FINIFA 2026 : ⵜⴰⵢⵎⵓⵏⵜ ⵏ ⵜⵏⴼⵔⴰⵢⵜ ⵏ ⵜⵙⵎⵖⵓⵔⵜ ⵜⴰⵏⴰⵎⵓⵔⵜ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ – ⴰⵏⴰⵡ ⵏ ⵓⵙⴰⵔⵓ ⴰⵎⴰⵣⵉⵖ..ⴰⴳⴰⴷⵉⵔ ⵜⴰⵎⴰⵥⵓⵏⵜ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵙⴳ 1 ⴰⵔ 5 ⴽⵟⵓⴱⵕ 2026
ⴳ ⵜⴰⵍⵖⴰ ⵏ ⵉⵎⵓⵙⵙⵓⵜⵏ ⵏ ⵜⵙⵙⵓⵜⵍⵜ ⵜⵉⵙⵙ 17 ⵏ ⵓⵏⵎⵓⴳⴳⴰⵔ ⴰⴳⵔⴰⵖⵍⴰⵏ ⵉⵙⵏⵉ ⵏ ⵡⵓⵔⵖ ⵉ ⵓⵙⴰⵔⵓ ⴰⵎⴰⵣⵉⵖ FINIFA, ⵍⵍⵉ ⵔⴰⴷ ⵉⵜⵜⵓⵙⵏⵎⴰⵍⴰ ⴳ ⵜⵖⵔⵎⵜ ⵏ ⵓⴳⴰⴷⵉⵔ, ⵜⴰⵎⴰⵥⵓⵏⵜ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵙⴳ 1 ⴰⵔ 5 ⴽⵟⵓⴱⵕ 2026, ⵔⴰⴷ ⵜⵡⴰⵍⴰ ⵢⴰⵜ ⵜⴰⵢⵎⵓⵏⵜ ⴱⴰⵀⵔⴰ ⵉⴳⴰⵏ ⵜⴰⴽⵙⵡⴰⵜ ⴰⴼⵔⴰⵢ ⵏ ⵜⵙⵙⵓⵜⵍⵜ ⴰⴷ ⵙⵍⴰⵡⴰⵏⵏ ⴰⴽⴽⵯ ⵙ ⵜⵎⵣⵉⵣⵣⵍⵜ ⵍⵍⵉ ⵉⵥⵍⵏ ⵙ ⵡⴰⵏⴰⵡ ⵏ ⵓⵙⴰⵔⵓ ⴰⵎⴰⵣⵉⵖ ⴳ ⵜⵎⵣⵉⵣⵣⵍⵜ ⵏ ⵜⵙⵎⵖⵓⵔⵜ ⵜⴰⵏⴰⵎⵓⵔⵜ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⵉⵙⵡⴰⵍⴰ ⵓⵙⵉⵏⴰⴳⴰ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ IRCAM ⵉ ⵜⵎⵙⵎⵓⵏⵜ ⴰⵏⵎⵓⴳⴳⴰⵔ ⵏ ⵉⵙⵏⵉ ⵏ ⵡⵓⵔⵖ.
ⵉⵡⴰⵍⴰ ⵓⵏⵎⵓⴳⴳⴰⵔ ⵏ ⵉⵙⵏⵉ ⵏ ⵡⵓⵔⵖ ⴰⴳⵔⴰⵖⵍⴰⵏ ⴰⵙⵏⵎⴰⵍⴰ ⵏ ⵜⵙⵎⵖⵓⵔⵜ ⵜⴰⵏⴰⵎⵓⵔⵜ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵍⵍⵉ ⵢⴰⴽⴽⴰ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴽⵓ ⴰⵙⴳⴳⵯⴰⵙ ⵙ ⵜⵎⵍⴷⴰ ⵏ ⵓⵙⴼⵓⴳⵍⵓ ⵙ ⵢⵉⵏⵏⴰⵡ ⴰⴳⵍⴷⴰⵏ ⴰⵏⵎⵣⵔⵓⵢ, ⵍⵍⵉ ⵉⵙⴽⵔ ⴱⴰⴱ ⵏ ⵜⴰⵜⵜⵓⵢⵜ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙⵙ ⵚⴹⵉⵚ ⴰⵙⵙ ⵏ 17 ⴽⵟⵓⴱⵕ 2001.
ⵜⴰⵢⵎⵓⵏⵜ ⵏ ⵜⵏⴼⵔⴰⵢⵜ
- ⴱⵔⴰⵀⵉⵎ ⵃⵙⵏⴰⵡⵉ: ⵉⴳⴰ ⴰⵎⵏⵀⴰⵍ ⵏ ⵓⵔⵣⵣⵓ ⴳ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⵉⴳ ⴰⵎⴰⵥⵍⴰⵢ ⴳ ⵜⵡⵍⵍⴰⴼⵜ ⴷ ⵙⵙⵉⵏⵉⵎⴰ.
- ⵏⵓⵕⴰ ⵍⴰⵥⵕⴰⵇ: ⵜⴳⴰ ⵜⴰⵎⵔⵣⵓⵜ ⴳ ⵜⵙⵏⵉⵍⵙⵜ ⴳ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ.
- ⵢⴰⵙⵉⵏ ⵃⵓⵔⵜⴰⵏ: ⵉⴳⴰ ⴰⵜⵉⵇⵏⵉⵢ ⴳ ⵜⵏⴰⴼⵓⵜ ⵏ ⵓⵏⵢⴰⵍⴽⴰⵎ, ⵎⴽ ⵍⵍⵉ ⵉⵟⵟⴰⴼ ⴰⵡⴷ ⵜⵉⵔⵎⵉⵜ ⴳ ⵜⵡⵍⵍⴰⴼⵜ ⴷ ⵓⵙⵍⵉⵥⵕ.
- ⵎⵚⵟⴰⴼⴰ ⵚⵚⵖⵉⵕ: ⵉⴳⴰ ⴰⵎⵔⵣⵓ ⴳ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⵉⴳⴰ ⴰⵎⴰⵥⵍⴰⵢ ⴳ ⵜⴷⵉⴷⴰⴽⵜⵉⴽⵜ ⴷ ⵓⵙⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ.
ⵜⴰⵢⵎⵓⵏⵜ ⴰⴷ ⵜⴳⴰ ⵜⵓⴼⵓⵜ ⵏ ⵉⵎⵔⵣⵓⵜⵏ ⴳ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵍⵍⵉ ⵔⴰⴷ ⵢⵉⵍⵉ ⵅⴼ ⵜⵡⵡⵓⵔⵉⵡⵉⵏ ⵏ ⵉⵎⵙⵙⵓⴼⵖⵏ ⴷⴰ ⵙⵙⴰⵔⵏⵉⵏ ⵙ ⵉⵙⵓⵔⴰ ⵏⵏⵙⵏ ⴳ ⵜⵙⵙⵓⵜⵍⵜ ⴰⴷ ⵏ ⵓⵏⵎⵓⴳⴳⴰⵔ, ⴷ ⵔⴰⴷ ⴰⵡⵙⵏ ⴳ ⵓⵙⵓⵜⵜⴳ ⵏ ⵜⵙⴳⴳⵡⵉⵏ ⵜⵉⴷⵍⵙⴰⵏⵉⵏ ⴷ ⵜⵏⴰⵥⵓⵕⵉⵏ ⴳ ⵜⵡⵡⵓⵔⵉⵡⵉⵏ ⴰⴷ.
ⵚⴹⵉⵚ ⵉⵙⵓⵔⴰ ⴳ ⵜⵎⵣⵉⵣⵣⵍⵜ
ⴳ ⵜⵎⵣⵉⵣⵣⵍⵜ ⴰⴷ, ⴳⵉⵙ ⵚⴹⵉⵚ ⵉⵙⵓⵔⴰ ⵉⵎⵖⵏⵏⴰⵏⵏ ⵍⵍⵉ ⴳⴰⵏⵉⵏ :
- ⴳⵯⵏⴷⴰⴼⴰ, ⵏ ⵄⴰⵍⵉ ⴱⵏⵊⵍⵍⵓⵏ – 96 ⵏ ⵜⵓⵙⴷⴰⴷⵜ
- ⵍⵃⵉⵍⵜ, ⵏ ⵙⴰⵄⴷ ⴷⴷⵉⵏ ⴱⴰⵀⵉ – 15 ⵏ ⵜⵓⵙⴷⴰⴷⵜ
- ⴰⵏⵍⵎⴰⴷ ⵏ ⵡⵓⵙⵓⵏ, ⵏ ⵢⴰⵙⵉⵏ ⴰⵢⵜ ⵓⴼⵇⵇⵉⵔ – 7 ⵏ ⵜⵓⵙⴷⴰⴷⵉⵏ
- ⵜⴰⵡⵏⵣⴰ, ⵏ ⵕⴰⵛⵉⴷ ⵍⵎⵇⵇⴷⴷⵎ – 12 ⵏ ⵜⵓⵙⴷⴰⴷⵜ
- ⵜⵉⵏⵉⵔⵜ ⵉⴼⵙⵙⵉⵏ, ⵏ ⵙⵎⴰⵄⵉⵍ ⴰⵢⵜ ⵍⵃⵙⵏ – 8 ⵏ ⵜⵓⵙⴷⴰⴷⵉⵏ
- ⵙⵉⵏ ⵉⵙⴰⴽⴰⵜⵏ, ⵏ ⵢⴰⵙⵉⵏ ⵉⴳⵏⴼⵔ – 5 ⵏ ⵜⵓⵙⴷⴰⴷⵉⵏ
ⵜⵉⵡⵡⵓⵔⵉⵡⵉⵏ ⴰⴷ ⴰⵔ ⵎⵎⴰⵍⵏⵜ ⵜⴰⴱⵖⵔⵜ ⴷⴰ ⵉⵍⵍⴰⵏ ⴳ ⵜⵉⵔⵎⵉⵜⵉⵏ ⵏ ⵉⵙⵎⵙⵙⵓⴼⵖⵏ ⵉⵄⵔⵔⵉⵎⵏ ⵍⵍⵉ ⵔⴰⴷ ⵢⴰⵡⵙ ⴳ ⵓⵙⴱⵓⵖⵍⵓ ⵏ ⵙⵙⵉⵏⵉⵎⴰ ⵜⴰⵎⴰⵣⵉⵖⵜ ⵏ ⵡⴰⵙⵙ ⴰⴷ.
ⵜⴰⵙⵙⵓⵜⵍⵜ ⴰⴷ ⴰⵔ ⵜⵙⴼⵓⴳⵍⵓ ⵙ ⵓⵙⵏⴼⵍⵓⵍ ⵏ ⵙⵙⵉⵏⵉⵎⴰ ⵜⴰⵎⴰⵣⵉⵖⵜ
ⵙⴳ ⴰⵢⵍⵍⵉ ⵉⵎⵙⴰⵙⴰⵏ ⴷ ⵜⵎⵣⵉⵣⵣⵍⵜ ⴰⴷ, ⵉⵙⵎⴷ ⵓⴽⴰⵏ ⵙⵓⵍ ⵉⵙⵏⵉ ⵏ ⵡⵓⵔⵖ ⴳ ⵡⴰⵏⵏⴰⵍ ⵏⵏⵙ ⵏ ⵜⵥⵓⵕⵉ ⴷ ⵙⵙⵉⵏⵉⵎⴰ ⵜⴰⵎⴰⵣⵉⵖⵜ, ⵉⴼⴽ ⴰⴼⵓⵙ ⵏ ⵜⵡⵓⵣⵉ ⵉ ⵄⵔⵔⵉⵎⵏ ⵏⵏⵖⵣⵍⵏⵉⵏ ⵙ ⵙⵙⵉⵏⵉⵎⴰ, ⵢⴰⵡⵙ ⵉ ⵙⴳⴱⴰⵔⵏ, ⵉⵎⵎⴰⵖ ⴰⴷ ⵉⵙⴽⵔ ⵢⴰⵏ ⵓⵙⴰⵢⵔⵓⵔ ⵍⵍⵉ ⴳ ⵔⴰⴷ ⵙⵏⴼⵍⵏ ⴰⵢⵜ ⵙⵙⵉⵏⵉⵎⴰ ⵜⵉⵔⵎⵉⵜⵉⵏ ⵏⵏⵙⵏ ⴳ ⵜⴰⵍⵖⴰ ⵏ ⵓⵙⴱⵓⵖⵍⵓ ⵏ ⵙⵙⵉⵏⵉⵎⴰ ⵜⴰⵎⴰⵣⵉⵖⵜ ⴷ ⵓⵙⵓⵜⵜⴳ ⵏ ⵜⵓⵜⵍⴰⵢⵜ ⵜⴰⵍⴰⵣⵉⵖⵜ ⴷ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴷ ⵜⵎⴽⵜⵉⵜ.
ⵜⴰⵙⵙⵓⵜⵍⵜ ⴰⴷ ⵜⵜⵓⵙⵏⵎⴰⵍⴰ ⵙ ⵡⴰⵙⵙⴰⵔ ⴷ ⵓⵙⵇⵇⵉⵎ ⴰⵖⵉⵡⴰⵏ ⵏ ⵓⴳⴰⴷⵉⵔ ⴷ ⵜⵎⵏⴰⴹⵜ ⵏ ⵙⵓⵙ ⵎⴰⵙⵙⴰ ⴷ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ.
