ريادة الأعمال النسائية ورهانات الإدماج والمساواة في قلب نقاش حقوقي احتضنه المجلس الوطني لحقوق الإنسان
ⵉⵙⵏⵓⴱⴳ ⵓⵙⵉⵏⴰⴳ ⵏ ⵕⵕⴱⴰⵟ ⴷⵔⵉⵙ ⴱⵏⵣⴽⵔⵉ ⵉ ⵉⵣⵔⴼⴰⵏ ⵏ ⵓⴼⴳⴰⵏ ⴰⵙⵙ ⵏ ⵓⵙⵉⵏⴰⵙ 25 ⵎⴰⵕⵚ 2025 ⵢⴰⵜ ⵜⵙⴰⵡⵔⵜ ⵏ ⵓⵎⴹⴰⴽⴰⵕ ⵅⴼ “ⵜⵉⵍⴰⵍⵉⵏ ⵏ ⵜⵎⵙⵙⵏⵜⵉⵜⵉⵏ ⴳ ⵓⵙⴷⵓⵙ ⵏ ⵢⵉⵙⴽⵉⵍ ⴷ ⵓⵙⵉⴷⴼ: ⵜⵉⵙⵏⵜⴰⵢⵉⵏ ⴷ ⵉⵙⴰⴽⴰⵜⵏ ⵉⵡⵜⵎⴰⵏⵏ”, ⵙ ⵜⴷⵔⴰⵡⵜ ⵏ ⵉⵎⵓⵣⴰⵢⵏ ⵉⵎⵖⵔⵉⴱⵉⵢⵏ ⴷ ⵉⴱⵕⵕⴰⵏⵉⵢⵏ… ⴰⵎⴹⴰⴽⴰⵕ ⵏⵏⴰ ⵉⵕⵥⵎ ⵓⵙⵇⵇⵉⵎ ⴳ ⵓⵙⴰⵜⵉ ⵏ ⵓⵣⴷⴰⵢ ⵏ ⵓⵙⵉⴷⵔ ⵏ ⵜⵡⵓⵔⵉⵡⵉⵏ ⵏ ⵡⴰⵙⵙ ⴰⵎⴰⴹⵍⴰⵏ ⵏ ⵉⵣⵔⴼⴰⵏ ⵏ ⵜⵡⵜⵎⵉⵏ (ⵎⴰⵕⵚ 2025).
ⵙ ⵓⵣⵎⵣⵣⵓ ⴰⴷ, ⵜⵙⴷⴷⵉⴷ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴳ ⵢⴰⵜ ⵜⴳⵓⵔⵉ ⵏ ⵓⵕⵥⵥⵓⵎ ⵉⵜⵜⵓⵙⵏⴽⴰⴷⵏ ⵙ ⵢⵉⵙⵎ ⵏⵏⵙ, ⵎⴰⵙ ⵉⵙⵡⵉⵔⵏ ⵉⴷⵔⵓⵙⵏ ⵏ ⵜⵎⵙⵙⵏⵜⵉⵜⵉⵏ ⵏⵏⴰ ⴷⴰ ⵙⵡⵓⴷⴷⵓⵏⵜ ⵜⵡⵜⵎⵉⵏ “ⵓⵔ ⴷⴰ ⵎⵎⴰⵍⵏ ⵜⵉⵥⴹⴰⵕⵉⵏ ⵜⵉⵎⵢⴰⴳⴰⵏⵉⵏ ⵏ ⵜⵎⵖⴰⵔⵜ ⵜⴰⵎⵖⵔⵉⴱⵉⵜ”.
ⴳ ⵓⵎⵏⴰⴹ ⴰⴷ, ⵜⵙⴷⴷⵉⴷ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ “ⵓⵔ ⵉⵣⵎⵉⵔ ⴰⴷ ⵢⵉⵍⵉ ⵓⵍⴽⴰⵎ ⵙ ⵜⴳⵎⵉ ⵉⵜⵜⵡⴰⵜⵜⵙⵏ ⴱⵍⴰ ⵜⴰⴷⵔⴰⵡⵜ ⵉⵙⵎⴷⵏ ⴷ ⵉⵎⴳⴳⴰⵢⵏ ⵏ ⵜⵡⵜⵎⵉⵏ”, ⵎⴽⴷⴰ ⵓⵔ ⵉⵣⵎⵉⵔ ⴰⴷ ⵢⵉⵍⵉ ⵓⵎⵓⵔⵙ ⵏ ⴽⵔⴰ ⵏ ⵡⴰⵏⴰⵡ ⴰⵏⴳⵎⵓ, ⴰⴷ ⵜⵔⵏⴰ, “ⴱⵍⴰ ⴰⴷ ⵉⴱⴷⴷ ⵅⴼ ⵓⵙⵣⵎⵔ ⴰⴷⵎⵙⴰⵏ ⵏ ⵜⵡⵜⵎⵉⵏ ⴷ ⵢⵉⵙⴽⵉⵍ”.
ⵉⵎⴷⵔⴰⵡⵏ/ⵜⵉⵎⴷⵔⴰⵡⵉⵏ ⴳ ⵓⵏⵎⵓⵇⵇⴰⵔ ⴰⴷ, ⵏⵏⴰ ⵉⵙⵎⵓⵏⵏ ⵉⵎⵙⴽⴰⵔⵏ ⵉⵎⵔⵙⴰⵍⵏ ⴷ ⵙⴳ ⵡⴰⵎⵓⵏ ⵓⵖⵔⵉⵎ ⴷ ⵉⵎⵓⵣⴰⵢⵏ ⴷ ⵉⵎⵥⵍⴰⵢⵏ, ⵏⵏⴰⵏ ⵎⴰⵙ ⵜⴳⴰ ⵜⵎⵙⵙⵏⵜⵉⵜ ⵜⵉⵙⵉⵜ ⵏ ⵡⴰⵎⵓⵏ, ⴷⴰ ⵜⵜⴹⵉⵚ ⵙ ⵉⴼⵔⴷⵉⵙⵏ ⵉⵎⵢⴰⵏⴰⵡⵏ ⵏ ⵓⵏⴰⴳⵔⴰⵡ ⴰⵏⴰⵎⵓⵏ ⵏⵏⴰ ⴰⵙ ⵉⵙⵙⵓⵜⵍⵏ.
ⵙⴳ ⵓⵎⵏⵉⴹ ⴰⴷ, ⴰⵔ ⵜⵜⵉⵏⵉⵏ, ⵉⵙⵓⵍ ⵓⵎⵏⴰⵍⴰ ⵏ ⵜⵏⵥⴰⵕ ⵉⵣⴷⵉⵏ ⵙ ⵢⵉⵙⴽⵉⵍ ⵏⴳⵔ ⵜⴰⴳⴳⴰⵢⵉⵏ ⴳ ⵓⴳⵯⵏⵙⵓ ⵏ ⵜⵎⵙⵙⵏⵜⵉⵜⵉⵏ ⵉⵣⴷⵉ ⵙ ⵓⵙⵜⴰⵢ ⵏ ⵢⴰⵏ ⵓⵙⵎⴰⵇⵇⵍ ⴰⵖⵣⵓⵔⴰⵏ ⴷ ⵓⵎⵙⵎⵓⵏ ⵉⵡⴰⵜⵜⵙⵏ ⴰⴷ ⵉⵙⴼⵙⵉ ⵜⵉⵡⵍⴰⴼⵉⵏ ⵜⵉⵎⴷⵢⴰⵜⵉⵏ ⵉⴱⴷⴷⵏ ⵅⴼ ⵡⴰⵏⴰⵡ ⴷ ⵓⵡⵏⵏⵉ ⴰⵎⵙⵏⵓⵃⵢⵓ ⵎⴳⴰⵍ ⵜⵡⵜⵎⵉⵏ, ⵙ ⵓⵙⵙⵏⵜⵉ ⵙⴳ ⵜⵉⵏⵎⵍ, ⵙ ⵓⵙⵙⵔⵇⴱ ⵏ ⵡⴰⵣⵣⴰⵏⵏ ⵅⴼ ⵡⴰⵕⵕⴰⵥ ⵏ ⵜⴷⵍⵙⴰ ⵏ ⵢⵉⵙⴽⵉⵍ ⴷ ⵓⵙⵖⵣⵏ ⵏ ⵜⵎⵢⴰⴷⴰⵙⵜ ⵏ ⵡⴰⵏⴰⵡ ⴳ ⵓⵣⵣⵔⴰⵢ ⵉ ⵉⵖⴰⵡⴰⵙⵏ ⵉⵏⵎⵍⴰⵏⵏ.
ⴳ ⵎⴰⴷ ⵉⵥⵍⵉⵏ ⵙ ⵉⴱⵔⴷⴰⵏ ⵏ ⵓⵣⵔⴰⵢ ⵏ ⵜⵏⵥⴰⵕ ⵏ ⵢⵉⵙⴽⵉⵍ ⴷ ⵓⵙⵉⴷⴼ ⴳ ⵓⴳⵏⵙⵓ ⵏ ⵜⵎⵙⵙⵏⵜⵉⵜⵉⵏ, ⵙⴷⴷⵉⴷⵏ ⵉⵎⴷⵔⴰⵡⵏ ⴷ ⵜⵎⴷⵔⴰⵡⵉⵏ ⵅⴼ ⵓⵙⵖⵓⵏ ⵏ ⵜⴷⵔⴰⵡⵜ ⵏ ⵜⵎⵙⵙⵏⵜⵉⵜ ⴳ ⵓⵙⴷⵓⵙ ⵏ ⵉⵎⵏⵣⴰⵢⵏ ⵏ ⵜⵙⵓⵎⵓⵜ ⴷ ⵢⵉⵙⴽⵉⵍ ⴰⵎⵢⴰⴳⴰⵏ ⵏⴳⵔ ⵜⴰⴳⴳⴰⵢⵉⵏ ⴷ ⵓⵙⴽⵉⵍ ⵏ ⵉⵣⵎⴰⵣ. ⵎⴽⴷⴰ ⵙⴷⴷⵉⴷⵏ ⵅⴼ ⵜⵉⵍⴰⵍⵜ ⵜⴰⵎⴰⵏⴰⵔⵜ ⵏ ⵜⵎⵙⵙⵏⵜⵉⵜⵉⵏ ⴳ ⵓⵙⴷⵓⵙ ⵏ ⵓⵙⵉⴷⴼ, ⵙ ⵜⵙⵉⵍⴰⵡⵜ ⵏ ⵜⵙⵔⵜⴰⵢ ⵜⵉⴳⵯⵏⵙⴰⵏⵉⵏ ⵙⵉⵙⵏ ⵉⵥⵍⵉⵏ ⵉ ⵓⵙⴷⵓⵙ ⵏ ⵢⵉⵙⴽⵉⵍ ⵏⴳⵔ ⵜⴰⴳⴳⴰⵢⵉⵏ ⵃⵎⴰ ⴰⴷ ⵙⵎⵓⵏⵏ ⵉⵎⵙⵡⵓⵔⵉⵢⵏ ⵅⴼ ⵜⵉⵏⴷⵉⵜⵉⵏ ⵉⴳⴰⵏ ⵢⴰⵏ ⴷ ⵓⵙⵙⵔⵇⴱ ⵏⵏⵙⵏ ⵅⴼ ⵓⵙⵎⵢⴰⴳ ⵏⵏⵙⵏⵜ.
ⴳ ⵓⵎⵏⴰⴹ ⴰⵎⵉⵔⵉⵡ, ⵏⵏⴰⵏ ⵉⵎⴷⵔⴰⵡⵏ/ⵜⵉⵎⴷⵔⴰⵡⵉⵏ ⵎⴰⵙ ⵉⴳⴰ ⵓⵙⵙⴼⵔⴽ ⵏ ⵜⵡⵜⵎⵉⵏ ⴷ ⵜⵔⴱⴰⵜⵉⵏ ⵙ ⵉⵣⵔⴼⴰⵏ ⵏⵏⵙⵏⵜ ⴷ ⵜⴷⵔⴼⵉⵏ ⵏⵏⵙⵏⵜ ⵢⴰⵏ ⵙⴳ ⵉⵙⵉⵣⵡⵉⵔⵏ ⵏ ⵡⴰⵏⵏⴰⵍ ⵏ ⵓⵙⵙⵉⵡⴹ ⵏⵏⵙⵏⵜ ⵖⵔ ⵉⵣⵎⴰⵣ ⵏ ⵓⵙⵙⵍⵎⴷ ⴷ ⵓⵙⵣⵎⵔ ⴰⴷⵎⵙⴰⵏ ⴷ ⵓⵏⴰⵎⵓⵏ ⴷ ⵜⴷⵔⴰⵡⵜ ⵜⴰⵎⵢⴰⴳⴰⵏⵜ ⴳ ⵜⵎⴳⵓⵔⵉ ⵏ ⵜⵖⵜⴰⵙⵜ ⴷ ⵜⵓⴷⵔⵜ ⵜⴰⵎⴰⵜⴰⵢⵜ, ⵙⴷⴷⵉⴷⵏ ⵅⴼ ⵜⵉⵍⴰⵍⵜ ⵏ ⵜⵏⵖⵎⴰⵙⵜ ⴷ ⵉⵎⴰⵙⵙⵏ ⵏ ⵓⵎⵢⴰⵡⴰⴹ ⴳ ⵓⵚⴽⵓ ⵏ ⵉⵙⵓⵔⵜⵏ ⵓⵎⵏⵉⴳⵏ ⵉ ⵜⵎⵖⴰⵔⵜ ⴷ ⵜⴷⵔⴰⵡⵜ ⵙ ⵎⴽⴰ ⴳ ⵓⵙⴱⴷⴷⵉ ⵏ ⵓⵙⵎⴷⵢⴰ ⵏⵏⴰ ⵉⵙⴱⵉⴹⵉⵕⵏ ⵜⵓⴳⴳⴰⵣ ⵏ ⵓⵙⵏⴼⵍ ⵏ ⵜⵡⵏⴳⵉⵎⵉⵏ ⴷ ⵜⵏⴽⵔⴰ ⵙ ⵡⴰⴷⴷⴰⴷ ⵏ ⵜⵎⵖⴰⵔⵜ.
