ⴰⵙⵎⴰⵍ ⵓⵏⵚⵉⴱ ⵏ ⵜⴰⵢⵎⵓⵏⵉⵏ ⵏ ⵜⵏⴼⵔⴰⵢⵜ – ⵜⴰⵙⵙⵓⵜⵍⵜ ⵜⵉⵙⵙ ⵚⴹⵉⵚⵜ ⴷ ⵎⵔⴰⵡⵜ ⵏ ⵓⵍⵎⵓⴳⴳⴰⵔ ⵉⵙⵏⵉ ⵏ ⵡⵓⵔⵖ ⴰⴳⵔⴰⵖⵍⴰⵏ ⵉ ⵓⵙⴰⵔⵓ ⴰⵎⴰⵣⵉⵖ (FINIFA)
FINIFA ⴰⴳⴰⴷⵉⵔ, ⵙⴳ 1 ⴰⵔ 5 ⴽⵟⵓⴱⵕ 2025.
ⴷⴰ ⵉⵙⵙⵍⵖⵓ ⵓⵍⵎⵓⴳⴳⴰⵔ ⵉⵙⵏⵉ ⵏ ⵡⵓⵔⵖ ⴰⴳⵔⴰⵖⵍⴰⵏ ⵉ ⵓⵙⴰⵔⵓ ⴰⵎⴰⵣⵉⵖ (FINIFA), ⴼ ⵉⴳⵓⵎⴰⵎⵏ ⵏ ⵜⴰⵢⵎⵓⵏⵉⵏ ⵏ ⵜⵏⴼⵔⴰⵢⵜ – ⵜⴰⵙⵙⵓⵜⵍⵜ ⵜⵉⵙⵙ ⵚⴹⵉⵚⵜ ⴷ ⵎⵔⴰⵡⵜ ⵏ ⵓⵍⵎⵓⴳⴳⴰⵔ, ⵍⵍⵉ ⵔⴰⴷ ⵉⵜⵜⵓⵏⵎⴰⵍⴰ ⴳ ⵜⵖⵔⵎⵜ ⵏ ⵓⴳⴰⴷⵉⵔ ⵙ ⵡⴰⵙⵙⴰⵔ ⴷ ⵓⵙⵇⵇⵉⵎ ⵏ ⵜⵙⴳⴰ ⵏⵙⵓⵙ ⵎⴰⵙⵙⵜ ⴷ ⵜⴳⵔⴰⵡⵜ ⵜⴰⵏⴰⴽⴰⵍⵜ ⵏ ⵓⴳⴰⴷⵉⵔ ⴷ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ (IRCAM), ⴷ ⵙ ⵜⴷⵔⴰⵡⵜ ⵏ ⵡⴰⵎⵎⴰⵙ ⴰⵎⵖⵔⵉⴱⵉ ⵏ ⵙⵙⵉⵏⵉⵎⴰ.
ⵜⴰⵙⵙⵓⵜⵍⵜ ⴰⴷ, ⵜⵓⵎⴰ ⴽⵕⴰⴹⵜ ⵜⵎⵣⵉⵣⵣⵍⵉⵏ ⵜⵉⵎⵇⵔⴰⵏⵉⵏ: ⵜⵉⵎⵣⵉⵣⵣⵍⵜ ⵜⵓⵏⵚⵉⴱⵜ ⵏ ⵜⵎⴰⵣⵉⵖⵜ, ⵜⵉⵎⵣⵉⵣⵣⵍⵜ ⵜⴰⴳⵔⴰⵖⵍⴰⵏⵜ ⴷ ⵜⵙⵎⵖⵓⵔⵜ ⵜⴰⵏⴰⵎⵓⵔⵜ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴰⵏⴰⵡ ⵏ ⵓⵙⴰⵔⵓ ⴰⵎⴰⵣⵉⵖ.
ⵜⴰⵢⵎⵓⵏⵜ ⵏ ⵜⵎⵣⵣⵉⵣⵍⵜ ⵜⵓⵏⵚⵓⴱⵜ ⵏ ⵜⵎⴰⵣⵉⵖⵜ:
ⵜⴳⴰ ⵢⴰⵏ ⵡⴰⵏⴰⵡ ⵍⵍⵉ ⵉⴷⵓⵍⵏ ⵙ ⵓⵙⵓⵜⵜⴳ ⵏ ⵙⵙⵉⵏⵉⵎⴰ ⵜⴰⵎⴰⵣⵉⵖⵜ ⵙ ⵡⴰⵏⴰⵡⵏ ⵏⵏⵙ ⴰⴽⴽⵯ (ⴰⵙⴰⵔⵓ ⴰⵎⴰⵍⵍⴰⵙ, ⵓⵏⵜⵉⵎ, ⴰⵏⴰⵔⵔⴰⵎ), ⵎⴽ ⴷⴰ ⵍⵍⴰⵏ ⴳ ⵜⴰⵢⵎⵓⵏⵜ ⴰⴷ, ⵓⴷⵎⴰⵡⵏ ⵜⵜⵓⵙⵙⴰⵏⵏⵉⵏ ⴳ ⵢⵉⴳⵔⴰⵏ ⵏ ⵓⵙⵏⴼⵍⵓⵍ ⴷ ⵓⵔⵣⵣⵓ ⴰⴷⵍⵙⴰⵏ:
– ⴰⵎⵓⵔ ⵀⴰⴽⴽⴰⵔ : ⴰⵎⵙⵙⵓⴼⴼⵖ ⴰⴼⵕⴰⵏⵚⵉⵚ-ⴰⴷⵣⴰⵢⵔⵉⵢ, ⵉⵙⵙⵏⴽⴷ ⵜⵉⵡⵡⵓⵔⵉⵡⵉⵏ ⵏⵏⵙ ⴳ ⵉⵍⵎⵓⴳⴳⴰⵔⵏ ⵎⵇⵇⵓⵔⵏⵉⵏ ⵣⵓⵏ ⴷ ⵍⵓⴽⴰⵔⵏⵓ ⴷ ⵙⵓⵏⴷⵓⵏⵙ.
– ⵎⵓⵏⵢⴰ ⴱⵓⵍⵄⵔⴰⵙⵉ: ⵜⴳⴰ ⵜⴰⵏⴰⵥⵓⵕⵜ ⵜⴰⵎⵉⵥⴰⵕⵜ ⵜⴰⵎⵖⵔⵉⴱⵉⵢⵜ, ⵜⵥⵍⵉ ⵙ ⵓⵙⵏⴰⵢ ⵓⴳⵔⴰⴼⵉⴽ ⵏ ⵓⵙⵎⵓⵙⵙⵓ ⴷ ⴰⵔ ⵜ ⵜⵙⵙⴰⵇⵇⵔⴰ, ⵏⵜⵜⴰⵏ ⴷ ⵜⵣⵔⴰⵡⵉⵏ ⵏ ⵙⵙⵉⵏⵉⵎⴰ ⴳ ⵜⵙⴷⴰⵡⵉⵜ ⵏ ⵉⴱⵏ ⵥⵓⵀⵕ ⴳ ⴰⵢⵜ ⵎⵍⵍⵓⵍ
– ⵎⵓⵃⴰ ⵎⵓⵅⵍⵉⵚ: ⴰⵙⵍⵎⴰⴷ ⴰⵎⵔⵣⵓ ⴳ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵉⴳ ⴰⵎⵙⵎⴰⵜⵜⴰⴳ ⴳ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵙⴳ ⵓⵙⴳⴳⴰⵙ ⵏ 2001, ⵉⴳⴰ ⴰⵎⵙⵓⵖⵍ ⴰⵙⵍⵉⵥⵕⴰⵏ, ⵉⴳ ⴰⵏⵙⵙⵉⵅⴼ ⵏ ⵜⵉⵔⵔⴰ ⴳ ⵜⵙⵖⵓⵏⵜ; ⵜⵉⴼⵉⵏⴰⵖ ⴷ ⴰⴳⵔⴰⵡ ⴰⵎⴰⵣⵉⵖ.
– ⵄⴰⵣⵉⵣ ⴰⵊⴰⵀⴱⵉⵍⵉ: ⵉⴳⴰ ⴰⵏⴰⵖⵎⴰⵙ ⴳ ⵓⵖⵎⵉⵙ ⵍⵄⴰⵍⴰⵎ, ⴰⵎⵙⵏⵎⴰⵍⴰ ⵏ ⵜⴰⵙⵏⵉⵡⵉⵏ ⵉⵥⵍⵉⵏ ⵉ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵙ ⵜⵉⴼⵉⵏⴰⵖ ⴷ ⵜⴰⵄⵕⴰⴱⵜ.
– ⵄⵣⴷⴷⵉⵏ ⵍⵅⵕⵕⴰⵟ: ⵉⴳⴰ ⴰⵎⵔⵣⵓ ⴳ ⵜⵥⵓⵕⵉⵡⵉⵏ ⵏ ⵓⵙⵙⵎⵏⵉⴷ ⴷ ⵓⵎⵣⴳⵓⵏ, ⵉⴳⴰ ⴰⵎⴰⵥⵍⴰⵢ ⵙ ⵜⵖⵙⵙⴰ ⴷ ⵜⵎⴽⵜⵉⵜ ⴷ ⵜⴰⵍⵖⵉⵡⵉⵏ ⵏ ⵓⵙⵙⵉⵡⴹ ⵜⵉⵖⵔⴼⴰⵏⵉⵏ.
ⵜⴰⵢⵎⵓⵏⵜ ⵏ ⵜⵎⵣⵉⵣⵣⵍⵜ ⵜⴰⴳⵔⴰⵖⵍⴰⵏⵜ
ⵜⴳⴰ ⵜⵉⵎⵣⵉⵣⵣⵍⵜ ⵉⵕⵥⵎⵏ ⴼ ⵜⴰⵏⵏⴰⵢⵉⵏ ⵏ ⵓⵎⴰⴹⴰⵍ, ⴰⵔ ⵜⵎⵎⴰⵍ ⵜⴰⵎⵏⵏⴰⵡⵜ ⵏ ⵜⵉⵔⵎⵉⵜⵉⵏ ⵏ ⵙⵙⵉⵏⵉⵎⴰ ⴳ ⵓⵎⴰⴹⴰⵍ, ⵜⴳ ⴰⵡⴷ ⵢⴰⵏ ⵓⴷⴰⵙⵉⵍ ⴰⴳⵔⴰⵖⵍⴰⵏ ⵉ ⵢⵉⵎⵙⵍⵉⵜⵏ ⵉⵎⵖⵏⴰⵙⵏ.
– ⴱⵉⵜⵔ ⵍⵓⵎ: ⵉⴳⴰ ⴰⵎⵙⵙⵓⴼⴼⵖ ⴰⴽⴰⵏⴰⴷⵉⵢ- ⴰⵜⵛⵉⴽⵉⵢ, ⵉⴳⴰ ⴰⵡⴷ ⴰⴷⵓⴽⵜⵓⵔ ⴳ ⵜⴼⵍⵙⴰⴼⵜ ⵙⴳ ⵜⵙⴷⴰⵡⵉⵜ ⵏ ⵀⴰⵔⴼⴰⵔⴷ, ⵉⴳⴰ ⵙⴳ ⵉⵎⵙⵍⵉⵜⵏ ⵏ ⵓⵙⴰⵔⵓ ⵓⵏⵜⵉⵎ ⴰⵣⵔⴼⴰⵏ ⴷ ⵓⵏⵡⵏⴰⴹ, ⵉⴳ ⵢⴰⵏ ⵙⴳ ⵉⴳⵓⵎⴰⵎⵏ ⵏ AMPAS
– ⵔⴰⴼⴰⵢⵉⵍ ⴱⵉⵏⵉⵙⵜⵉ: ⵜⴳⴰ ⵜⴰⵎⵙⵙⵓⴼⴼⵖⵜ, ⵜⵖⵔⴰ ⴳ ⵙⵙⵓⵔⴱⵓⵏ, ⵜⴷⵓⵍ ⵙ ⵉⵙⵇⵇⵙⵉⵜⵏ ⵉⵏⴰⵎⵓⵏⵏ ⴷ ⵉⵙⵇⵇⵙⵉⵜⵏ ⵏ ⵜⵎⴰⴳⵉⵜ, ⴷ ⴰⵔ ⵜⴷⵔⵔⵓ ⴳ ⵉⵍⵎⵓⴳⴳⴰⵔⵏ ⵉⴳⵔⴰⵖⵍⴰⵏⵏ.
– ⴽⵓⵕⵉⵏ ⴼⴰⵏ ⵉⴳⵉⵔⴰⵢⵜ: ⵜⴳⴰ ⵜⴰⵎⵙⵙⵓⴼⴼⵖⵜ ⴷ ⵜⵎⵙⵢⴰⴼⵓⵜ ⵜⴰⵀⵓⵍⴰⵏⴷⵉⵢⵜ, ⵜⵉⵡⵡⵓⵔⵉⵡⵉⵏ ⵏⵏⵙ ⵉⵡⵉⵏⵜ ⵜⵓⴳⵜⵜ ⵜⵙⵎⵖⵓⵔⵉⵏ, ⵜⴳ ⵢⴰⵏ ⵙⴳ ⵉⴳⵓⵎⴰⵎⵏ ⵏ AMPAS.
– ⵍⵃⵓⵙⴰⵢⵏ ⵛⵛⴽⵉⵔⵉ : ⵉⴳⴰ ⴰⵎⵙⵙⵓⴼⴼⵖ ⴰⵎⵖⵔⵉⴱⵉ, ⵉⵙⴽⵔ ⴰⵙⵎⵓⵜⵜⴳ ⴰⵏⵅⴼⴰⵡ, ⵉⵙⵓⵔ ⴼ ⵜⵣⵎⵎⴰⵔ ⵏⵏⵙ ⴼⴰⴷ ⴰⴷ ⵉⵙⴱⵓⵖⵍⵓ ⵜⵉⵔⵎⵉⵜ ⵏⵏⵙ,ⵉⴷⵓⵍ ⵙ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴳ ⵙⵙⵉⵏⵉⵎⴰ.
– ⴼⴰⴹⵉⵍⴰ ⴱⵍⴽⴱⵍⴰ : ⵜⴳⴰ ⵜⴰⵙⴳⴱⴰⵔⵜ ⵜⴰⴼⵕⴰⵏⵚⴰⵡⵉⵢⵜ ⵙⴳ ⵓⵙⴰⵍⴰ ⴰⴷⵣⴰⵢⵔⵉⵢ, ⵜⴳⴰ ⵢⴰⵏ ⵙⴳ ⵡⵓⴷⵎⴰⵏⵏ ⴱⴰⵀⵔⴰ ⵜⵜⵓⵙⵙⴰⵏⵏⵉⵏ ⴳ ⵜⵜⵉⵍⵉⴼⵉⵣⵢⵓⵏ ⴷ ⵓⵎⵣⴳⵓⵏ.
ⵜⴰⵢⵎⵓⵏⵜ ⵏ ⵜⵙⵎⵖⵓⵔⵜ ⵜⴰⵏⴰⵎⵓⵔⵜ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴰⵏⴰⵡ ⵏ ⵓⵙⴰⵔⵓ ⴰⵎⴰⵣⵉⵖ.
ⵜⴳⴰ ⵜⵙⵎⵖⵓⵔⵜ ⵜⴰⵏⴰⵎⵓⵔⵜ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴰⵏⴰⵡ ⵏ ⵓⵙⴰⵔⵓ ⴰⵎⴰⵣⵉⵖ ⵍⵍⵉ ⵢⴰⴽⴽⴰ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵙ ⵜⵎⵍⴷⴰ ⵏ ⵓⴽⵜⵜⴰⵢ ⵏ ⵢⵉⵏⵏⴰⵡ ⵏ ⴰⵊⴷⵉⵔ.
– ⴱⵔⴰⵀⵉⵎ ⵀⵙⵏⴰⵡⵉ: ⵉⴳⴰ ⴰⵎⵏⵀⴰⵍ ⵏ ⵓⵔⵣⵣⵓ ⴳ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⵉⴷⵓⵍ ⵙ ⵙⵙⵉⵏⵉⵎⴰ ⴷ ⵜⵡⵍⵍⴰⴼⵜ.
– ⵏⵓⵔⴰ ⵍⴰⵣⵔⴰⵇ: ⵜⴳⴰ ⵜⴰⴷⵓⴽⵜⵓⵔⵜ ⴳ ⵜⵙⵏⵉⵍⵙⵜ ⴷ ⵜⵎⵔⵣⵓⵜ ⴳ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⵜⵥⵍⵉ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ.
ⵢⴰⵙⵉⵏ ⵓⵔⵜⴰⵏ: ⵉⴳⴰ ⴰⵎⴰⵥⵍⴰⵢ ⴳ ⵉⵎⴰⵙⵙⵏ ⵏ ⵓⵎⵢⴰⵡⴰⴹ ⴳ ⵜⴷⴰⵍⴰ ⵏ ⵓⵏⵢⴰⵍⴽⴰⵎ ⴳ ⵓⴳⵏⵙ ⵏ ⵓⵙⵉⵏⴰⴳ, ⵢⵉⵡⵙ ⴳ ⵜⵓⴳⵜⵜ ⵏ ⵉⵙⵏⴼⴰⵔⵏ ⵉⵎⵓⵟⵟⵓⵏⵏ ⴷ ⵡⵉⵏ ⵓⵙⵍⵉⵥⵕ.
– ⵎⵙⵟⴰⴼⴰ ⵙⵙⵖⵉⵔ: ⵉⴳⴰ ⴰⵎⵔⵣⵓ ⴳ ⵡⴰⵎⵎⴰⵙ ⵏ ⵜⴷⵉⴷⴰⴽⵜⵉⴽⵜ ⴷ ⵉⵖⴰⵡⴰⵙⵏ ⵉⵙⴳⵎⴰⵏⵏ ⴳ ⵓⴳⵏⵙ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⵉⴳⴰ ⴰⵎⴰⵥⵍⴰⵢ ⴳ ⵜⴷⵉⴷⴰⴽⵜⵉⴽⵜ ⵏ ⵜⵓⵜⵍⴰⵢⵜ ⴷ ⵓⵎⴰⵡⴰⵍ ⴷ ⵓⵙⵙⵍⵎⴷ.
ⵓⴷⵎⴰⵡⵏ ⴰⴷ, ⴰⴷ ⵙ ⵉⵃⵢⵢⵍ ⵓⵍⵎⵓⴳⴳⴰⵔ ⵉⵙⵏⵉ ⵏ ⵡⵓⵔⵖ ⴰⴳⵔⴰⵖⵍⴰⵏ ⵉ ⵓⵙⴰⵔⵓ ⴰⵎⴰⵣⵉⵖ ⴳ 2025 ⴰⴷ ⵉⵙⴷⵖⵉ ⴰⵡⵜⵜⴰⵙ ⵏ ⵓⵙⵙⵎⵎⴳⵏⵜ ⵏ ⵙⵙⵉⵏⵉⵎⴰ ⵜⴰⵎⴰⵣⵉⵖⵜ ⵙ ⴽⵔⴰ ⴳⵉⵙ ⵉⵍⵍⴰⵏ ⵏ ⵜⴱⵖⵔⵜ ⴷ ⵜⵎⵏⵏⴰⵡⵜ, ⴰⴷ ⵉⵙⴽⵓ ⵜⵉⵍⴳⴳⵯⵉⵜ ⴰⵏⵏ ⴷⴰ ⵔⴰⴷ ⵜⵜ ⵉⵣⴷⵉ ⴷ ⵙⵙⵉⵏⵉⵎⴰ ⵏ ⵓⵎⴰⴹⴰⵍ, ⵎⴽ ⵍⵍⵉ ⵔⴰⴷ ⵎⵎⴰⵖⵏⵜ ⵜⴰⵢⵎⵉⵏⵉⵏ ⴼ ⴰⴷ ⴷ ⵙⵏⴼⴰⵍⴰⵍⵏⵜ ⵜⵉⴼⴰⵙⵉⵡⵉⵏ ⵜⵉⵎⵓⴼⴰⵢⵉⵏ, ⴷ ⵓⵙⵖⵓⴷⵓ ⵏ ⵓⵙⵓⵙⵙⵏ ⴰⴷⵍⵙⴰⵏ ⵏ ⵓⵍⵎⵓⴳⴳⴰⵔ.
Suivez nos dernières actualités sur Google News
