ⵜⴰⵙⵙⵓⵜⵍⵜ ⵜⵉⵙⵙ 15 ⵏ ⵓⵍⵎⵓⴳⴳⴰⵔ ⵉⵙⵏⵉ ⵏ ⵡⵓⵔⵖ ⴰⴳⵔⴰⵖⵍⴰⵏ ⵏ ⵓⵙⴰⵔⵓ ⴰⵎⴰⵣⵉⵖ (FINIFA) ⵔⴰⴷ ⵜⵉⵍⵉ ⵙⴳ 11 ⴰⵔ 15 ⵛⵓⵜⴰⵏⴱⵉⵔ 2024 ⴳ ⵜⴷⴰⵍⴰ ⵏ ⵙⵙⵉⵏⵉⵍⴰ ⵚⴰⵃⴰⵕⴰ ⴳ ⵜⵓⴷⴷⵓⵔⵜ ⵜⴰⵇⵇⴱⵓⵔⵜ ⵜⴰⵍⴱⵔⵊⵜ ⴳ ⵓⴳⴰⴷⵉⵔ.
ⴰⵍⵎⵓⵇⵇⴰⵔ ⴰⴷ ⵏ ⵙⵙⵉⵏⵉⵎⴰ ⵉⵜⵜⵓⵙⴽⴰⵔ ⵙ ⵜⴷⵔⴰⵡⵜ ⴷ ⵜⵖⵉⵡⴰⵏⵜ ⵏ ⵓⴳⴰⴷⵉⵔ ⴷ ⵓⵙⵇⵇⵉⵎ ⴰⵏⵎⵏⴰⴹ ⵙⵓⵙ ⵎⴰⵙⵙⵜ ⴷ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⴰⵔ ⴰⵡⵏ ⵢⴰⴽⴽⴰ ⵓⵍⵎⵓⴳⴳⴰⵔ ⵏ ⵉⵙⵏⵉ ⵏ ⵡⵓⵔⵖ ⴰⵡⴰⵍ ⵙ ⵢⴰⵏ ⵡⴰⵀⵉⵍ ⵉⴱⵖⵔⵏ ⴷ ⵉⴳⴰⵏ ⴰⵎⵏⵏⴰⵡ, ⵎⴰ ⴰⵏⵏ ⵙ ⵓⵙⵙⵎⵖⵔ ⵏ ⵙⵙⵉⵏⵉⵎⴰ ⵜⴰⵎⴰⵣⵉⵖⵜ ⴷ ⵙⵙⵉⵏⵉⵎⴰ ⵜⴰⵎⴰⴹⵍⴰⵏⵜ.
ⵜⴰⵙⵙⵓⵜⵍⵜ ⴰⴷ ⵏ (FINIFA) ⵔⴰⴷ ⵜⵜ ⵏⵓⵃⵢⵓ, ⴰⵛⴽⵓ ⵔⴰⴷ ⵜⵙⵏⵎⴰⵍⴰ ⴽⵕⴰⴹⵜ ⵜⵎⵣⵉⵣⵣⵍⵉⵏ ⵍⵍⵉ ⴳ ⵜⴳⴰ : ⵜⵙⵎⵖⵓⵔⵜ ⵏ ⵙⵙⵉⵏⵉⵎⴰ ⵜⴰⵎⴰⵣⵉⵖⵜ ⴷ ⵜⵙⵎⵖⵓⵔⵜ ⵜⴰⴳⵔⴰⵖⵍⴰⵏⵜ ⴷ ⵜⵙⵎⵖⵓⵔⵜ ⵜⴰⵏⴰⵎⵓⵔⵜ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵍⵍⵉ ⵢⴰⴽⴽⴰ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵉ ⴰⵏⴰⵡ ⵏ ⵓⵙⴰⵔⵓ. ⵔⴰⴷ ⵢⵉⵍⵉ ⵓⵙⵙⵎⵏⵉⴷ ⵏ ⵓⴳⴳⴰⵔ ⵏ 30 ⵏ ⵓⵙⴰⵔⵓ ⵍⵍⵉ ⵉⵙⵎⵔⴽⵙ ⴳⵔ ⵓⵙⵏⴼⵍⵓⵍ ⴰⵎⴰⵣⵉⵖ ⴷ ⵓⵙⵢⴰⴼⵓ ⴰⵎⴰⴹⵍⴰⵏ ⴼⴰⴷ ⴰⴷ ⵏⵙⵙⵉⵜⵜⴳ ⵜⴰⴷⵍⵙⴰ ⵜⴰⵎⴰⵣⵉⵖⵜ ⵜⵉⵣⵉ ⵔⴰⴷ ⴷ ⴰⴽⴽⵯ ⵎⵓⵏⵏ ⴳ ⵜⵖⵔⵎⵜ ⵏ ⵓⴳⴰⴷⵉⵔ.
ⴰⴷ ⵏⵖⴰⵎⴰ ⴼ ⵜⵎⵢⵓⵔⵜ ⵏ ⵜⵎⵣⵉⵣⵣⵍⵜ ⵜⴰⵎⴰⴹⵍⴰⵏⵜ ⴳ ⵓⴳⵏⵙ ⵏ (FINIFA) ⵉⴳⴰ ⵢⴰⵏ ⵢⵉⵎⵉⵙⵙ ⵍⵍⵉ ⵔⴰⴷ ⵉⵙⵖⵔⵔⴷ ⵉⴷⵉⵔⵏ ⵉⴷⵍⵙⴰⵏⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⴰⵢⵍⵍⵉ ⵔⴰⴷ ⴰⵙ ⵉⴼⴽ ⵢⴰⵜ ⵜⴷⴰⵙⵉⵜ ⵍⵍⵉ ⴳ ⵔⴰⴷ ⵜⵎⵙⴰⵡⴰⵍ ⴷ ⵓⵎⴰⴹⴰⵍ, ⴷ ⴰⵢⵍⵍⵉ ⵔⴰⴷ ⵉⵙⵙⴷⵓⵙ ⵜⴰⵎⵏⵏⴰⵡⵜ ⵜⴰⴷⵍⵙⴰⵏⵜ, ⵉⴳ ⴰⵡⴷ ⵜⴰⵎⵍⴷⴰ ⵉ ⵓⴳⴷⵓⴷ ⴼⴰⴷ ⴰⴷ ⵉⵥⵕ ⵜⵉⵡⵉⵔⵉⵡⵉⵏ ⵢⴰⴹⵏⵉⵏ ⵉⴽⵛⵎ ⴳ ⵜⵎⵏⵏⴰⵡⵜ ⵜⴰⴷⵍⵙⴰⵏⵜ, ⴷ ⵉⴷ ⵢⴰⵏ ⵓⵙⵕⵥⵎ ⴼ ⵓⵎⴰⴹⴰⵍ.
ⴰⵍⵎⵓⴳⴳⴰⵔ ⵔⴰⴷ ⵉⵙⵙⵏⵜⵉ ⴰⵙⵙ ⵏ 11 ⵛⵓⵜⴰⵏⴱⵉⵔ 2024 ⴳ ⵜⵙⵔⴰⴳⵜ ⵜⵉⵙⵙ ⵙⴰⵜ ⵏ ⵜⴷⴳⴳⵯⴰⵜ, ⵔⴰⴷ ⴳⵉⵙ ⵜⵉⵍⵉ ⵜⴼⴼⵓⴳⵍⴰ ⵏ ⵓⵔⵥⵥⵓⵎ ⴷ ⵓⵙⵙⵎⵏⵉⴷ ⵏ ⵓⵙⴰⵔⵓ ⵎⴰⵔⵉⴽⴰⵏ ⵎⴽ ⵍⵍⵉ ⵜⴳⴰ – ⵜⴰⵜⵢⴰⵏⴰ ⴼⵓⵔⵉⵙ – ⵟⵟⴰⵍⵢⴰⵏ /ⵍⵎⵖⵔⵉⴱ, ⵎⴽ ⵍⵍⵉ ⵔⴰⴷ ⴳⵉⵙ ⵢⵉⵍⵉ ⵓⵙⵎⵏⵉⴷ ⵏ ⵢⴰⵏ ⵓⵙⴰⵔⵓ ⴳⵣⵣⵓⵍⵏ ⴰⵎⴰⵣⵉⵖ ⵍⵍⵉ ⵎⵉ ⵜⵙⴽⵔ ⵙⵓⴽⴰⵢⵏⴰ ⵙⵙⵄⵉⵢⴷⵉ ⴰⵙⵙⵓⴼⴼⵖ, ⴷ ⵎⴽ ⵍⵍⵉ ⵔⴰⴷ ⴳⵉⵙ ⵢⵉⵍⵉ ⴰⵡⴷ ⴰⵙⵙⵎⵖⵔ ⵏ ⵃⴰⵙⴰⵏ ⴱⴰⴷⵉⴷⴰ ⵍⵍⵉ ⵉⴳⴰⵏ ⵉⵙⵍⵉ ⵏ ⵜⵙⵙⵓⵜⵍⵜ ⴰⴷ.
ⴼⵉⵏⵉⴼⴰ, ⴰⵍⵎⵓⴳⴳⴰⵔ ⵉⵙⵏⵉ ⵏ ⵡⵓⵔⵖ ⴰⴳⵔⴰⵖⵍⴰⵏ ⵏ ⵓⵙⴰⵔⵓ ⴰⵎⴰⵣⵉⵖ, ⵉⵖⴰⵎⴰ ⴱⴷⴷⴰ ⵉⴳⴰ ⵜⴰⵎⴰⵜⴰⵔⵜ ⵉⵥⵥⵏⵥⵕⵏ ⵉ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⴷ ⵢⴰⵏ ⵓⴷⵖⴰⵔ ⵏⴰⵃⵢⴰ ⵍⵍⵉ ⵜⵜⵎⵇⵇⴰⵔⵏ ⵉⴷ ⴱⴰⴱ ⵏ ⵙⵙⵉⵏⵉⵎⴰ ⴷ ⵉⵙⴳⴱⴰⵔⵏ ⴷ ⵡⵉⵍⵍⵉ ⵜⵓⵙⵓ ⵜⵓⴽⵙⵉ ⵙ ⵜⵥⵓⵕⵉ ⴳ ⴽⵔⴰ ⵉⴳⴰⵏ ⵜⴰⵙⴳⴰ ⴳ ⵓⵎⴰⴹⴰⵍ, ⴰⴷ ⴽⵯⵏ ⵓⵔ ⵜⵣⵔⵉ ⵜⵉⵣⵉ ⵏ ⵜⵙⵙⵓⵜⵍⵜ ⴰⴷ, ⵍⵍⵉ ⵔⴰⴷ ⵉⴳ ⵜⵉⴼⴰⵡⵉⵏ ⵏⵏⵙ ⴼ ⵜⵎⵏⵏⴰⵡⵜ ⵜⴰⴷⵍⵙⴰⵏⵜ.
