ⵜⵉⵢⴰⴼⵓⵜⵉⵏ ⴷ ⵉⵙⵖⵍⴰⴼ ⵉⵎⵣⵡⵓⵔⴰ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵅⴼ ⵜⵙⴽⴰⵏⵉⵏ ⵏⵏⵉ ⵙⵙⵏⵏⵜ ⴽⵔⴰ ⵏ ⵜⵎⴷⵉⵏⵉⵏ ⵜⵉⵎⵖⵔⵉⴱⵉⵢⵉⵏ

ⵜⴰⵙⵏⴰ ⵜⴰⵎⵣⵡⴰⵔⵓⵜ ⴰⵙⴷⴰⵡ ⴰⵏⵖⵎⴰⵙ ⴰⵙⵉⵡⴹ ⴰⵏⵖⵎⴰⵙ : ⵜⵉⵢⴰⴼⵓⵜⵉⵏ ⴷ ⵉⵙⵖⵍⴰⴼ ⵉⵎⵣⵡⵓⵔⴰ ⵏ…
ⵉⵜⵜⵡⴰⴼⵙⴰⵔ ⴳ 2 ⴽⵟⵓⴱⵕ 2025

ⵜⵙⵏⵎⴰⵍⴰ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰ, ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⴰⵙⵙ ⵏ ⵓⴽⵕⴰⵙ 01 ⴽⵟⵓⴱⵕ 2025, ⵢⴰⵏ ⵓⴳⵔⴰⵡ ⴰⵎⵉⵔⵉⵡ ⴰⴽⴷ ⵜⵏⵙⵙⵉⵅⴼⵉⵏ ⴷ ⵉⵏⵙⵙⵉⵅⴼⵏ ⵏ ⵜⵙⵇⵇⵉⵎⵉⵏ ⵜⵉⵏⵎⵏⴰⴹⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵏⵎⵀⴰⵍⵏ ⴷ ⵉⵎⵙⵜⴳⴳⴰⵔⵏ ⵉⵜⵜⵓⵙⵎⴰⴳⴰⵍⵏ ⵙ ⵜⵙⵎⵉⴳⴰⵍ ⵖ ⴷⴰⵔ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ, ⵃⵎⴰ ⴰⴷ ⴷⵉⵡⵍⵏ ⵅⴼ ⵜⵡⵉⵍⴰⵜⵉⵏ ⵏ ⵓⵙⴷⵓⵙ ⵏ ⵡⴰⵏⵏⴰⵍ ⵏ ⵜⴹⴼⵕⵉ ⵏ ⵓⵙⵇⵇⵉⵎ ⴷ ⵓⴹⴼⴼⵓⵕ ⵏⵏⵙ ⴷ ⵜⴽⵛⵛⵓⵎⵉⵏ ⵏⵏⵙ, ⵙⵍⴰⵡⴰⵏ ⴰⴽⴽⵯ ⴳ ⵜⵉⵣⵉ ⵏ ⵜⵣⵣⵉⴳⵣⵉⵏ ⵏⵏⵉ ⵙⵙⵏⵏⵜ ⵜⵙⴽⴰⵏⵉⵏ ⵏ ⴽⵔⴰ ⵏ ⵉⵄⵔⵔⵉⵎⵏ ⴳ ⴽⵔⴰ ⵏ ⵜⵎⴷⵉⵏⵉⵏ ⵜⵉⵎⵖⵔⵉⴱⵉⵢⵉⵏ ⴳ ⵡⵓⵙⵙⴰⵏ ⴰⴷ ⵉⴳⴳⵯⵔⴰⵏ.

ⵉⴽⴽⴰ ⵓⵙⵇⵇⵉⵎ ⵉⵙⴽⵔ ⵜⵉⵔⵓⴱⴱⴰ ⵏ ⵜⴹⴼⵕⵉ ⴷ ⵓⴹⴼⴼⵓⵕ ⵖ ⵓⴱⴰⵔⴰⵣ ⴷ ⵓⴽⵛⵛⵓⵎ ⴰⴼⵔⴳⴰⵏ ⵙⴳ ⵎⴰⴷ ⵙⵙⵏⵜⵉⵏⵜ ⵜⵖⵓⵔⵉⵡⵉⵏ ⵏ ⵜⵙⴽⴰⵏⵜ, ⵅⴼ ⴽⵕⴰⴹ ⵏ ⵉⵙⵡⵉⵔⵏ ⵉⴷⵙⵍⴰⵏⵏ: ⴰⵙⴳⴰⵡⴰⵏ, ⵙ ⵜⵙⵇⵇⵉⵎⵉⵏ ⵏⵏⵙ ⵜⵉⵏⵎⵏⴰⴹⵉⵏ ⴳ ⵜⵎⵏⴰⴹⵉⵏ ⵙ ⵙⵏⴰⵜ ⴷ ⵎⵔⴰⵡⵜ, ⴷ ⵓⵏⴰⵎⵓⵔ ⴷ ⵅⴼ ⵓⵙⵡⵉⵔ ⵏ ⵓⵙⴰⵢⵔⴰⵔ ⴰⵎⵓⵟⵟⵓⵏ, ⵖ ⵢⴰⵎⵓ ⵓⵎⵢⴰⵡⴰⴹ ⵖ ⵓⴱⴰⵔⴰⵣ ⴰⴽⴷ ⵜⵏⴱⴰⴹⵉⵏ ⵜⵉⴷⵖⵔⴰⵏⵉⵏ ⵏⵖ ⴰⴽⴷ ⵉⵄⵔⵔⵉⵎⵏ ⴳ ⵉⴷⵖⴰⵔⵏ ⵏ ⵜⵙⴽⴰⵏⵜ.

ⵍⵍⵉⵖ ⵉⵥⵕⴰ ⵓⵙⵇⵇⵉⵎ ⵎⴰⵙ ⵉⴳⴰ ⵓⵙⴰⵢⵔⴰⵔ ⴰⵎⵓⵟⵟⵓⵏ ⴰⵎⵙⴷⵍ ⵏ ⵜⴷⵔⴼⵉⵏ ⴰⵙⵙ ⴰ, ⵍⵍⵉⵖ ⵜⵜⵓⵙⵉⵍⴰⵡⵏⵜ ⴳ ⵉⵎⵏⴰⴹⵏ ⵏⵏⵙ ⵜⵉⵏⴷⵉⵜⵉⵏ ⵜⵉⵎⴰⵢⵏⵓⵜⵉⵏ ⵉⴳⴰⵏ ⴰⵙⴰⵜⵉ ⵉ ⵡⴰⵍⵜⴰⵖ ⵏ ⵉⵄⵔⵔⵉⵎⵏ ⴷ ⵜⴷⵔⴰⵡⵉⵏ ⵏⵏⵙⵏ ⴷ ⵉⵡⵏⵏⵉⵜⵏ ⵏⵏⵙⵏ ⵉⵏⴳⵔⴰⵢⵏ ⵅⴼ ⵉⵙⵓⵜⵔⵏ ⵉⵣⵔⴼⴰⵏⵏ ⵉⴷⵙⵍⴰⵏⵏ ⵉⵎⵙⵖⵓⵔⴰ, ⴰⵔ ⵉⵜⵜⵣⵎⵎⴰⵎ ⵎⴰⵢⴰ ⴷ:

• ⴰⵙⵏⵜⵉ ⵏ ⵜⵙⴽⴰⵏⵉⵏ ⵏ ⵉⵄⵔⵔⵉⵎⵏ ⵙ ⵜⵖⵓⵔⵉⵡⵉⵏ ⵏ ⵜⵙⴽⴰⵏⵜ, ⵙⵙⵓⵖⵏⵏⵜ ⵖ ⵜⵣⵡⵉⵔⵉ ⵏⵏⵙⵏⵜ ⵙ ⵓⴽⵊⵓⵊⵊⵉ ⴰⵏⴳⵔⴰⵢ, ⵙⵙⵏⵏⵜ ⴽⵔⴰ ⴷⵉⴳⵙⵏⵜ ⴹⴰⵕⴰⵜ ⵎⴰⵢⴰ ⵏⵏ ⵜⵉⵡⵓⵔⵉⵡⵉⵏ ⵏ ⵜⴽⵕⴹⵉ, ⵖ ⴰⵎⵓⵏⵜ ⴰⵡⴷ ⴽⵔⴰ ⵏ ⵜⵡⵉⵍⴰⵜⵉⵏ ⵏ ⵓⴽⵛⵛⵓⵎ ⵓⵔ ⴷ ⵢⵓⵙⵉⵏ ⵏⵉⵖ ⵓⵔ ⵉⵎⵙⴰⵙⴰⵏ, ⴷ ⵜⵡⵉⵍⴰⵜⵉⵏ ⵜⵉⵎⵉⵣⵉⵜⵉⵏ ⵢⴰⴹⵏⵉⵏ ⵏ ⵜⴽⵕⴹⵉ, ⴷ ⴰⵡⴷ ⵎⴰⵙ ⵜⵜⵡⴰⵥⵍⴰⵢⵏⵜ ⴽⵔⴰ ⴷⵉⴳⵙⵏⵜ ⵙ ⵓⵏⵓⴼ ⴷ ⵜⵉⵢⵢⵜⵉ ⵙ ⵓⵥⵕⵓ ⴷ ⵜⵓⴽⵕⴹⴰ ⴷ ⵓⵙⵙⴽⵎⴹ ⵏ ⵜⵀⵉⵔⵔⵉⵜⵉⵏ ⴷ ⵜⵕⵥⵉ ⵏ ⵡⴰⵢⴷⴰ ⴰⴳⴷⵓⴷⴰⵏ ⴷ ⵓⵙⵍⵉⴳ (…) ;

• ⴰⵙⵖⵓⵏ ⵏ ⵜⵏⴼⵔⵓⵜ ⵏ ⵓⵣⵔⴼ ⴳ ⵓⴽⵊⵓⵊⵊⵉ ⴰⵏⴳⵔⴰⵢ, ⵉⴷⴷⵖ ⵉⴳⴰ ⵢⴰⵏ ⵡⴰⵎⵎⴰⵥ ⵙⴳ ⵡⴰⵎⵎⴰⵥⵏ ⵏ ⵓⵙⴰⴽⴰ ⴰⵏⴰⵎⵓⵔ ⴳ ⵉⵙⵜⴰⵢⵏ ⵏⵏⵙ ⵉⵣⴷⵉⵏ ⵙ ⵜⴷⵉⵎⵓⵇⵕⴰⵟⵉⵜ ⴷ ⵉⵣⵔⴼⴰⵏ ⵏ ⵓⴼⴳⴰⵏ, ⵖ ⵜⴰⵎⵓ ⴰⵡⴷ ⵜⵎⵙⵜⴳⴳⴰⵔⵜ ⵜⴰⵎⴰⵣⴰⵔⵜ ⵏⴳⵔ ⵉⵏⴱⴷⴰⴷⵏ ⵅⴼ ⵜⵙⴽⴰⵏⵉⵏ ⴷ ⵉⵎⵖⵔⴰⵏ ⵙⵔⵙⵏⵜ ⴷ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ ⴳ ⵓⵃⵟⵟⵓ ⵏ ⵓⵏⴳⵔⴰⵡ ⴰⵎⴰⵜⴰⵢ ⴷ ⴳ ⵜⵉⵣⵉ ⵢⴰⴽⵙⵓⵍⵏ ⵜⴰⵏⴼⵔⵓⵜ ⵏ ⵜⵎⵙⴽⵔⵜ ⵏ ⵓⵣⵔⴼ ⵏ ⵓⵡⵏⵏⵉ ⴷ ⵓⵣⵔⴼ ⴳ ⵓⴽⵊⵓⵊⵊⵉ ⴰⵏⴳⵔⴰⵢ;

• ⵜⴰⴳⴳⴰⵥⵜ ⵅⴼ ⵓⵙⵎⵀⵍ ⵏ ⵓⴼⴰⵙⵔ ⴰⵣⵔⴼⴰⵏ ⵏ ⵓⵣⵔⴼ ⴳ ⵓⴽⵊⵓⵊⵊⵉ ⴰⵏⴳⵔⴰⵢ, ⴱⵍⴰ ⴰⵙⴽⴰⵔ ⵙ ⵓⵙⵉⵡⴹ ⵏⵖ ⵓⵙⵍⵖⵓ ⴷ ⵓⵙⵖⵓⵏ ⵏ ⵓⵣⴷⴰⵢ ⵏⵏⵙ ⵙ ⵜⵏⴼⵔⵓⵜ ⵏ ⵜⵏⴳⵔⴰⵢⵜ ⵏ ⵓⵎⵓⵏ ⴷ ⵓⵙⴼⵙⵔ ⴷ ⵓⵙⵙⴰⴷⵔⵓ ⵏ ⵜⵥⵍⴰⵢⵉⵏ ⵏ ⵉⵡⵏⵏⵉⵜⵏ ⵉⵎⵓⵟⵟⵓⵏⵏ ⵉⵎⴰⵢⵏⵓⵜⵏ ⴳ ⵓⵙⴰⵜⵉ ⴰⴷ;

• ⴰⵙⵖⵓⵏ ⵏ ⵓⴼⵔⴰⴳ ⵏ ⵜⵏⵎⵓⵔⵉⵢⵉⵏ ⴷ ⵉⵏⵎⵓⵔⴰⵏ ⴷ ⵜⵏⴼⵔⵓⵜ ⵏ ⵉⵣⵔⴼⴰⵏ ⵏⵏⵙⵏ ⴳ ⵓⴽⵊⵓⵊⵊⵉ ⴰⵏⴳⵔⴰⵢ ⴷ ⵓⵙⴷⵓⵙ ⵏ ⵓⴼⵔⴰⴳ ⵙⴳ ⴽⵔⴰⵢⴳⴰⵜ ⵜⴰⵍⵖⴰ ⵏ ⵜⴽⵕⴹⵉ ⵉⵣⵎⵔⵏ ⴰⴷ ⵜⵟⵟⴰⵚ ⴰⵣⵔⴼ ⴳ ⵜⵏⴼⵔⵓⵜ ⵜⴰⴽⵎⴰⵎⵜ ⵉⵖ ⵉⴳⴰ ⵉ ⵉⵎⵙⴽⴰⵏⵏ ⵏⵖ ⵜⵉⴳⴳⴰⵍⵉⵏ ⵜⵉⴳⴷⵓⴷⴰⵏⵉⵏ.

ⴳ ⵓⵙⴰⵜⵉ ⵏ ⵓⴹⴼⴼⵓⵕ ⵏⵏⵙ ⵉ ⵓⵙⴰⵢⵔⴰⵔ ⴰⵎⵓⵟⵟⵓⵏ, ⵉⴹⴼⵕ ⵓⵙⵇⵇⵉⵎ ⵎⵏⵏⴰⵡ ⵏ ⵉⵡⵏⵏⵉⵜⵏ ⵉⵎⵓⵟⵟⵓⵏⵏ ⵉⵖ ⵉⴳⴰ ⴳ ⵓⴳⵏⵙⵓ ⵏ ⵜⴰⴷⴰⴱⵓⵜ “ⴷⵉⵙⴽⵓⵔⴷ” ⵏⵖ ⵜⵉⴷⴰⴱⵓⵜⵉⵏ ⵏ ⵓⵎⵢⴰⵡⴰⴹ ⴰⵏⴰⵎⵓⵏ ⵢⴰⴹⵏⵉⵏ, ⴳ ⵍⵍⴰⵏⵜ ⵜⵓⵎⴰⵢⵉⵏ ⵜⵉⵎⵙⵙⴽⵏⴷⵉⵏ, ⴷ ⵜⵉⵢⵢⴰⴹ ⴳ ⵍⵍⴰⵏⵜ ⵜⵖⵓⵔⵉⵡⵉⵏ ⵉⴼⴰⵡⵏ ⴷ ⵜⵎⵉⵣⵉⵜⵉⵏ ⵉ ⵜⴽⵕⴹⵉ ⴷ ⵓⵙⵉⵎⵎⵕ ⵅⵉⴼⵙ ⴷ ⵜⵖⵓⵔⵉ ⵙ ⵓⵙⵙⴽⵎⴹ ⵏ ⵜⵎⵔⵙⴰⵍ ⴷ ⵜⵓⵚⴽⵉⵡⵉⵏ ⵜⵓⵏⴱⵉⴹⵉⵏ ⴷ ⵓⵡⴰⵜⵜⵙ ⵏ ⵉⴷⵖⴰⵔⵏ ⵏ ⵜⵣⴷⵖⵜ ⵏ ⵉⵎⵙⵜⴳⴳⴰⵔⵏ, ⴷ ⵓⵙⴷⵉⴷⴷⵉ ⵙ ⵓⵖⵓⵍ ⵙ ⵜⵎⵏⵖⵉⵡⵉⵏ, ⴷ ⵜⵕⵥⵉ ⵉⴼⴰⵡⵏ ⵏ ⵡⴰⴷⴷⵓⵔ ⵏ ⵜⵉⵏⵎⵓⵔⵉⵢⵉⵏ/ⵉⵏⵎⵓⵔⴰⵏ ⵓⵔ ⵉⵔⵉⵏ ⴰⴷ ⴷⵔⵓⵏ ⴳ ⵜⵙⴽⴰⵏⵉⵏ ⵏⵖ ⴷⴰ ⴰⵇⵇⵔⴰⵏ ⴳ ⵉⵖⴼⴰⵡⴰⵍⵏ ⵏⵏⵙⵏ/ⵏⵏⵙⵏⵜ ⴷ ⵜⵓⵎⴰⵢⵉⵏ ⵏⵏⵙⵏ/ⵏⵏⵙⵏⵜ ⵙ ⵓⵙⵓⵖⵏ ⵙ ⵜⴰⴳⵉⵜ ⵏ ⵜⴽⵕⴹⵉ ⴷ ⵜⴳⴳⴰⵥⵜ ⵅⴼ ⵓⵙⵓⵖⵏ ⵙ ⵜⵏⴳⵔⴰⵢⵜ, ⵙⵍⴰⵡⴰⵏ ⴰⴽⴽⵯ ⵜⵉⵡⵜⵎⵉⵏ (ⴰⴼⵔⴷⵉⵙ ⴰⵎⴰⵣⴰⵔ: ⵙⴳ ⵉⵎⵉⴹⴰⵏⵏ ⵉⵎⴰⵢⵏⵓⵜⵏ, ⴷ ⵡⵉⵢⵢⴰⴹ ⵉⵔⴳⵍⵏ, ⴷ ⵡⵉⵢⵢⴰⴹ ⵓⵔ ⵉⵣⵓⵣⵣⵓⵔⵏ ⴰⵡⴷ ⴽⵔⴰ ⵏ ⵜⵓⵎⴰⵢⵜ, ⵓⵔ ⴷⵉⴳⵙⵏ ⵍⵍⵉⵏ ⵉⵎⴷⵔⴰⵡⵏ, ⴷ ⵉⵎⵉⴹⴰⵏⵏ ⵉⵎⵢⴰⵏⴰⵡⵏ ⵢⵓⴳⴳⴰ ⴷ ⵙⴳ ⵓⵃⵇⵇⴰ ⴳ ⵓⵎⵍⴰⵏ ⵏⵏⵙⵏ ⴷ ⵜⵎⵙⴽⵔⵜ ⵏⵏⵙⵏ ⴷ ⵜⵥⵕⵉⴳⵉⵏ ⵏⵏⵙⵏ ⵎⴰⵙ ⴷ ⵉⴷⴷⴰ ⵓⵥⵓⵕ ⵏⵏⵙⵏ ⵙⴳ ⵉⵡⴰⵏⴽⵏ ⵉⴱⵕⵕⴰⵏⵉⵢⵏ – ⵍⴰ ⵜⴻⵜⵜⵉⵍⵉ ⵜⵖⴹⴼⵜ ⵅⴼ ⴽⵔⴰ ⴷⵉⴳⵙⵏ ⴳ ⴽⵔⴰ ⵜⵉⴽⴽⴰⵍ).

ⵙ ⵜⵓⵚⴽⴰ ⵅⴼ ⵓⴷⵉⵡⵍ ⴷ ⵓⵎⵢⴰⵖ ⵅⴼ ⵜⵢⴰⴼⵓⵜⵉⵏ ⴰⴷ ⵜⵉⵎⵣⵡⵓⵔⴰ ⵏ ⵜⴰⵏⴰⴹⵉⵏ ⵏ ⵓⴹⴼⴼⵓⵕ ⴷ ⵜⵏⵥⵉ ⴷ ⵓⴽⵛⵛⵓⵎ, ⵍⴰ ⵉⵙⵎⴰⵢⵏⵓ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴰⵙⵙⴽⵜⵉ ⵙ ⵉⵎⵏⵣⴰⵢⵏ ⵉⵣⵔⴼⴰⵏⵏ ⵉⵏⴹⴼⴰⵕⵏ:

• ⴰⵣⵔⴼ ⴳ ⵜⴷⵔⴼⵉ ⵏ ⵓⵡⵏⵏⵉ, ⴰⵣⵔⴼ ⴰⵖⵣⵓⵔⴰⵏ ⴷ ⵓⴷⵙⵜⴰⵔ ⴷ ⵜⵙⵉⵍⴰ ⵜⴰⴷⵙⵍⴰⵏⵜ ⵏⵏⴰ ⵅⴼ ⵉⴱⴷⴷ ⵓⴼⵊⵊⵉⵊ ⵉⵙⵎⴷⵏ ⵙ ⵜⴳⵔⵓⵎⵎⴰ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵢⴰⴹⵏⵉⵏ, ⵙ ⵎⴰⴷ ⵓⵔ ⵉⵜⵜⵟⵟⴰⵚⵏ ⵉⵣⵔⴼⴰⵏ ⵏ ⵡⵉⵢⵢⴰⴹ ⴷ ⵓⵙⵓⵎⵍ ⵏⵏⵙⵏ ⵏⵖ ⵙ ⵓⴼⵔⴰⴳ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⵏⵖ ⴰⵏⴳⵔⴰⵡ ⴰⵎⴰⵜⴰⵢ ⵏⵖ ⵜⴰⴷⵓⵙⵉ ⵜⴰⵎⴰⵜⴰⵢⵜ ⵏⵖ ⵉⵛⵍⵓⵍⴼⵏ ⵉⵎⴰⵜⴰⵢⵏ.

• ⴰⵣⵔⴼ ⴳ ⵓⴽⵊⵓⵊⵊⵉ ⴰⵏⴳⵔⴰⵢ, ⵖ ⴰⵎⵓⵏⵜ ⵜⵎⵔⵡⴰⴽⵉⵏ ⴷ ⵜⵙⴽⴰⵏⵉⵏ ⴷ ⵉⵖⵊⴷⵉⵎⵏ ⴷ ⵉⴱⴷⴰⴷⵏ ⵉⵏⴳⵔⴰⵢⵏ (…), ⴰⵣⵔⴼ ⴰⵖⵣⵓⵔⴰⵏ ⵉⵜⵜⴹⵎⴰⵏ ⵓⴷⵓⵙⵜⵓⵔ ⴰⵎⵖⵔⵉⴱⵉ, ⵉⴳ ⵙⴳ ⵜⵔⵙⴰⵍ ⵏ ⵜⴷⵔⴰⵡⵜ ⴷ ⵜⴷⵉⵎⵓⵇⵕⴰⵟⵉⵜ ⴷ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⴱⴰⴹⵜ ⵏ ⵓⵙⵍⴳⵏ ⴷ ⵜⵏⵎⴰⴳⵓⵜ;

• ⵍⴰ ⵉⵜⵜⵎⵓⵣⵣⵍ ⵓⴽⵊⵓⵊⵊⵉ ⴰⵏⴳⵔⴰⵢ, ⵎⴽⴷⴰ ⵜ ⵉⵙⴷⵓⵙ ⵓⵏⴰⴳⵔⴰⵡ ⴰⴳⵔⴰⵖⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, “ⴰⴽⴷ ⵓⴽⵊⵓⵊⵊⵉ ⵉⵜⵜⵡⴰⵙⵙⴰⵏⵏ ⵙ ⵜⴽⵕⴹⵉ ⵜⵉⵎⵉⵣⵉⵜ ⴷ ⵜⵎⵉⵔⵉⵡⵜ”. ⵎⴽⴷⴰ ⵓⵔ ⵉⵜⵜⵡⴰⵣⵎⴰⵔ, ⵙ ⵓⵎⵙⴰⵙⴰ ⴷ ⵖⴰⵢⴰⴷ, “ⴰⴷ ⵉⵜⵜⵓⵙⴽⴰⵔ ⵓⵣⵔⴼ ⴰⴷ ⵙ ⵓⵙⵙⵎⵔⵙ ⵏ ⵜⴽⵕⴹⵉ”.

ⵉⵣⴷⵉ ⵓⵙⵇⵇⵉⵎ ⵜⴰⴷⴳⴳⵯⴰⵜ ⵏ ⵉⴹⵍⵍⵉ ⴰⵙⵙ ⵏ ⵓⴽⵕⴰⵙ 01 ⴽⵟⵓⴱⵕ ⴰⴹⴼⴼⵓⵕ ⵏⵏⵙ, ⵅⴼ ⴽⵕⴰⴹ ⵏ ⵉⵙⵡⵉⵔⵏ (ⴰⵏⴰⵎⵓⵔ/ⴰⵙⴳⴰⵡⴰⵏ/ⴰⵎⵓⵟⵟⵓⵏ), ⵉⵣⵎⵎⴻⵎ ⵜⵉⵙⴽⴰⵏⵉⵏ ⵜⵉⵏⴳⵔⴰⵢⵉⵏ ⴳ ⴽⵔⴰ ⵏ ⵜⵎⴷⵉⵏⵉⵏ, ⵙⵙⵏⵏⵜ ⴽⵔⴰ ⴳⵉⵙⵏⵜ ⵜⵉⵍⵉⵜ ⵏ ⵓⵟⵟⵓⵏ ⵉⴳⴳⵓⵜⵏ ⵏ ⵡⴰⵣⵣⴰⵏⵏ ⵓⵎⵥⵉⵢⵏ ⴳ ⵙⵍⴰ, ⵕⵕⴰⵛⵉⴷⵢⴰ, ⴷⴷⴰⵅⵍⴰ, ⵜⴰⵔⵓⴷⴰⵏⵜ, ⵍⵇⵍⵉⵄⴰ, ⴳⵯⵍⵎⵉⵎ ⴷ ⵕⵕⴱⴰⵟ, ⵉⵙⴰⵏⵏⵜ ⴽⵔⴰ ⴳⵉⵙⵏⵜ ⵜⴰⵍⵖⵉⵡⵉⵏ ⵜⵉⵎⵉⵣⵉⵜⵉⵏ ⵏ ⵜⴽⵕⴹⵉ.

ⵍⵍⵉⵖ ⵉⵙⵎⵏⵉⴷ ⵓⵙⵇⵇⵉⵎ ⴰⵎⵎⴳⵕⴰⵥ ⵏⵏⵙ ⴰⵅⴰⵜⴰⵔ ⴷ ⵓⵎⵏⵓⵙ ⵏⵏⵙ ⴰⵎⵇⵇⵔⴰⵏ ⵉⴷⴷⵖ ⵎⵎⵓⵜⵏ ⴽⵕⴰⴹ ⵓⴳⴳⵉⴷⵏ ⴷⴼⴼⵉⵔ ⵏ ⵜⵙⴽⴰⵏⵉⵏ ⵏⵏⴰ ⵜⵙⵙⵏ ⵍⵇⵍⵉⵄⴰ ⴳ ⵜⵙⴳⴰ ⵏ ⵉⵏⵣⴳⴳⴰⵏ, ⴷ ⵓⵣⵎⵎⴻⵎ ⵏ ⵓⵏⴳⵉⵙⵏ ⴳ ⵓⵙⵎⵉⵍ ⵏ ⵉⵎⵙⴽⴰⵏⵏ ⴷ ⵜⴳⴳⴰⵍⵉⵏ ⵜⵉⴳⴷⵓⴷⴰⵏⵉⵏ ⴳ ⵓⵣⵎⵣ ⵏ ⵡⵓⵙⵙⴰⵏ ⵏ ⵜⵙⴽⴰⵏⵉⵏ, ⴰⵔ :

• ⵉⵜⵜⵣⵎⵎⴰⵎ ⴰⵙⵙⵓⴼⵖ ⵏ ⵢⴰⵏ ⵓⵙⵉⵡⴹ ⵉ ⵓⵎⵏⴰⴷ ⴰⵎⴰⵜⴰⵢ ⵅⴼ ⵉⵎⵊⵕⵉⵜⵏ ⵏ ⵜⴹⵓⵕⵉ ⵏ ⵙⵉⵏ ⵓⵏⴳⵉⵙⵏ ⵙ ⵍⵇⵕⵟⴰⵚ ⴰⵎⵉⴷⵉⵔ ⴷⴰⵜ ⴰⴷ ⵢⴰⵡⴹ ⵓⵟⵟⵓⵏ ⴽⵕⴰⴹ ⵡⵓⴳⴳⵉⴷⵏ;

• ⵍⴰ ⵉⵙⴱⵔⵔⴰⴽ ⵙ ⵓⵕⵥⵥⵓⵎ ⵉ ⴽⵉⴳⴰⵏ ⵏ ⵉⵎⵙⴽⴰⵏⵏ (ⵉⵎⵙⵎⵓⵙⵙⵓⵜⵏ);

• ⵍⴰ ⵉⵏⴽⴽⴹ ⵜⵉⵔⵎⵉⵜ ⵏ ⵡⴰⴷⴰⴼ ⴷ ⵓⵙⵙⴽⵎⴹ ⵏ ⵡⴰⴼⴰ ⴳ ⵡⴰⵎⵎⴰⵙ ⵏ ⵜⵊⵉⴹⵕⵎⵜ ⵜⴰⴳⵍⴷⴰⵏⵜ ⴳ ⵍⵇⵍⵉⵄⴰ, ⵙⵓⵍ ⵉⵍⵉⵏⵜ ⵜⵡⴰⵛⵓⵏⵉⵏ ⵣⴷⵖⵏⵉⵏ ⴳ ⵜⴷⵓⵍⵉ ⵜⴰⵎⵣⵡⴰⵔⵓⵜ ;

• ⵍⴰ ⵉⵜⵜⵙⴷⴷⵉⴷ ⵅⴼ ⵓⵙⵖⵓⵏ ⵏ ⵓⵕⵥⵥⵓⵎ ⵏ ⵓⵙⴰⴳⴳⵯ ⴳ ⴰⴽⴽⵯ ⴰⴷⴷⴰⴷⵏ ⵍⵍⵉⵖ ⵜⵍⵍⴰ ⵜⵕⵥⵉ ⵏ ⵜⵓⴷⵔⵜ ⵏⵖ ⵜⴰⵏⴼⵔⵓⵜ ⵜⴰⴽⵎⴰⵎⵜ. ⵉⵙⴷⴷⵉⴷ, ⵍⵍⵉⵖ ⵉⴹⴼⵕ ⵜⵉⵣⵣⵉⴳⵣⵉⵏ ⴰⴷ ⵏ ⵓⵎⵎⴳⵕⴰⵥ ⵎⴰⵙ ⵔⴰⴷ ⵜⵣⴷⵉ ⵜⵎⵔⵙⵍⵜ ⵜⴰⵏⴰⵎⵓⵔⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵜⵉⵎⵀⴰⵍ ⵏ ⵜⴹⴼⵕⵉ ⴷ ⵓⴹⴼⴼⵓⵕ ⵏⵏⵙⵏⵜ ⵖ ⵓⴱⴰⵔⴰⵣ ⴷ ⵜⴽⵛⵛⵓⵎⵉⵏ ⵏⵏⵙ, ⴷ ⵓⵍⴰ ⵉⵏⵥⵉ ⵏ ⵉⵙⴰⵕⴰⴹⵏ.

ⵉⵖ ⴷⴰ ⵉⵙⵎⵏⵉⴷ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴰⴼⵛⴰⴷ ⵏⵏⵙ ⵉ ⵜⵡⵊⵉⵡⵉⵏ ⵏ ⵓⴳⴳⵉⴷⵏ ⵙ ⴽⵕⴰⴹ, ⵍⴰ ⵉⵜⵜⵇⴰⵎⴰ ⵉⵏⵏⵓⵕⵥⵎ, ⴰⴽⴷ ⵜⵙⵇⵇⵉⵎⵉⵏ ⵏⵏⵙ ⵜⵉⵏⵎⵏⴰⴹⵉⵏ, ⵅⴼ ⵇⴰⵃ ⵉⵡⵏⵏⵉⵜⵏ ⴷ ⵓⵎⵙⴰⵡⴰⵍ ⵅⴼ ⵓⵙⵎⵀⵍ ⵏ ⵜⵎⵢⴰⴳⴰⵏⵜ ⵏ ⵉⵣⵔⴼⴰⵏ ⴷ ⵜⴷⵔⴼⵉⵏ ⵉ ⵎⴰⵕⵕⴰ ⵜⵉⵏⵎⵓⵔⵉⵢⵉⵏ ⴷ ⵉⵏⵎⵓⵔⴰⵏ.