).
ⵜⴰⵎⵣⵉⵣⵣⵍⵜ ⵜⴰⵎⴰⵣⵉⵖⵜ
ⵜⵓⵎⴰ ⵜⴰⵢⵎⵓⵏⵜ ⵏ ⵜⵏⴼⵔⴰⵢⵜ ⴽⵕⴰⴹ ⵡⴰⵡⵔⵉⴽⵏ ⵍⵍⵉ ⵉⵙⴳⵓⴷⵉⵏ ⵜⴰⵡⴰⴷⴰ ⵜⴰⴽⵙⵡⴰⵜ ⴷ ⵜⵉⵔⵎⵉⵜⵉⵏ ⵉⴳⴰⵏ ⵡⴰⵥ :
- ⵄⵉⵛⴰ ⴱⴰⵕⴰ : ⵜⴰⵙⵍⵎⴰⴷⵜ ⵏ ⵜⵓⵜⵍⴰⵢⵜ ⵜⴰⴼⵕⴰⵏⵉⵙⵜ ⴳ ⵜⵖⵉⵡⴰⵏⵜ ⵏ ⵜⵓⵜⵍⴰⵢⵉⵏ ⴷ ⵜⵥⵓⵕⵉⵡⵉⵏ ⴷ ⵜⵎⴰⵙⵙⴰⵏⵉⵏ ⵜⵉⵏⴰⴼⴳⴰⵏⵉⵏ ⴳ ⴰⵢⵜ ⵎⵍⵍⵓⵍ, ⵜⴰⵙⴷⴰⵡⵉⵜ ⵏ ⵉⴱⵏ ⵥⵓⵀⵕ. ⵜⴳⴰ ⵜⴰⵎⴰⵥⵍⴰⵢⵜ ⴳ ⵓⵙⵙⴼⵙⵉ ⵏ ⵉⵏⵏⴰⵡ, ⴷ ⵓⴼⵔⴰⵏ ⴰⵙⴽⵍⴰⵏ ⴷ ⵓⵎⵢⴰⵡⴰⴹ.
- ⵃⴰⵙⴰⵏ ⴱⵓⵎⵍⵉⴽ : ⵢⴰⵏ ⵙⴳ ⵜⴷⵓⴳⴰⵎⵉⵏ ⵏ ⵜⵥⵓⵕⵉ ⵜⴰⵎⴰⵣⵉⵖⵜ, ⵉⴳ ⵢⴰⵏ ⵙⴳ ⵉⵙⵓⵜⴰⵔ ⵍⵍⵉ ⵎⵎⴰⵖⵏⵉⵏ ⴰⴷ ⵉⴱⴷⴷ ⵓⵥⴰⵡⴰⵏ ⴰⵎⴰⵣⵉⵖ ⵙⴳ ⵉⵙⴳⴳⵯⴰⵙⵏ ⵏ ⵙⴰⵜ ⵜⵎⵔⴰⵡⵉⵏ ⴰⴷ ⵉⵣⵔⵉⵏ, ⵉⵙⵎⵓⵏ ⵃⴰⵙⴰⵏ ⴱⵓⵎⵍⵉⴽ ⴳⵔ ⵜⵓⵏⵥⵉⵥⵜ ⵏ ⵓⵙⵏⴼⵍⵓⵍ ⴷ ⵓⴱⵟⵟⵓ ⴰⵎⵥⵥⴰⵡⴰⵏ ⵉⵙⴷⴷⵉⴷⵏ, ⵎⴽ ⵍⵍⵉ ⵉⴳⴰ ⵡⴰⵥ ⴳ ⵓⵙⵎⵓⵔ ⵙ ⵓⴳⵉⵟⴰⵕ ⴷ ⵍⵓⵟⴰⵕ, ⵙ ⵎⴽ ⴰⵏⵏ ⵉⴳⴰ ⵢⴰⵜ ⵜⵉⴷⴷⵉ ⵜⴰⵏⴰⵥⵓⵕⵜ ⵢⴰⵜⵜⵓⵢⵏ ⵉⴼⵍⵏ ⵜⵉⵙⴰⵙⵍⵉⵏ ⵏⵏⵙ ⴳ ⵡⴰⵔⵔⴰⵜⵏ ⵏ ⵓⵥⴰⵡⴰⵏ ⴰⵏⴰⵎⵓⵔ.
- ⴰⴽⵙⵉⵍ : ⵉⴳⴰ ⴰⵎⵙⵙⵓⴼⴼⵖ ⵍⵍⵉ ⴷ ⴷⴰⵔ ⵜⵍⵍⴰ, ⵉⴳ ⴱⴰⴱ ⵏ ⵢⴰⵏ ⵓⵙⵎⵎⴰⵇⵇⵍ ⵉ ⵙⵙⵉⵏⵉⵎⴰ ⵉⴳⴰⵏ ⵡⴰⵥ, ⵉⵙⵙⵏⵜⵉ ⵜⴰⵡⴰⴷⴰ ⵏⵏⵙ ⵙⴳ ⵜⵎⵙⴷⴰⴳⵜ ⵉⵍⵎⵎⴰ ⵙ ⵙⵙⵉⵏⵉⵎⴰ, ⵎⴰ ⴰⵏⵏ ⴳⵔ ⵙⴱⴰⵏⵢⴰ ⴷ ⵎⴰⵔⵉⴽⴰⵏ, ⵎⴰ ⴰⵏⵏ ⵓⵔⵜⴰ ⵉⵙⴽⵔ ⴰⵙⵙⵓⴼⴼⵖ ⵉ 60 ⵏ ⵜⵙⴷⴷⴰⵔⵜ ⵏ ⵢⴰⵏ ⵉⵎⵙⴷⴷⵉ ⴰⴽⵓⵎⵉⴷⵉⵢ ⵉⵜⴱⴰⴷⵓⵜ ⵜⴰⵎⴰⵣⵉⵖⵜ, ⵉⵙⵓⴼⴰ ⵓⵥⵏⵥⴰⵕ ⵏⵏⵙ ⵙ ⵙⵉⵏ ⵉⵙⵓⵔⴰ ⵖⵣⵣⵉⴼⵏⵉⵏ : “ⵉⴼⵙⵙⵉ ⵉⵏⵇⵇⴰⵏ” ⵍⵍⵉ ⵙ ⵢⵉⵡⵉ ⵜⴰⵙⵎⵖⵓⵔⵜ ⵏ ⵓⵙⵉⵏⴰⵔⵢⵓ ⴰⵎⵓⴼⴰⵢ.
ⵜⴰⵎⵣⵉⵣⵣⵍⵜ ⵜⴰⴳⵔⴰⵖⵍⴰⵏⵜ
ⵜⵉⵎⵣⵉⵣⵣⵍⵜ ⵜⴰⴳⵔⴰⵖⵍⴰⵜ ⵍⵍⴰⵏ ⴳⵉⵙ ⴽⵕⴰⴹ ⵉⵎⴰⵣⵣⵓⵍⵏ ⴳ ⵙⵙⵉⵏⵉⵎⴰ :
- ⵊⵓⵏ ⴱⵢⵉⵔ ⴽⵉⵎⴰⵏⵙ : ⵉⴳⴰ ⴰⵏⴰⴼⵓⵖ ⵏ ⵓⵙⵉⵏⴰⴳ (INSAS) ⴳ ⴱⵔⵓⴽⵙⵉⵍ ⴷ ⵓⵙⵉⵏⴰⴳ ⴰⵎⵉⵔⵉⴽⴰⵏ ⵏ ⵙⵙⵉⵏⵉⵎⴰ ⴳ ⵍⵓⵙ ⴰⵏⵊⵉⵍⵓⵙ, ⵉⴳⴰ ⴰⵎⵙⵙⵓⴼⴼⵖ ⴷ ⵓⵎⵙⵢⴰⴼⵓ ⴰⵙⵉⵏⵉⵎⴰⵉ ⴱⴰⵀⵔⴰ ⵉⵜⵜⵓⵙⵙⴰⵏⵏ, ⴷⴼⴼⵉⵔ ⵎⴰⴷ ⵉⵙⴽⵔ ⴰⵙⵙⵓⴼⴼⵖ ⵉ ⵜⵓⴳⵜⵜ ⵉⵙⵓⵔⴰ ⵍⵍⵉ ⴳ ⵉⴳⴰ ⵓⵙⴰⵔⵓ ⵏ “ⴰⵃⴰⵏⵓ ⴰⵥⴳⴳⵯⴰⵖ” ⴷ ⴽⵔⴰ ⵏ ⵉⵎⵙⴷⴷⵉⵜⵏ ⵉ ⵓⵥⵟⵟⴰ ⵏ RTBF, ⵉⵙⴽⵔ ⴰⴽⵓⴷ ⴰⵏⵏ ⵜⴰⵎⴰⵙⵓⵔⵜ, ⵉⵙⵙⴰⵖ ⴰⵙ Dream Factory, ⵉⴳⴰ ⵢⴰⵏ ⵙⴳ ⵡⵉⵍⵍⵉ ⴷ ⵙⵙⴳⵔⴰⵏⵉⵏ “ⵜⵉⵏⵎⵍ ⵜⴰⴱⵉⵍⵊⵉⴽⵉⵢⵜ ⵉ ⵓⴼⵉⴷⵢⵓ ⴽⵍⵉⴱ” ⴷⴼⴼⵉⵔ ⵎⴰⴷ ⵉⵙⴽⵔ ⴰⵙⵙⵓⴼⴼⵖ ⵉ ⵎⴰⴷ ⵉⵜⵜⴳⴳⴰⵏ ⵜⵉⵎⵉⴹⵉ ⵏ ⵓⴼⵉⴷⵢⵓ ⴽⵍⵉⴱ.
- ⵉⵥⴰⴱⵉⵍ ⴱⵏ ⴽⵉⵎⵓⵏ : ⵜⴳⴰ ⵜⴰⵎⵙⵙⵓⴼⴼⵖⵜ ⴷ ⵜⵎⴰⵔⴰⵜ ⵏ ⵓⵙⵉⵏⴰⵔⵢⵓ, ⵜⴳ ⴰⵡⴷ ⵜⴰⵏⵙⴼⴰⵡⵜ ⴳ ⵓⵏⵢⴰⵍⴽⴰⵎ ⵏ ⵙⵙⵉⵏⵉⵎⴰ, ⵜⵎⵓⵏ ⴱⴷⴷⴰ ⵉⵥⴰⴱⵉⵍ ⴱⵏ ⴽⵉⵎⵓⵏ ⴷ ⵙⵙⵉⵏⵉⵎⴰ ⵜⴰⵙⵉⵎⴰⵏⵜ ⵓⴳⴳⴰⵔ ⵏ ⵙⵉⵎⵔⴰⵡ ⵏ ⵓⵙⴳⴳⵯⴰⵙ, ⵜⴳⴰ ⵏⵏ ⵜⵓⴳⵜⵜ ⵏ ⵜⵣⵎⵎⴰⵔ ⴼⴰⴷ ⴰⴷ ⵜⵙⵙⵉⵡⴹ ⵜⴰⵥⵓⵕⵉ ⵏ ⵙⵙⵉⵏⵉⵎⴰ, ⵜⵙⵎⵓⵏ ⴷⵉⴷⵙ ⴰⵙⵏⴼⵍⵓⵍ ⴷ ⵓⴱⵟⵟⵓ ⴷ ⵜⵉⵍⴰⵍ ⵜⵉⴷⵍⵙⴰⵏⵉⵏ, ⵎⴰ ⴰⵏⵏ ⵙ ⵢⴰⵏ ⵓⵏⵏⵖⵣⵍ ⴱⴰⵀⵔⴰ ⵢⴰⵜⵜⵓⵢⵏ, ⵎⴽ ⴷⴰ ⵜⵙⴽⵔ ⴳ ⵓⵡⵜⵜⴰⵙ ⵏⵏⵙ ⴰⴷ ⵜⵙⵙⵍⴽⵎ ⵜⵉⵡⵉⵔⵉⵡⵉⵏ ⵏ ⵙⵙⵉⵏⵉⵎⴰ ⵉ ⵡⵉⵢⵢⴰⴹⵏ ⵙⵍⴰⵡⴰⵏⵏ ⴰⴽⴽ ⵍⵍⵉⵖ ⵜⵙⴽⵔ ⴰⵙⵙⵓⴼⴼⵖ ⵉ ⵓⵙⵔⵓ ⵏⵏⵙ ⵓⵏⵜⵉⵎ “ⵉⵙⵔⴰⴳⵏ ⵏ ⵡⴰⵡⴰⵏⴽ” ⵍⵍⵉ ⵢⵉⵡⵉⵏ ⵜⵓⴳⵜⵜ ⵏ ⵜⵙⵎⵖⵓⵔⵉⵏ ⴳ ⵜⵓⴳⵜⵜ ⵏ ⵉⵍⵎⵓⴳⴳⴰⵔⵏ ⵉⴳⵔⴰⵖⵍⴰⵏⵏ, ⵜⴳ ⵉⵍⵎⵎⴰ ⵜⴰⵎⴰⵙⵙⴰⵔⵜ ⴳ ⵜⵎⴰⵙⵓⵔⵜ ⵏⵓⵔ ⴼⵉⵍⵎ, ⴰⴽⵓⴷ ⴰⵏⵏ ⴰⴷ ⵜⵡⴰⵍⴰ ⴰⴱⵟⵟⵓ ⵏ ⵙⵉⵎⵔⴰⵡ ⵏ ⵓⵙⴰⵔⵓ ⴳ ⵜⴷⴰⵍⵉⵡⵉⵏ ⵏ ⵙⵙⵉⵏⵉⵎⴰ.
- ⵙⴰⵎⵉⵔ ⴱⵏⵢⴰⵄⵍⴰ : ⴷⴼⴼⵉⵔ ⵜⴰⵣⵔⴰⵡⵜ ⵏⵏⵙ ⴳ ⵜⵎⴰⵙⵙⴰⵏⵉⵏ ⵏ ⵓⵙⵏⵖⵎⵙ ⴷ ⵓⵏⵢⴰⵍⴽⴰⵎ ⴳ ⴷⴷⵣⴰⵢⵔ, ⵉⵙⵡⵡⵓⵔⵉ ⴳ ⵜⵎⴰⵙⵓⵔⵜ ⵏ ⵓⵙⵎⵉⵥⵕ, ⵢⵉⵡⵙ ⴳ ⵜⵉⴳⴳⴰ ⵏ ⵜⵓⴳⵜⵜ ⵏ ⵜⵡⵡⵓⵔⵉⵡⵉⵏ ⵏ ⵜⵜⵉⵍⵉⴼⵉⵣⵢⵓⵏ ⵜⵉⵏⵎⵔⵙⴰⵍⵉⵏ, ⵉⵙⵡⵡⵓⵔⵉ ⴷ ⴰⵎⴰⵡⴰⵙ ⵏ ⵓⴼⴰⵔⵙ ⴷ ⵓⵜⵉⵇⵏⵉⵢ, ⵉⵍⵎⵎⴰ ⵉⵙⵎⴷ ⵜⴰⵡⴰⴷⴰ ⵏⵏⵙ ⵜⴰⴽⴰⴷⵉⵎⵉⵢⵜ ⴳ ⵢⵉⴳⵔ ⵏ ⵓⵙⵏⵖⵎⵙ ⴷ ⵙⵙⵉⵏⵉⵎⴰ, ⵉⵍⵎⵎⴰ ⵉⵎⵎⴰⵜⵜⵉ ⵙ ⴼⵕⴰⵏⵚⴰ, ⴰⴽⵓⴷ ⴰⵏⵏ ⵍⵍⵉⵖ ⵉⵙⵙⵓⴼⴼⵖ ⵉⴽⵛⵎ ⵙ ⵓⵙⵉⵏⴰⴳ ⴰⵏⴰⵎⵓⵔ ⵏ ⵙⵙⵉⵏⵉⵎⴰ ⴷ ⵜⵡⵍⵍⴰⴼⵜ ⵉⵜⵜⵎⵓⵙⵙⵓⵏ ⴳ ⴱⴰⵔⵉⵣ, ⵖⵉⵏⵏ ⴰⴷ ⴳ ⵉⵡⴰⵍⴰ ⵜⴰⵎⵀⵍⴰ ⵜⴰⵢⵎⵓⵏⵜ ⵏ ⵡⴰⵏⵏⴰⵍ ⵏ ⵉⵙⵉⵏⴰⵔⵢⵓⵜⵏ ⵏ ⵉⵙⵓⵔⴰ ⵖⵣⵣⵉⴼⵏⵉⵏ.
ⵙⵏⴰⵜ ⵜⴰⵢⵎⵓⵏⵉⵏ ⴰⴷ ⴰⴷ ⵉⵙⵎⵓⵏ ⵓⵏⵎⵓⴳⴳⴰⵔ ⵏ ⵉⵙⵏⵉ ⵏ ⵡⵓⵔⵖ ⴼⴰⴷ ⴰⴷ ⵡⴰⵍⴰⵏⵜ ⵜⵉⵖⵔⵉ ⴷ ⵓⴼⵔⴰⵏ ⵏ ⵉⵙⵓⵔⴰ ⵍⵍⵉ ⴷⵔⴰⵏⵉⵏ ⴳ ⵜⵙⵙⵓⵜⵍⵜ 17.
ⴰⵏⵎⵓⵇⵇⴰⵔ ⵏⵏⵖ ⴳ ⵓⴳⴰⴷⵉⵔ ⵙⴳ 1 ⴰⵔ 5 ⴽⵟⵓⴱⵔ 2026 ⴳ ⵙⵙⵉⵏⵉⵎⴰ ⵚⵃⴰⵕⴰ, ⴳ ⵜⴰⵍⴱⵔⵊⵜ
