ⵉⵙⵙⴼⴰⵡ ⴷ ⵎⴰⵙ ⴰⵅⵏⵏⵓⵛ ⴳ ⵜⵙⴳⵓⵔⵉ ⵏⵏⵙ ⵉ ⵜⵖⵎⵙⴰ ⵅⴼ ⵜⵎⴰ ⵏ ⵜⴷⵔⴰⵡⵜ ⵏⵏⵙ ⴳ ⵜⴼⵓⴳⵍⴰ ⵏ ⵓⵙⴳⴳⵯⴰⵙ ⴰⵎⴰⵣⵉⵖ ⴰⵎⴰⵢⵏⵓ 2975, ⵉⵍⴰ ⵜⵜⵡⴰⴳⴳⵏ ⴳ ⵓⵙⴰⵜⵉ ⴰⴷ ⴽⵉⴳⴰⵏ ⵏ ⵉⵙⵏⴼⴰⵔⵏ ⵉ ⵉⵜⵜⵉⵅⵙⵏ ⴰⴷ ⵙⵙⵉⴷⴼⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵓⵍⴰ ⴽⵟⵕ ⴳ ⵓⵙⵡⵉⵔ ⵏ ⵜⵎⵙⵙⵓⴳⵓⵔⵉⵏ ⵜⵉⵎⴰⵜⴰⵢⵉⵏ ⴷ ⵉⵏⴰⴳⵔⴰⵡⵏ ⵏ ⵓⵙⵍⵎⴷ.
ⴳ ⵓⵎⵏⴰⴹ ⴰ, ⵉⵇⴰⴷⴰ ⴱⴰⴱ ⵏ ⵡⵓⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙ ⵚⴹⵉⵚ ⵉ ⵉⴷⵙⵜⵔⵏ ⵜⴰⵎⴰⵣⵉⵖⵜ, ⵉ ⵉⵔⵔⴰⵏ ⵙⴳ 14 ⵉⵏⵏⴰⵢⵔ ⵉ ⴷ ⵢⵓⵙⴰⵏ ⴰⴽⴷ ⵓⵎⵏⵣⵓ ⵏ ⵓⵙⴳⴳⵯⴰⵙ ⴰⵎⴰⵣⵉⵖ ⵢⵉⵡⵜ ⵏ ⵜⴼⵓⴳⵍⴰ ⵜⴰⵎⴰⴷⴷⵓⴷⵜ ⴳ ⵍⵎⵖⵔⵉⴱ, ⵉⵔⵏⴰ ⵉⵍⴰ ⴰⵙⴼⵓⴳⵍⵓ ⵙ ⵉⵅⴼ ⵏ ⵓⵙⴳⴳⵯⴰⵙ ⴰⵎⴰⵣⵉⵖ ⴷ ⵉⵊⵊⵏ ⵜⵎⵍⴷⴰ ⵉ ⴷⵉ ⴷ ⵎⵎⴰⵍⵏ ⵉⵛⵜ ⵜⴰⵢⵙⵉ ⴷ ⵜⴰⴷⵍⵙⴰⵏⵜ ⴽⵙⵙⵉⵏ ⵜⵜ ⴰⴽⵉⴷⵙⵏ ⵉⵎⵖⵔⴰⴱⵉⵢⵏ ⵇⴰⵃ.
ⴳ ⵜⴼⵓⴳⵍⴰ ⴰⴷ ⵏⵏⴰ ⵉⵎⵙⴰⵔⵏ ⴳ ⵜⵡⴰⵙⵉⵜ ⵏ ⵍⵡⴰⵍⵉ ⵏ ⵜⵙⴳⴰ ⵏ ⵙⵓⵙ ⵎⴰⵙⵜ, ⴰⵏⴱⴱⴰⴹ ⵏ ⵜⵎⵏⴱⴰⴹⵜ ⵏ ⵓⴳⴰⴷⵉⵔ ⵉⴳⴰⵡⵜⴰⵏⴰⵏ, ⵙⴰⵄⵉⴷ ⴰⵎⵣⴰⵣⵉ, ⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵜⵙⴳⴰ ⵏ ⵙⵓⵙ ⵎⴰⵙⵜ, ⴽⴰⵔⵉⵎ ⴰⵛⵏⴽⵍⵉ, ⵉⵔⵣⴼ ⵎⴰⵙⵙ ⴰⵅⵏⵏⵓⵛ ⵖⵔ ⵓⵔⵜⵉ ⵏ ⴱⵏ ⵣⴰⵢⴷⵓⵏ, ⵎⴰⵏⵉ ⵉⵥⵕⴰ ⴰⵙⴼⵙⵔ ⵏ ⵜⵎⵢⴰⵡⴰⵙⵉⵏ ⴷ ⵉⴼⵙⴰⵔⵏ ⵏⵏⵙⵏⵜ ⵏⵏⴰ ⵉⵙⵔⵓⵖⴰⵏ ⵜⵓⴼⴰⵡⵜ ⵅⴼ ⵓⵙⵏⴼⵍⵓⵍ ⵏ ⵉⵃⵔⴰⵢⴼⵉⵢⵏ ⵉⴱⵍⴷⵉⵢⵏ.
ⵙⴳ ⵜⵙⴳⴰ ⵢⴰⴹⵏ, ⵉⵜⵜⵡⴰⴳⴳ ⴳ ⵓⵔⴰⵇ ⵏ ⵜⵇⵚⴱⵜ ⵏ ⵓⴳⴰⴷⵉⵔ ⵏ ⵓⴼⵍⵍⴰ, ⵉⵊⵊⵏ ⵓⵙⴰⵢⵔⴰⵔ ⵎⴰⵏⵉ ⵜⵜⵇⴰⵙⴰⵏ ⵎⴰⵛⵛⴰⵜ ⵏ ⵉⵎⴰⵣⵉⵖⵏ ⴰⴽⴷ ⵓⵖⵣⴷⵉⵙ ⵏ ⴽⵔⴰ ⵏ ⵉⵙⴼⵙⴰⵔⵏ ⵏ ⵓⵥⴰⵡⴰⵏ ⵉ ⵉⵙⴽⵔⵏ ⵛⴰ ⵙⴳ ⵉⵜⵔⴰⵏ ⵏ ⵓⵎⴰⵔⴳ ⴰⵎⴰⵣⵉⵖ.
