ⵜⵔⵏⵓ ⵜⵏⵏⴰ ⵎⴰⵙⵙⴰ ⵙⵖⵔⵓⵛⵏⵉ ⴳ ⵢⴰⵜ ⵜⴰⵙⴳⵓⵔⵉ ⵉ ⵜⴰⵏⵖⵎⴰⵙⵜ ⴳ ⵢⴰⵏ ⵓⵏⵎⵓⵇⵇⴰⵔ ⵅⴼ ⵓⵙⵔⵙ ⴰⵎⴰⴷⴷⵓⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵎⴰⵙ ⴽⵛⵎⵏⵜ ⵜⵉⵎⵙⵙⵓⴳⴰⵔ ⵜⴳⴷⵓⴷⴰⵏⵉⵏ ⴳ ⵜⴰⵡⵓⵔⵉ ⵢⴰⴷ ⵙ ⵓⵎⵢⴰⵡⴰⵙ ⵙ ⵓⵙⵙⴳⵎⴹ ⵏ ⵎⵏⵏⴰⵡⵜ ⵏ ⵜⵉⵎⵢⴰⵇⵇⴰⵏⵉⵏ ⵏ ⵜⴰⴷⵔⴰⵡⵜ ⵍⵍⵉ ⵉⵔⴰⵏ ⴰⵙⴷⵓⵙ ⵏ ⵓⵙⵉⴷⴼ ⵏ ⵜⵓⵜⵍⴰⵢⵜ ⵜⴰⵎⵣⵉⵖⵜ ⴳ ⵎⵏⵏⴰⵡ ⵏ ⵉⴳⵔⴰⵏ ⴰⵛⴽⵓ ⵜⴰⵏⴽⵜⵔⴰ ⵏⵏⵙ ⵜⴳⴰ ⵜⴰⵡⵓⵔⵉ ⵜⴰⵏⵎⵓⵔⵜ ⴷ ⵉⵛⵛⴰⵔⵏ.
ⵜⵙⵙⴽⵜⵉⴷ ⵓⵍⴰ ⵎⴰⵙ ⵉⴼⴽⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙⵙ ⵚⴹⵉⵚ ⴰⴷⴷⵓⵔ ⴰⵅⴰⵜⴰⵔ ⵉ ⵜⴰⵎⴰⵣⵉⵖⵔ ⵍⵍⵉ ⵉⴳⴰⵏ ⵢⴰⵏ ⵓⴳⵣⵣⵓⵎ ⴳ ⵜⴰⵎⴰⴳⵉⵜ ⴷ ⵜⴰⴷⵍⵙⴰ ⵜⴰⵏⴰⵎⵓⵔⵜ ⴷ ⴰⵢⴷⴰ ⵉⵛⵛⴰⵔⵏ ⵏ ⴰⴽⴽⵯ ⵉⵎⵖⵔⵉⴱⵉⵢⵏ ⴷ ⵉⵔⴰ ⴱⴰⴱ ⵏ ⵡⴰⴷⴷⵓⵔ ⵓⵍⴰ ⴰⴷ ⵜⴰⵎⵥ ⵜⴰⵎⴰⵣⵉⵖⵜ ⵢⴰⵏ ⵓⵏⵙⴰ ⵉⵖⵓⴷⴰⵏ ⵣⵓⵏⴷ ⵜⴰⵖⵜⴰⵙⵜ ⵍⵍⵉⵖ ⵉⴳⴰ ⵉⵅⴼ ⵏ ⵓⵙⴳⴳⵯⴰⵙ ⴰⵎⴰⵣⵉⵖ ⵜⴰⴼⵓⴳⵍⴰ ⵜⴰⵏⴰⵎⵓⵔⵜ.
ⵜⵙⴷⴷⵉⴷ ⵜⵎⴰⵡⴰⵙⵜ ⵎⴰⵙ ⵜⴼⴽⴰ ⵜⵏⴱⴰⴹⵜ ⵉ ⵜⴰⵡⵓⵔⵉ ⵏ ⵓⵙⵔⵙ ⴰⵎⴰⴷⴷⵓⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵢⴰⵏ ⵡⴰⴷⴷⵓⵔ ⴰⵎⵇⵔⴰⵏ ⵍⵍⵉⵖ ⵜⵙⵙⵉⵡⵊⵉⴷ ⵉⵎⴰⵙⵙⵏ ⵏ ⵓⵣⵣⵉⴳⵣ ⵏ ⵓⵣⵔⴼ ⵉⵥⵍⵉⵏ ⵙ ⵜⵉⵣⵎⴰⵣ ⵏ ⵓⵙⵔⵙ ⴰⵎⴰⴷⴷⵓⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵎⴰⵏⴽⴰ ⴰⵙⵉⴷⴼⵏ ⵏⵏⵙ ⴳ ⵉⴳⵔ ⵏ ⵓⵙⴳⵎⵉ ⴷ ⵉⴳⵔⴰⵏ ⵜⵓⴷⵔⵜ ⵜⴰⴳⴷⵓⴷⴰⵏⵜ ⵉⵎⵣⵡⵓⵔⴰ.
ⵜⵎⵍⴰ ⵓⵍⴰ ⵎⴰⵙ ⴰⵔ ⵜⵙⵡⵓⵔⵉ ⵜⵎⴰⵡⴰⵙⵜ ⵏ ⵓⵎⵓⵜⵜⵉ ⴰⵎⴰⵟⵟⵓⵏ ⴷ ⵓⵙⵡⵓⴷⴷⵓ ⵏ ⵜⵎⵙⵙⵓⴳⵓⵔⵜ ⴳ ⵓⵙⴷⵓⵙ ⵏ ⵜⵉⵢⴰⴼⵓⵜⵉⵏ ⵏ ⵓⵙⵏⵓⴱⴳ ⴳ ⵜⵉⵎⵙⵙⵓⴳⴰⵔ ⵜⴳⴷⵓⴷⴰⵏⵉⵏ ⵍⵍⵉⵖ ⵜⵙⵔⵙ 464 ⵏ ⵉⵎⵙⵖⴰⵏⵏ ⵉⵙⵡⴰⵍⵏ ⵙ ⵜⵓⵜⵍⴰⵢⵜ ⵜⴰⵎⵣⵉⵖⵜ ⴳ ⵎⵏⵏⴰⵡⵜ ⵏ ⵜⵉⵎⵙⵙⵓⴳⴰⵔ ⴳ ⵜⵉⵙⴳⵉⵡⵉⵏ ⵏ ⵜⵉⴳⵍⴷⵉⵜ ⴷ ⵓⵙⵔⵙ ⵏ 60 ⵉⵎⵙⵖⴰⵏⵏ ⵉⵙⴰⵡⵍⵏ ⵜⵓⵜⵍⴰⵢⵜ ⵜⴰⵎⵣⵉⵖⵜ ⴷⴰⵔ 10 ⵏ ⴰⵎⵎⴰⵙⵏ ⵏ ⵓⵎⵢⴰⵡⴰⴹ.
ⴳ ⵜⴰⵙⴳⴰ ⵢⴰⴹⵏ ⵔⴰⴷ ⵜⵏⵎⴰⵍⴰ ⵜⵎⴰⵡⴰⵙⵜ ⵏ ⵓⵎⵓⵜⵜⵉ ⴰⵎⴰⵟⵟⵓⵏ ⴷ ⵓⵙⵡⵓⴷⴷⵓ ⵏ ⵜⵎⵙⵙⵓⴳⵓⵔⵜ ⴰⵙⵙ ⵏ 14 ⵉⵏⵏⴰⵢⵔ ⴳ ⵕⵕⴱⴰⵟ ⵍⵍⵉ ⵔⴰⴷ ⵉⵙⵙⴼⵓⴳⵍⴰ ⴰⵙⴽⵜⵉ ⵡⵉⵙⵙ ⵙⵉⵏ ⵏ ⵓⵙⴳⴳⵯⴰⵙ ⴰⵎⵣⵉⵖ .
